Which Walk is Best for Weight Loss: ఏ వయసు వారైనా, ఎప్పుడైనా మొదలు పెట్టగలిగే సులభమైన వ్యాయామం వాకింగ్. ఫలితంగా చాలా మంది ఉదయం, సాయంత్రం నడకకు వెళ్తుంటారు. ముఖ్యంగా మనలో చాలా మంది బరువు తగ్గేందుకు వాకింగ్ చేస్తుంటారు. అయితే, బరువు అదుపులో ఉండేందుకు వేగంగా నడవాలా? లేక ఎక్కువ దూరం నడవాలా? అన్న ప్రశ్న చాలా మందిలో ఉంటుంది. ఈ నేపథ్యంలోనే ఏది మంచిదో ఇప్పుడు తెలుసుకుందాం.
వేగంగా నడవడం వల్ల ప్రయోజనాలు
గుండె జబ్బుల ముప్పును తగ్గుతుంది: బ్రిస్క్ వాకింగ్ చేయడం వల్ల గుండె సంబంధిత వ్యాధుల ముప్పు తగ్గుతుందని నిపుణులు చెబుతున్నారు. రక్త ప్రసరణను పెంచి, రక్తపోటును, కొలెస్ట్రాల్ను తగ్గిస్తుందని వివరిస్తున్నారు. న్యూ ఇంగ్లండ్ జర్నల్ ఆఫ్ మెడిసిన్లో ప్రచురితమైన అధ్యయనంలోనూ బ్రిస్క్ వాకింగ్ వల్ల ప్రయోజనాలు ఉన్నాయని తేలింది. బ్రిటిష్ జర్నల్ ఆఫ్ స్పోర్ట్స్ మెడిసిన్ ప్రకారం.. బ్రిస్క్ వాకింగ్ చేయడం వల్ల గుండె సమస్యలతో పాటు ఇతర వ్యాధులతో అకస్మాత్తుగా మరణించే ముప్పు తగ్గుతుందని వెల్లడైంది. (హార్వర్డ్ పబ్లిక్ హెల్త్ రిపోర్ట్ కోసం ఇక్కడ క్లిక్ చేయండి)
జీర్ణక్రియను మెరుగుపరుస్తుంది: హార్వర్డ్ పబ్లిక్ స్కూల్ ఆఫ్ హెల్త్ అధ్యయనం ప్రకారం.. వేగంగా నడవడం వల్ల బరువు అదుపులో ఉంటుందని తేలింది. మెల్లగా నడవడం కన్నా వేగంగా నడిస్తేనే ఎక్కువ కేలరీలు కరిగినట్లు వెల్లడైంది. ఫలితంగా జీర్ణక్రియ మెరుగుపడి అధిక బరువు తగ్గుతారని పేర్కొంది.
కండరాల ఆరోగ్యం బలోపేతం: వేగంగా నడవడం వల్ల కండరాల ఆరోగ్యం బలోపేతం అవుతుందని నిపుణులు చెబుతున్నారు. ముఖ్యంగా నడుము కింద భాగంలో కండరాలతో పాటు శరీర శక్తి పెరుగుతుందని వివరిస్తున్నారు. ఇంకా ఎముకలను దృఢంగా చేసి, కండరాల సామర్థ్యాన్ని పెంచుతుందని తెలిపారు.
ఎక్కువ దూరం నడవడం వల్ల ప్రయోజనాలు
గుండె ఆరోగ్యం మెరుగుపడుతుంది: ఎక్కువ దూరం నడవడం వల్ల గుండె కండరాలు దృఢంగా మారతాయని తెలిపారు. ఫలితంగా హార్ట్ రేట్ పెరిగి ఆక్సిజన్, పోషకాలు అవయవాలకు అందుతాయని చెబుతున్నారు.
ఊపిరితిత్తుల పనితీరును పెంచుతుంది: ఇలా వాకింగ్ చేయడం వల్ల ఊపిరితిత్తులు ఆక్సిజన్ తీసుకునే సామర్థ్యం పెరుగుతుందని తెలిపారు. ఫలితంగా కండరాలకు, అవయవాలకు ఆక్సిజన్ ఎక్కువ అందుతుందని వివరిస్తున్నారు.
హ్యాపీ హార్మోన్ల ఉత్పత్తి: వాకింగ్ చేయడం వల్ల మన శరీరంలో హ్యాపీ హార్మోన్లుగా పిలిచే ఎండార్ఫిన్లు, డొపమైన్లు లాంటివి ఉత్పత్తి అవుతాయని తెలిపారు. ఇవి మన ఒత్తిడి, ఆందోళనను తగ్గించి ప్రశాంతంగా ఉండేలా చేస్తాయని వివరిస్తున్నారు.
