పిల్లలు పుట్టడంలేదని కోడలిని రాయితో కొట్టి చంపిన అత్తామామలు- పక్కా ప్లాన్​తో దారుణ హత్య

తలపై రాయితో కొట్టి, ఆపై మెడకు చీరను బిగించి హత్య- సంతానం కలగడం లేదని కోడలి హత్య

Karnataka Daughter In Law Murder : పెళ్లి జరిగి ఏళ్లు గడుస్తున్నా సంతానం కలగడం లేదనే కారణంతో కోడలిని అత్యంత దారుణంగా హతమార్చారు అత్తామామలు. కోడలి తలపై బండరాయితో కొట్టి ఆపై మెడకు చీర బిగించి ఊపిరాడకుండా చేసి హత్య చేశారు. ఈ దారుణ ఘటన కర్ణాటకలో ఆలస్యంగా వెలుగులోకి వచ్చింది.

పోలీసులు​ తెలిపిన వివరాల ప్రకారం, బెళ​గావి జిల్లాలోని అథాని తాలుక్​ మలబాద్​ గ్రామానికి చెందిన సంతోష్​ హొనకాండే, రేణుక దంపతులు. వివాహం జరిగి చాలా సంవత్సరాలు గడిచిన వీరికి సంతానం కలగలేదు. దీంతో తరచూ వీరిద్దరితో పాటు అత్తామామలతో గొడవలు జరిగేవి. ఈ క్రమంలో కోడలిని అంతమొందించాలని భర్త అతడి తల్లిదండ్రులు భావించారు. ఈ నెల 17న రాత్రి ఎనిమిది గంటల సమయంలో రేణుకను ఆమె అత్తామామలు కామన్నా హొనకాండే, జయశ్రీలు కలిసి వారి బైక్​పై ఎక్కించుకొని మలబాద్​ గ్రామ సమీపానికి తీసుకెళ్లారు. అక్కడ మొదట బండరాయితో తలపై మోదారు. తర్వాత చీర మెడకు బిగించి ఊపిరాడకుండా చేసి చంపేశారని ఎస్​పీ బీమ్​శంకర్​ గులేద్​ తెలిపారు.

ఆ తర్వాత బైక్​ చట్రాల్లో చీర ఇరుక్కొని చనిపోయిందని అందరిని నమ్మించే ప్రయత్నం చేశారని పోలీసులు చెప్పారు. ఇందుకోసం హత్య జరిగిన ప్రాంతం నుంచి కొంత దూరం ఈడ్చుకెళ్లి బైక్​పై నుంచి పడిపోయినట్లుగా ప్రమాద దృశ్యాలు సృష్టించారని వెల్లడించారు. ఈ హత్యలో భర్త హస్తం కూడా ఉందని తెలియడంతో వారి అత్తామామలతో పాటు భర్తను కలిపి అరెస్ట్ చేసి జుడిషియల్​ కస్టడీకి పంపినట్లు ఎస్​పీ బీమ్​శంకర్​ గులేద్​ తెలిపారు.

వివాహితను గొంతు కోసి దారుణ హత్య
ఇంట్లో ఒంటరిగా ఉన్న ఓ వివాహితను గుర్తు తెలియని వ్యక్తులు హత్య చేశారు. ఎవరూ లేని సమయంలో లోపలికి ప్రవేశించి గొంతుకోసి పరారయ్యారు. ఈ ఘటన మహారాష్ట్రలోని నవీ ముంబయిలో జరిగింది. పోలీసులు తెలిపిన వివరాల ప్రకారం ఉల్వా ప్రాంతంలో నివాసం ఉంటున్న వివాహితను దుండగులు గొంతుకోసి హతమార్చారు. భర్త ఫిర్యాదు మేరకు దీనిపై పోలీసులు పలు సెక్షన్ల కింద కేసు నమోదు చేసి దర్యాప్తు ప్రారంభించారు.