తిమ్మిర్లు ఎందుకు వస్తాయో మీకు తెలుసా? ఇలా చేస్తే ప్రాబ్లమ్ పక్కా సాల్వ్!

- నిద్రలో కాళ్లు తిమ్మిర్లు వస్తున్నాయా? - ఈ ప్రాబ్లమ్​కి ఇలా చెక్​ పెట్టండి!

Leg Cramps Reason and Cure: మనం ఎక్కువ సేపు ఒకే భంగిమలో కూర్చున్నా లేదా పడుకున్నా సరే.. కాళ్లు, చేతులు తిమ్మిర్లు వస్తుంటాయి. అయితే, ఇలా జరిగినపుడు లేచి కాస్త అటుఇటు కాసేపు నడవగానే ఈ తిమ్మిర్ల బాధలు తగ్గిపోతుంటాయి. ఇంకా కొందరిలో కూర్చునే, పడుకునే భంగిమలతో సంబంధం లేకుండానే కాళ్లలో తిమ్మిర్లు, చురుక్కుమనే పోట్లు వస్తుంటాయి. వస్తువులను గట్టిగా పట్టుకోలేక.. స్పర్శజ్ఞానం కూడా తగ్గుతుంది. మరి ఇలా ఎందుకు అవుతుంది? అసలు తిమ్మిర్లు ఎందుకు వస్తాయో ఇప్పుడు తెలుసుకుందాం.

మనం అడుగుతీసి అడుగు వేయాలన్నా, వస్తువులను పట్టుకోవాలన్నా, వస్తువు వేడిగా ఉందా? చల్లగా ఉందా? తెలియాలన్నా ఈ ఫెరిఫెరల్‌ నరాలు సరిగ్గా పనిచేయాలి. ఈ వ్యవస్థలో ఏ చిన్న సమస్య తలెత్తినా స్పర్శ తగ్గటం, తిమ్మిర్లు పట్టటం, చురుక్కుమనే లక్షణాలు కనిపిస్తాయి. ఫెరిఫెరల్ నరాలు దెబ్బతినటం వల్ల కనిపించే ఈ లక్షణాలనే ఫెరిఫెరల్‌ న్యూరోపతి అని పిలుస్తారు. ఎక్కువగా షుగర్‌ బాధితుల్లో ఈ న్యూరోపతి సమస్య కనిపిస్తుంది.

• కాళ్లు, చేతులు తిమ్మిర్లు రావడానికి చాలా కారణాలుంటాయని నిపుణులు అంటున్నారు. ముఖ్యంగా మన శరీరంలో పొటాషియం, మెగ్నీషియం, క్యాల్షియం, సోడియం వంటి ఎలక్ట్రోలైట్ల లోపం వల్ల తిమ్మిర్లు వచ్చే అవకాశం ఉంటుందని చెబుతున్నారు. (నేషనల్ హెల్త్ రిపోర్ట్ కోసం ఇక్కడ క్లిక్ చేయండి.)
• అలాగే ఎక్కువగా పని చేసినప్పుడు, వ్యాయామం చేసినప్పుడు అలసిపోయి కాళ్లు తిమ్మిర్లు వస్తుంటాయి.
• ఇంకా కొన్ని రకాల మందుల సైడ్​ ఎఫెక్ట్స్​ కారణంగా తిమ్మిర్ల సమస్య వస్తుంది.
• ముఖ్యంగా గర్భిణులలోనూ సహజంగానే కాళ్లు తిమ్మిర్లు వస్తుంటాయి.
• మధుమేహం, థైరాయిడ్​, మూత్రపిండాల వ్యాధి, నరాల సంబంధిత సమస్యల వల్ల నిద్రలో కాళ్లు తిమ్మిర్లు వస్తుంటాయని నిపుణులు చెబుతున్నారు.

రోజూ చెమట వచ్చేలా వ్యాయామం చేయాలి. ఇలా చేస్తే తిమ్మిర్లు రావడం చాలా వరకు తగ్గుతుందని నిపుణులు అంటున్నారు. 2015లో 'జర్నల్ ఆఫ్ క్లినికల్ అండ్ డయాగ్నోస్టిక్ రీసెర్చ్‌'లో ప్రచురించిన అధ్యయనం ప్రకారం.. క్రమం తప్పకుండా వ్యాయామం చేయడం వల్ల కాళ్ల తిమ్మిర్లు తగ్గుతాయని వెల్లడించారు. ఈ పరిశోధనలో దక్షిణాఫ్రికాలోని కేప్ టౌన్ విశ్వవిద్యాలయానికి చెందిన 'డాక్టర్​ మార్టిన్ పి. ష్వెల్నస్' పాల్గొన్నారు. ఇంకా నిద్రలో కాళ్లు తిమ్మిర్లు రాకుండా ఈ టిప్స్​ పాటించండి.

• రాత్రి సమయంలో కాళ్లు తిమ్మిర్లు వచ్చే వారు రోజూ ఎక్కువ నీటిని తాగాలి.
• మందు​ తాగడం వల్ల కాళ్లు తిమ్మిర్లు వచ్చే అవకాశం అధికంగా ఉంటుంది. అందుకే మద్యం సేవించకూడదు.
• కాళ్లు తిమ్మిర్లు ఎక్కువగా ఉంటే పడుకునే ముందు వస్త్రాన్ని వేడి నీటిలో ముంచి.. పిండిన తర్వాత తిమ్మిర్లు వచ్చే చోట రుద్దుకోవాలి. రోజూ ఇలా చేస్తే మంచి ఫలితం కనిపిస్తుంది.
• దీంతో పాటు పడుకునే ముందు కాళ్లకు మసాజ్​ చేసుకుంటే సమస్య తగ్గిపోతుంది.
• మన శరీరంలో పొటాషియం లోపిస్తే కూడా ఎక్కువగా కాళ్లు తిమ్మిర్లు వస్తుంటాయి. అందుకే పొటాషియం అధికంగా ఉండే బంగాళాదుంపలు, అరటిపండ్లు, నారింజ పండ్లను తరచూ తీసుకోవాలని నిపుణులు సలహా ఇస్తున్నారు.
• రాత్రి నిద్రపోయే భంగిమ సరిగ్గా ఉండేలా చూసుకోవాలి.
• రోజంతా ఉదయం ఎక్కువసేపు కూర్చున్నా లేదా నిలబడినా కాళ్లు తిమ్మిర్లు వచ్చే అవకాశం ఉంటుందని నిపుణులు అంటున్నారు. కాబట్టి ఎక్కువసేపు కూర్చునే వారు, గంటకు కనీసం 5 నిమిషాలైనా అలా నడవాలని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.