'కరిచిన పాము ఫొటో తీస్తే చాలు, చంపొద్దు'- 7వేల పాములను రక్షించిన రమేశ్- యువతకు స్పెషల్ క్లాసెస్!

Snake Rescuer Story : వర్షాకాలం రాగానే అనేక ప్రాంతాల్లో పాములు బుసలు కొట్టడం సర్వసాధారణం అవుతుంది. మృదువైన నేల, దట్టమైన చెట్లు, తేతో కూడిన వాతావరణంలో, పాములు బయటకు వచ్చి పొలాలు, ఇళ్లు, పాఠశాలలు వంటి వివిధ ప్రాంతాల్లో కనిపిస్తుంటాయి. దీంతో భయంతో ప్రజలు వాటిని చంపేందుకు చేస్తున్నారు. కానీ ఝార్ఖండ్​లోని రాంచీ నివాసి అయిన రమేశ్ కుమార్ మహతో ఆ భయాన్ని అంతం చేయడానికి ప్రచారంలో నిమగ్నమై ఉన్నారు.

ఇప్పటివరకు 7వేల పాములను!
రమేష్ గత 20 సంవత్సరాలుగా పాములను రక్షించి సురక్షితమైన అడవుల్లో వదిలివేస్తున్నారు. ఇప్పటివరకు 7000 కంటే ఎక్కువ పాములను రక్షించారు. పాముకాటు బాధితులను వెంటనే ఆసుపత్రికి తీసుకెళ్లడం ద్వారా చాలా మంది ప్రాణాలను కాపాడారు. భయంతో పాములను చంపకూడదని చెబుతుంటారు. వాటిని అర్థం చేసుకోవాలని అంటుంటారు.

రమేశ్ కుమార్ మహతో (ETV Bharat)

ఆ సంఘటనతో!
2004లో ఓ రోజు తాను పొలంలో పనిచేస్తున్నప్పుడు అకస్మాత్తుగా ఒక పాము కనిపించిందని, భయంతో దానిని కర్రతో చంపానని రమేశ్ చెప్పారు. కొంత సమయం తర్వాత, పాము చనిపోయిందని భావించి దాన్ని బయటకు విసిరేసేందుకు చూశానని తెలిపారు. ఆ తర్వాత పాము ఇంకా బతికే ఉందని, నొప్పితో విలవిలలాడుతోందని గ్రహించినట్లు పేర్కొన్నారు. ఆ సంఘటన తన జీవితంలో ఒక మలుపుగా మారిందని అన్నారు.

రోజూ 5-6 కాల్స్
ఆ రోజు తాను ఒక అమాయక జీవిని చంపడానికి ప్రయత్నించానని మొదటిసారిగా అనిపించిందని రమేశ్ తెలిపారు. అప్పుడు తాను మళ్లీ ఎప్పుడూ పామును చంపకూడదని నిర్ణయించుకున్నట్లు చెప్పారు. దాని బదులుగా ప్రజలకు వివరిస్తున్నట్లు పేర్కొన్నారు. పామును పట్టుకోవడం కంటే సరైన స్థలంలో వదిలివేయడం చాలా కష్టమని తెలిపారు. తనకు ప్రతిరోజూ సగటున 5-6 కాల్స్ వస్తున్నాయని అన్నారు.

ఎక్కడో ఒక పాము పాఠశాలలోకి ప్రవేశించిందని, ఎక్కడో ఒక ఇంట్లో ఒక నాగుపాము కనిపిస్తుందని, ఎక్కడో ఒక కాలువలో ఒక కొండచిలువ దాక్కుంటుందని చెబుతుంటారని అన్నారు. ఎటువంటి భద్రతా వ్యవస్థ లేదా ప్రభుత్వ సహాయం లేకుండా అతను స్వయంగా అక్కడికి చేరుకుంటానని తెలిపారు. పట్టుకున్న తర్వాత పాములను ఒక ప్లాస్టిక్ పెట్టెలో ఉంచి, దట్టమైన అడవుల వైపునకు వెళ్తానని పేర్కొన్నారు.

