How to Make Udupi Sambar at Home: దక్షిణ భారతదేశంలోని వివిధ రాష్ట్రాల్లో సాంబార్ రుచి.. ప్రాంతాన్ని బట్టి మారుతుంటుంది. అయితే, అందరూ ఇష్టపడే, అందరికీ నచ్చే సాంబార్ ఏదైనా ఉందంటే.. అది ఉడిపి సాంబార్ మాత్రమే! మనలో చాలా మంది ఈ సాంబార్తో వేడివేడి అన్నం, ఇడ్లీ, వడలు తినడానికి ఎంతో ఇష్టపడతారు. ఇక చాలా మందికి దీన్ని ఇంట్లో తయారు చేయాలని ఉంటుంది. కానీ ఆ ప్రాసెస్ ఏంటో తెలియక చేయడం మానేస్తారు. అయితే ఇకపై అలాంటి అవసరం లేదు. ఎందుకంటే మేము చెప్పే ఈ పద్ధతి ఫాలో అయితే.. కర్ణాటక స్పెషల్ డిష్ ఉడిపి సాంబార్ ఇంట్లోనే రెడీ అయిపోద్ది. మరి ఆ ప్రాసెస్ ఏంటో చూద్దామా..
కావాల్సిన పదార్థాలు :
- కంది పప్పు - కప్పు
- క్యారెట్ ముక్కలు - కప్పు
- గుమ్మడికాయ ముక్కలు - రెండు కప్పులు
- మునగకాయ ముక్కలు - కప్పు
- వంకాయలు - 3
- పచ్చిమిర్చి - 5
- నూనె - 2 టేబుల్స్పూన్లు
- ఉప్పు - రుచికి సరిపడా
- చింతపండు- 50 గ్రాములు
- దాల్చిన చెక్క- కొద్దిగా
- శనగపప్పు- టేబుల్స్పూన్
- మిరియాలు- టేబుల్స్పూన్
- మినపప్పు- టేబుల్స్పూన్
- ఎండు మిరపకాయలు -10
- మెంతులు- టేబుల్స్పూన్
- జీలకర్ర - టేబుల్స్పూన్
- బెల్లం- అరకప్పు
- పసుపు- టీ స్పూన్
- కొత్తిమీర - కొద్దిగా
- నీరు సరిపడా
- ఎండు కొబ్బరి తరుము - అరకప్పు
తాళింపు కోసం
- కొబ్బరి నూనె - 1 టేబుల్ స్పూన్
- ఆవాలు - 1 టీ స్పూన్
- జీలకర్ర - 1 టీ స్పూన్
- కరివేపాకు - 3 రెమ్మలు
- ఇంగువ పొడి - టీ స్పూన్
- ఎండుమిర్చి - 3
ఉడుపి సాంబార్ తయారు చేసే విధానం :
- ముందుగా కందిపప్పును శుభ్రంగా కడిగి అందులో కొద్దిగా పసుపు వేసి మెత్తగా ఉడికించి పక్కన పెట్టుకోవాలి.
- అలాగే చింతపండు రసం తయారు చేసుకున్న తర్వాత.. దానిని స్టౌపై పెట్టాలి. ఇక్కడ మనం సాంబార్ పుల్లగా లేకుండా చూసుకోవాలి. మనకు ఎంత సాంబార్ కావాలో అందుకు తగినట్లుగా చింతపండు, నీళ్లను తీసుకోవాలి.
- ఇందులోకి పచ్చిమిర్చి, వంకాయలు, టమాటాలు, క్యారెట్, మునక్కాడలు, గుమ్మడికాయ ముక్కలు, బెల్లం, కొద్దిగా ఉప్పు వేసి 15 నిమిషాలు మూత పెట్టి ఉడికించుకోవాలి.
- ఇప్పుడు మరొక పాన్లో కొద్దిగా ఆయిల్ వేసి దాల్చిన చెక్క, శనగపప్పు, మిరియాలు, ఎండు మిరపకాయలు, మినపప్పు, ధనియాలు, మెంతులు, జీలకర్ర వేసి దోరగా వేయించుకోవాలి. తర్వాత ఈ మిశ్రమాన్ని చల్లార్చి మిక్సీ జార్లో, కొబ్బరి తురుము వేసి నీళ్లు పోసుకుంటూ పల్చగా గ్రైండ్ చేసుకోవాలి.
- ఇప్పుడు ఉడుకుతున్న చింతపండు రసంలో కొద్దిగా పసుపు వేయాలి. తర్వాత ఉడికించుకున్న కందిపప్పు మిశ్రమం, రెడీ చేసుకున్న కొబ్బరి పేస్ట్ వేసి బాగా కలపాలి. సాంబార్ చిక్కగా ఉంటే కొన్ని నీళ్లు పోసుకోండి. అలాగే రుచికి సరిపడా ఉప్పు కూడా వేసుకోండి. తర్వాత సగం మూత పెట్టి ఉడికించుకోండి.
- ఈలోపు తాళింపు కోసం పాన్లో కొబ్బరి నూనె వేసిన తర్వాత ఆవాలు, కరివేపాకు, ఇంగువ, ఎండుమిర్చి, జీలకర్ర వేసుకుని సాంబార్లో కలుపుకుంటే సరిపోతుంది.
- తర్వాత స్టౌ ఆఫ్ చేసుకుని కొద్దిగా కొత్తిమీర చల్లుకుంటే సరిపోతుంది. ఎంతో రుచికరమైన ఉడిపి స్టైల్ సాంబార్ రెడీ.
- ఇక్కడ మనం చేసింది ప్యూర్ టిఫెన్ స్టైల్ ఉడిపి సాంబార్.. మీరు అన్నంలోకి చేసుకోవాలనుకుంటే.. బెల్లం, దాల్చిన చెక్కను తక్కువగా వేసుకోవాలి.
- నచ్చితే మీరు కూడా ఈ సాంబార్ ట్రై చేయండి.
ఇవి కూడా చదవండి :
కర్ణాటక స్పెషల్ బిసిబెలా బాత్ను వండేయండిలా!
అతిథులు మెచ్చే కల్యాణ రసం.. కమ్మగా చేసేయండిలా
నిమిషాల్లో ప్రిపేర్ అయ్యే ఆంధ్ర స్టైల్ "పప్పు చారు" - ఇలా చేస్తే తినడమే కాదు తాగేస్తారు కూడా!