మంచి కొలెస్ట్రాల్ను పెంచుతుంది: ఎక్కువ దూరం నడవడం వల్ల శరీరంలో మంచి కొలెస్ట్రాల్ పెరిగేలా చేస్తుందని చెబుతున్నారు. ఎక్కువ వ్యాయామం చేయడం వల్ల శరీరంలో కొలెస్ట్రాలు కణాలు పెరుగుతాయని డ్యూక్ యూనివర్సిటీ అధ్యయనంలో తేలింది.
మధుమేహాన్ని అదుపులో ఉంచుతుంది: మధుమేహంతో బాధపడేవారు వారంలో కనీసం రెండు గంటల పాటు వాకింగ్ చేయడం వల్ల గుండె సమస్యలతో మరణించే అవకాశం తగ్గినట్లు అధ్యయనాల్లో తేలింది. ఏటూ కదలకుండా కూర్చున్న వారితో పోలిస్తే 3-4 గంటల పాటు వ్యాయామం చేసేవారితో ఈ ముప్పు ఇంకా తగ్గినట్లు వెల్లడైంది.
వేగంగా ఎక్కువ దూరం నడిస్తే ఏం జరుగుతుంది?
జర్నల్ ఒబెసిటీలో ప్రచురితమైన అధ్యయనం ప్రకారం.. తక్కువ కెలరీల ఆహారం తీసుకోవడంతో పాటు రోజూ 10వేల అడుగులు వేస్తే బరువు తగ్గడానికి ఎంతో ఉపయోగపడినట్లు తేలింది. ఇంకా ఇందులో 3,500 అడుగులు వేగంగా నడిస్తే మరింత ప్రయోజనం ఉంటుందని తెలిపింది. దీంతో పాటు సరైన ఆహార పదార్థాలు తీసుకోవడం కూడా ముఖ్యమని చెప్పింది. అయితే, కొందరిలో హర్మోన్ల సమస్యలు, మందుల వాడకం వల్ల బరువు తగ్గడంలో ఇబ్బందులు ఉంటాయని.. అలాంటి వారు వైద్యులను సంప్రదించాలని నిపుణులు సూచిస్తున్నారు. వేగంగా నడిచే సమయంలో చేతులతో పాటు శరీర భాగాలను ఎక్కువగా ఉపయోగిస్తుంటాం. ఇలా చేయడం వల్ల శరీర భాగాలు కదిలి కెలరీలు కరిగిపోతాయని నిపుణులు చెబుతున్నారు. ఫలితంగా గుండె ఆరోగ్యం మెరుగుపడి రక్త పోటు అదుపులో ఉంటుందని వివరిస్తున్నారు. ఇంకా కీళ్లు, ఎముకలు బలంగా కావడంతో పాటు రోగ నిరోధక శక్తి పెరుగుతుందని తెలిపారు.
అయితే, వాకింగ్ సమయం, దూరానికి మధ్య సంబంధం ఉన్నట్లు పరిశోధకులు చెబుతున్నారు. ఎక్కువ దూరం నడవడం వల్ల బరువు అదుపులో ఉంటుందని, ఊబకాయం ముప్పు తక్కువని చెబుతున్నారు. అయితే, వేగంగా నడవడం వల్ల సంపూర్ణ ఆరోగ్యంతో పాటు అనేక ప్రయోజనాలు ఉంటాయని తెలిపారు. బరువు అదుపులో ఉండేందుకు ఎక్కువ దూరంతో పాటు వేగంపైనా దృష్టి పెట్టాలని సూచిస్తున్నారు. ఇలా చేయడం వల్ల బరువు తగ్గడంతో పాటు మెరుగైన ఫలితాలు వస్తాయని అంటున్నారు. 2019లో Journal of the American Medical Association (JAMA)లో ప్రచురితమైన "Association of Step Volume and Intensity With Weight Loss in Overweight Adults" అనే అధ్యయనంలోనూ ఈ విషయం తేలింది. ఇంకా వెనక్కి నడవడం వల్ల మెదడు బాగా పనిచేస్తుందని, మెల్లగా నడవడం వల్ల కేలరీలు కరుగుతాయని వివరిస్తున్నారు. అదే వేగంగా వాకింగ్ చేయడం వల్ల త్వరగా బరువు తగ్గుతారని చెబుతున్నారు.
NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.
ఫిట్గా ఉండాలని ఎన్నో వర్కౌట్లు చేస్తున్నారా? సింపుల్గా పాకితే సరిపోతుందట!
