North Korea On Russia Support : ఉక్రెయిన్‌తో జరుగుతున్న యుద్ధంలో రష్యా తరఫున ఉత్తర కొరియా సైనికులు పాల్గొంటున్నారంటూ గతంలో వార్తలు వచ్చాయి. ఇప్పటివరకు దీనిపై ఇటూ రష్యా, అటూ ఉత్తరకొరియా రెండు దేశాలు స్పందించలేదు. అయితే, దీనిపై తొలిసారిగా నార్త్ కొరియా స్పందిస్తూ, రష్యాకు తమ సైనికులను పంపించినట్లు అంగీరించింది. ఈ విషయాన్ని ఉత్తర కొరియా అధికారిక మీడియా సంస్థకు సోమవారం అందించిన ఒక ప్రకటనలో పేర్కొంది.
పరస్పర రక్షణ ఒప్పందం కింద యుద్ధసైనికులను రష్యాకు పంపించాలని ఉత్తరకొరియా అధ్యక్షుడు కిమ్ జంగ్ ఉన్ నిర్ణయించినట్లు ప్రకటనలో ఉంది. ఉక్రెయిన్ నయా-నాజీ ఆక్రమణదారుల విధానాలను అమలు చేస్తూ ఆక్రమించిన కుర్స్క్ ప్రాంతాన్ని విముక్తి చేయడానికి రష్యన్ సాయుధ దళాలకు సహకరిస్తూ సైన్యాన్ని మోహరించామని తెలిపింది. న్యాయం కోసం పోరాడిన వారందరూ మాతృభూమి గౌరవానికి ప్రతినిధులు, వీరులని కిమ్ పేర్కొన్నట్లు ప్రకటనలో ఉంది.
ఇటీవల కర్స్క్‌లో ఉక్రెయిన్ను తిప్పికొట్టే క్రమంలో ఉత్తర కొరియా సైనికులు తమతో కలిసి పని చేశారని ఈ క్రమంలో వారు ధైర్యసాహసాలను ప్రదర్శించారని రష్యా సాయుధ బలగాల చీఫ్‌ ఆఫ్‌ జనరల్‌ స్టాఫ్‌ గెరాసిమోవ్‌ స్పష్టం చేశారు. గతేడాది జూన్‌లో ప్యాంగ్‌యాంగ్‌ పర్యటనకు వెళ్లిన పుతిన్, కిమ్‌తో పలు ద్వైపాక్షిక ఒప్పందాలు కుదుర్చుకున్నారు. పలు ఒప్పందాలపై సంతకం చేశారు. యుద్ధం జరిగినప్పుడు రెండు దేశాలు సైనికపరంగా ఒకరికొకరు సహాయం చేసుకోవడానికి ముందుకు రావాలని హామీ ఇచ్చారు.
యుద్ధంలో పాల్గొనేందుకు దాదాపు 10,000-12,000 మంది సైనికులను రష్యాకు పంపినట్లు అమెరికా, దక్షిణ కొరియా, ఉక్రెయిన్ నిఘా అధికారులు తెలిపారు. కాగా, దక్షిణ కొరియా జాతీయ ఇంటెలిజెన్స్ సర్వీస్ (NIS) ప్రకారం జనవరిలో సుమారు 300 ఉత్తర కొరియా సైనికులు మరణించగా, మరో 2,700 మంది గాయపడ్డారని తెలిపింది. అయితే మృతులు, గాయపడిన వారి సంఖ్య దాదాపు 4,000 వరకు ఉంటుందని ఉక్రెయిన్ అధ్యక్షుడు వ్లాదిమిర్ జెలెన్ స్కీ అన్నారు. అయితే అమెరికా అంచనాల ప్రకారం ఆ సంఖ్య సుమారు 1,200గా ఉంది.
రష్యాకు యుద్ధం ఆపే ఉద్దేశం లేదనుకుంటా!- పుతిన్పై ట్రంప్ ఫైర్