80% పాములను చంపాల్సిన అవసరం ఉండదు
మానవ నివాసాలు లేని చోట పామును విడుదల చేసేలా చూస్తానని తెలిపారు. అది మళ్లీ సహజ జీవితాన్ని గడపగలదని నిర్ధరించి వదులుతానని అన్నారు. ఏ పాము విషపూరితమైనది, ఏది కాదో ప్రజలు అర్థం చేసుకుంటే, 80% పాములను చంపాల్సిన అవసరం ఉండదని రమేశ్ తెలిపారు. ఝార్ఖండ్‌లో దాదాపు 26 రకాల పాములు కనిపిస్తాయని ఆయన చెప్పారు. వీటిలో 5 మాత్రమే విషపూరితమైనవని పేర్కొన్నారు.

వీటిలో ఇండియన్ కోబ్రా, కామన్ క్రైట్, బ్యాండెడ్ క్రైట్, రస్సెల్ వైపర్ (సెర్చండా), పిట్ వైపర్ (గ్రీన్, వైట్ లిప్డ్, వెదురు) ఉన్నాయని అన్నారు. మరోవైపు, ధామిన్, రెడ్ సాండ్ బోవా, రాట్ స్నేక్, చెకర్డ్ కీల్‌బ్యాక్ మొదలైన ఇతర పాములు చాలా ప్రయోజనకరంగా ఉంటాయని తెలిపారు. విషపూరితం కాదని చెప్పారు. పొలాల్లో ఎలుకలు, కీటకాలను తినడం ద్వారా అవి రైతులకు సహాయం చేస్తాయని అన్నారు.

పాము ఫొటో తీస్తే చాలు- చంపొద్దు!
దేశంలో ప్రతి సంవత్సరం 50 వేలకు పైగా ప్రజలు పాము కాటు కారణంగా మరణిస్తున్నారని, అందులో ఝార్ఖండ్ నుంచి సగటున 1000 కంటే ఎక్కువ మరణాలు నమోదవుతున్నాయని తెలిపారు. ఆలస్యమైన చికిత్స కారణంగా ఎక్కువ మరణాలు సంభవిస్తాయని అన్నారు. పాము కాటుకు గురైన సందర్భంలో, బాధితుడిని ప్రశాంతంగా ఉంచాలని, కరిచిన శరీర భాగాన్ని కదలకుండా ఉంచాలని సూచించారు. బాధితుడిని వీలైనంత త్వరగా సమీపంలోని ఆసుపత్రికి తీసుకెళ్లమని, వీలైతే పాము చిత్రాన్ని తీయండని సూచించారు.

రమేశ్ కుమార్ మహతో (ETV Bharat)

కానీ దానిని పట్టుకోవడానికి ప్రయత్నించవద్దని కోరారు. పాము కాటు వేసినప్పుడు, కొంతమంది బ్లేడుతో కోత పెట్టడం ప్రారంభిస్తారని అన్నారు. అలా ఎప్పుడూ చేయవద్దని సూచించారు. నోటితో విషాన్ని పీల్చడానికి ప్రయత్నించవద్దని తెలిపారు. రమేశ్ ఇప్పుడు యువతకు శిక్షణ ఇస్తున్నారు. వర్క్ షాప్​లు నిర్వహించి ప్రాథమిక సమాచారం అందిస్తున్నారు. మానవ ప్రాణాలను కాపాడటమే కాకుండా వన్యప్రాణుల సమతుల్యతను కూడా కాపాడాలాని అంటున్నారు.

పాములను చంపడం చట్టవిరుద్ధం!
పాములను చంపడం చట్టవిరుద్ధమని రమేశ్ తెలిపారు. భారతదేశంలో ఈ నేరం వన్యప్రాణుల రక్షణ చట్టం 1972 కిందకు వస్తుందని, పట్టుబడితే 3 సంవత్సరాల వరకు జైలు శిక్ష లేదా జరిమానా లేదా రెండూ విధించవచ్చని చెప్పారు. పాములు సహజ సమతుల్యతలో ముఖ్యమైన పాత్ర పోషిస్తాయని అన్నారు. అనేక రకాల మందులు, టీకాలు వాటి విషం నుంచి తయారవుతాయని తెలిపారు. ఎలుకల సంఖ్యను నియంత్రించడం ద్వారా అవి పంటలను రక్షిస్తాయని చెప్పారు.