How Much Sugar to Consume in Daily Diet : రోజులో ఎంత చక్కెర తీసుకోవాలి? ఎంత పరిమాణంలో తీసుకోవాలి? అనే సందేహాలు చాలా మందికి వస్తుంటాయి. దీంతో ఏది తినాలన్నా భయపడుతుంటారు. అధికంగా చక్కెర తీసుకుంటే మన శరీరంలో ఎలాంటి మార్పులు వస్తాయి, రోజుకు ఎంత మోతాదులో చక్కర తీసుకుంటే మంచిదో ఇప్పుడు మనం తెలుసుకుందాం! చక్కెర శరీరానికి శక్తినిస్తుంది కానీ, అది అధికమైతే ఒబెసిటీ, డయాబెటిస్, గుండె జబ్బులతో పాటు మరికొన్ని ఆరోగ్య సమస్యలు తప్పవంటున్నారు నిపుణులు. రోజువారీ ఆహారంలో పరిమిత చక్కెర తీసుకోవాలని సూచిస్తున్నారు.
అనారోగ్య సమస్యలెన్నో!
సగటున రోజుకు 24-36 గ్రాముల చక్కెర తీసుకోవచ్చన్నది ప్రపంచ ఆరోగ్య సంస్థ సిఫారసు కానీ, ప్రపంచంలో చక్కెర ఉత్పత్తిలో రెండో స్థానంలో ఉన్న భారతీయలు వినియోగంలో మాత్రం ముందున్నారు. బిస్కెట్లు, కూల్‌డ్రింకులు, చాక్లెట్లు, స్వీట్లు, కేక్‌ల రూపంలో ఎక్కువగా తీసుకుంటున్నారు. శరీరానికి పెద్దగా అవసరం లేకున్నా అధికంగా తీసుకోవడం వల్ల మధుమేహం, ఒబేసిటీ బారిన పడుతున్నారు.
జీవనశైలి, ఆహార మార్పుల కారణంగా దేశంలో సగటున 11శాతం మంది ప్రజలు మధుమేహం బారిన పడుతున్నట్లు "ఐసీఎంఆర్‌-ఇండియా" అధ్యయనం వెల్లడించింది. పట్టణాల్లో 16శాతం, పల్లెల్లో 9శాతం మంది మధుమేహం బారిన పడుతున్నారని తెలిపింది. ఫలితంగా పక్షవాతం, గుండెజబ్బు, అధిక రక్తపోటు జబ్బులెన్నో ముంచుకొస్తున్నాయని చక్కెర వెనుకున్న చేదు నిజాలను వెల్లడింది.
ఎంత మొత్తంలో షుగర్ని తీసుకోవాలి :
రోజువారీ ఆహారంలో ఎంత మొత్తంలో షుగర్ తీసుకోవాలి అనే విషయమై ప్రపంచ ఆరోగ్య సంస్థ (WHO), అమెరికన్ హార్ట్ అసోసియేషన్ వంటి ఆరోగ్య సంస్థలు మార్గదర్శకాలను జారీ చేశాయి. మహిళలు రోజుకు 6 టీ స్పూన్లు (25 గ్రాములు) కంటే ఎక్కువ షుగర్, ప్రాసెస్ చేసిన చక్కెర పదార్థాలు తీసుకోవద్దని వెల్లడించాయి. పురుషులు రోజుకు 9 టీ స్పూన్ల (36 గ్రాములు) కంటే ఎక్కువగా తీసుకోవద్దని సృష్టం చేశాయి. పిల్లల వయస్సు, కేలరీల అవసరాలను బట్టి రోజుకు 6 టీ స్పూన్ల (25 గ్రాములు) వరకు తీసుకోవచ్చని పేర్కొన్నాయి.
బరువు పెరగడం : ప్రాసెస్ చేసిన షుగర్ పదార్థాల్లో కేలరీలు అధికంగా, పోషకాలు తక్కువగా ఉంటాయి. ఇలాంటి పదార్థాలు అతిగా తీసుకోవడం వల్ల దీర్ఘకాలంలో ఒబెసిటీకి దారితీస్తుందని National Library of Medicine వెల్లడించింది.
టైప్ 2 డయాబెటిస్ : శరీర అవసరాలకు మించి అదనంగా చక్కెర తీసుకోవడం వల్ల ఇన్సులిన్ పనితీరు దెబ్బతింటుందని నిపుణులు పేర్కొన్నారు. దీంతో పాటు డయాబెటిస్ ప్రమాదాన్ని పెంచుతుందని పేర్కొన్నారు.
గుండె ఆరోగ్య సమస్యలు : చక్కెర అధికంగా ఉన్న ఆహారం రక్తపోటు, కొలెస్ట్రాల్ స్థాయిలను పెంచుతుందని నిపుణులు అంటున్నారు. ఇది కాలక్రమేణా గుండె జబ్బులకు దోహదం చేస్తుందని Harvard Health Publishing వెల్లడించింది.
దంత క్షయం : అధిక షుగర్ పదార్థాలు కావిటీస్, చిగుళ్ల సమస్యలకు దారితీస్తాయని నిపుణులు చెబుతున్నారు.
షుగర్ వినియోగాన్ని తగ్గించడానికి చిట్కాలు :
లేబుళ్లను గమనించండి : ప్రాసెస్ చేసిన ఆహార ప్యాకేజింగ్ను ఒకసారి తనిఖీ చేయాలని నిపుణులు సలహా ఇస్తున్నారు. అందులో ఫ్రక్టోజ్, సుక్రోజ్ లేదా గ్లూకోజ్ స్థాయిలను పరిశీలించాలని సూచిస్తున్నారు.
చక్కెర పానీయాలను పరిమితం చేయడం : సోడాలు, శీతల పానీయాలకు బదులు నీరు, హెర్బల్ టీ లేదా చక్కెర స్థాయి తక్కువగా ఉన్న ఇతర పానీయాలను సేవించాలని నిపుణులు తెలియజేస్తున్నారు.
తాజా పండ్లు : ప్రాసెస్ చేసిన ఆహార పదార్థాలకు బదులు తాజా పండ్లు, కూరగాయలు, తృణధ్యానాలు తీసుకోవడం మంచిదని నిపుణులు వివరించారు.
సహజ స్వీటెనర్లు : తేనె, స్టెవియా లేదా ఖర్జూరంలో అదనపు కేలరీలు ఉండవు.
తగినంత మోతాదులో షుగర్ తీసుకోవడం శరీరాన్ని ఎలాంటి అనారోగ్య సమస్యలు తలెత్తవని, దీర్ఘకాలిక ఆరోగ్య సమస్యలను నివారించడానికి సరైన మొత్తంలో నియంత్రణ ముఖ్యమని సూచిస్తున్నారు. ప్రాసెస్ చేసిన చక్కెర పదార్థాలు తగ్గించాలని, రోజూ సమతుల్య ఆహారంతో పాటు పోషకాలు అధికంగా ఉండే పదార్థాలు తీసుకోవాలని చెబుతున్నారు.
NOTE : చక్కెర వాడకం గురించి ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
