త్వరగా అలసిపోతున్నారా? ఇవి తింటే ఫుల్ ఎనర్జీతో ఉంటారట! అవేంటో తెలుసా?

Protein Rich Foods for Energy: ప్రస్తుత ఉరుకుల పరుగుల జీవితంలో క్షణం తీరిక లేకుండా గడుపుతూ ఒత్తిడి, అలసటతో సతమతమవుతుంటారు చాలా మంది. ఇలాంటి బిజీ లైఫ్‌స్టైల్‌తో ఎదురయ్యే అలసటను దూరం చేసుకొని చురుగ్గా ఉండాలంటే ప్రొటీన్లతో నిండిన ఆహార పదార్థాలను రోజువారీ డైట్‌లో చేర్చుకోవాలని నిపుణులు సూచిస్తున్నారు. ఇవి శరీర కండర వ్యవస్థను దృఢం చేస్తాయని.. ఫలితంగా అలసట దూరమవుతుందని అంటున్నారు. అంతేకాకుండా ఈ పోషకాలు గుండె ఆరోగ్యాన్ని, రోగ నిరోధకశక్తిని పెంపొందించేందుకూ దోహదం చేస్తాయని తెలిపారు. ఇలా ప్రొటీన్లు అధికంగా ఉండే ఆహారం తీసుకోవడం వల్ల కడుపు నిండిన భావన కలుగుతుందని.. ఫలితంగా బరువునూ అదుపులో ఉంచుకోవచ్చని వివరిస్తున్నారు. ఈ నేపథ్యంలోనే అవేంటో ఇప్పుడు తెలుసుకుందాం.

నట్స్: ప్రొటీన్లతో నిండిన బాదంపప్పు, పిస్తా, అక్రోట్ వంటి గింజలను రోజూ మితంగా తీసుకోవడం మంచిదని నిపుణులు అంటున్నారు. ఇవి ముఖ్యంగా గుండెకు మేలు చేస్తాయని.. వీటిని సలాడ్లు, ఉడికించిన కూరగాయలతో కూడా కలుపుకొని తినొచ్చని సూచిస్తున్నారు. అయితే నట్స్‌లో క్యాలరీలు కూడా ఎక్కువగానే ఉంటాయి కాబట్టి మితంగానే తీసుకోవాలని సలహా ఇస్తున్నారు. 2023లో Nutrients జర్నల్​లో ప్రచురితమైన "Nuts and Cardiovascular Disease Outcomes: A Review of the Evidence and Future Directions" అధ్యయనంలోనూ ఈ విషయం తేలింది. (రిపోర్ట్ కోసం ఇక్కడ క్లిక్ చేయండి)

నట్స్ (Getty Images)

పాలు, పాల పదార్థాలు: కండరాల నిర్మాణానికి తోడ్పడే ప్రొటీన్లు.. పాలు, పాల పదార్థాల్లో పుష్కలంగా ఉంటాయని నిపుణులు అంటున్నారు. ఇవి రక్తపోటు అదుపులో ఉంచడానికీ తోడ్పడతాయని చెబుతున్నారు. ఈ క్రమంలోనే తక్కువ కొవ్వులుండే పాల పదార్థాలను తీసుకోవాలని సూచిస్తున్నారు.

పాలు, పాల పదార్థాలు (Getty Images)

సోయాబీన్స్: సోయాబీన్స్‌లో ప్రొటీన్ల మోతాదు ఎక్కువగా ఉంటుందని.. ఇంకా వీటిని సోయా పాలు, సోయా పేస్ట్, టోఫూ రూపంలోనూ తీసుకోవచ్చని అంటున్నారు. మామూలు పాలలో మాదిరిగానే సోయా పాలలోనూ ప్రొటీన్ ఎక్కువగా ఉంటుందని చెబుతున్నారు. అయితే ఇవి కొంతమందికి పడకపోవచ్చని.. అలాంటి వారు వైద్యులను సంప్రదించి తీసుకోవాలని సూచిస్తున్నారు.

సోయాబీన్స్ (Getty Images)

పప్పుధాన్యాలు: కందులు, పెసలు, మినుములు లాంటి పప్పు ధాన్యాల్లో ఉండే పోషకాలతో ఎన్నో ఆరోగ్య ప్రయోజనాలు ఉన్నాయని నిపుణులు చెబుతున్నారు. ముఖ్యంగా ఇందులో ప్రొటీన్లు అధికంగా ఉంటాయని వివరిస్తున్నారు. పప్పులో ఉండే పీచు పదార్థాలు శరీర బరువును అదుపులో ఉంచుతాయని వెల్లడిస్తున్నారు. ఇంకా వీటిలో ఉండే ఫైబర్‌, యాంటీ ఆక్సిడెంట్లు.. గుండె సంబంధిత సమస్యలు, క్యాన్సర్‌ లాంటి దీర్ఘకాలిక వ్యాధుల నుంచి రక్షణ కల్పిస్తాయని తెలిపారు.

పప్పుధాన్యాలు (Getty Images)

• ఇంకా బఠాణీలు, రాజ్మా, బీన్స్, చిక్కుళ్లు, ఇతర కూరగాయల్లోనూ ప్రొటీన్ ఉంటుందట.
• ముఖ్యంగా చేపల్లో ప్రొటీన్లతో పాటు గుండెకు మేలు చేసే ఒమేగా-3 కొవ్వు ఆమ్లాలూ ఎక్కువగానే ఉంటాయని అంటున్నారు.
• మాంసాహారంలోనూ ప్రొటీన్లు మెండుగా ఉంటాయట. అయితే వీటిలో కొవ్వులు కూడా ఎక్కువగా ఉంటాయి కాబట్టి మితంగానే తినాలని నిపుణులు సూచిస్తున్నారు.
• కోడిగుడ్డులో కూడా ప్రొటీన్ ఉంటుందని చెబుతున్నారు. కానీ కొలెస్ట్రాల్ ఎక్కువగా ఉన్న వారు, గుండెజబ్బు, మధుమేహం వంటి సమస్యలున్న వారు రోజుకు ఎన్ని గుడ్లు తినచ్చో డాక్టర్ సలహా తీసుకోవాలని అంటున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.

మాంసాహారం (Getty Images)

పిల్లలు మట్టి, బలపం తింటున్నారా? ఏం చేస్తే ఈ అలవాటు మానేస్తారు? అసలెందుకు ఇలా తింటారు?

లంచ్ చేయగానే నిద్ర వస్తుందా? ఇందుకు కారణమేంటి? ఎలా తప్పించుకోవాలి?