Pakistan Youth Died In Tamilnadu: తమిళనాడు చెన్నైలోని ఓ ప్రవేటు ఆస్పత్రిలో చికిత్సపొందుతూ ఒక పాకిస్థానీ యువకుడు మరణించాడు. అతడి మృతదేహానికి పోస్ట్ మార్టం నిర్వహించి సోమవారం శ్రీలంక ఎయిర్లైన్స్ ద్వారా కొలొంబోకు పంపించారు. అనంతరం అక్కడి నుంచి మంగళవారం పాకిస్థాన్లోని లాహోర్కు పంపించినట్లు ఇమ్మిగ్రేషన్ అధికారులు తెలిపారు.
ఏప్రిల్ 22న పహల్గాంలో జరిగిన ముష్కరులు చేసిన పాశవిక దాడిలో 26మంది మృతి చెందారు. పలువురు గాయపడ్డారు. ఈ ఘటనపై భారత్ తీవ్ర స్థాయిలో స్పందించింది. భారత్లో ఉన్న పాకిస్థానీయులందరూ వెంటనే దేశం విడిచి వెళ్లాలని, వైద్య చికిత్స కోసం వచ్చిన వారు ఏప్రిల్ 29నాటికి వెళ్లాలని కేంద్ర ప్రభుత్వం ఇటీవల ఆదేశాలు ఇచ్చింది. ఈ క్రమంలో కేంద్ర నిఘా, ఇమ్మిగ్రేషన్ అధికారులు వైద్య వీసాలతో సహా వివిధ వీసాలపై భారతదేశానికి వచ్చిన పాకిస్థానీలను లెక్కించి వారి స్వదేశానికి పంపించే ప్రక్రియలో నిమగ్నమై ఉన్నారు.
ఇలా చనిపోయాడు!
ఈ క్రమంలో పాకిస్థాన్కు చెందిన సయ్యద్ ఆరిఫ్(23) అనే యువకుడు ఊపిరితిత్తులు, గుండె సమస్యలు ఉండటం వల్ల వైద్య వీసాపై చెన్నైకి వచ్చాడు. గత రెండు నెలలుగా నగరంలోని అమింకరై ప్రాంతంలోని ఓ ప్రైవేటు ఆస్పత్రిలో చికిత్స పొందుతున్నాడు. ఈ నేపథ్యంలో కేంద్ర ఆదేశాల మేరకు ఇమ్మిగ్రేషన్ అధికారులు పోలీసుల సహాయంతో అతడిని తిరిగి పాకిస్థాన్కు పంపించే ప్రయత్నం చేశారు. ఈ నేపథ్యంలో చికిత్స లేకపోవడం వల్ల ఏప్రిల్ 25 ఆ యువకుడు చనిపోయినట్లు ఆస్పత్రి యాజమాన్యం సోమవారం అధికారిక ప్రకటన విడుదల చేసింది. అనంతరం ఆ యువకుడి మృతదేహాన్ని అతడితో సహాయంగా వచ్చిన ఇద్దరు పాకిస్థానీలతో సోమవారం తెల్లవారు జామున లాహోర్కు పంపించారు.
ఇదిలా ఉండగా, అధునాతన వైద్యం కోరుకునే పాకిస్థానీయులకు చెన్నై ఒక గమ్యస్థానంగా మారింది. దీర్ఘకాలిక గుండె జబ్బుతో బాధపడుతున్న 19 ఏళ్ల పాకిస్థానీ యువతికి గతేడాది జనవరిలో ఇదే ఆస్పత్రిలో గుండె మార్పిడి జరిగింది. కరాచీకి చెందిన ఆ బాలిక ఆపరేషన్ ఖర్చును ఆస్పత్రి, NGO భరించాయి.
'ఉగ్రదాడి కారకులు తగిన మూల్యం చెల్లించుకోక తప్పదు'- ప్రధాని మోదీ వార్నింగ్
పహల్గాం ఉగ్రదాడి: కర్త, కర్మ, క్రియ 'హఫీజ్ సయీద్'- పాక్ ఆర్మీ కనుసన్నల్లో!
