90శాతం వైకల్యం- నడవడం, మాట్లాడడం రాకపోయినా చెస్​లో అద్భుతాలు!

Disabled Man Playing Chess : అతడి వయసు 25 ఏళ్లు. దాదాపు 90శాతం వైకల్యం. నడవడం, మాట్లాడడం కూడా రాదు. ఒక చేయి సహాయంతో చిన్న చిన్న పనులు మాత్రమే చేసుకోగలడు. అయినా సరే ఇవేవీ తన ప్రతిభకు అడ్డం కాదని నిరూపించాడు. కుర్చీలోనే ఉంటూ చెస్​లో అద్భుతంగా రాణిస్తున్నాడు. మెదుడుకు పదును పెడుతూ చందరంగంలో అదరగొడుతున్నాడు. ఇంతకీ ఎవరా యువకుడు?

దేశ రాజధాని దిల్లీలోని శాలిమార్​ గార్డెన్​లో మనోజ్​ గౌతమ్​ అనే వ్యక్తి తల్లిదండ్రులతో పాటు భార్యాపిల్లలతో కలిసి ఉంటున్నాడు. ఇందులో ఇద్దరు అమ్మాయిలు కాగా ఒక అబ్బాయి. అయితే, అబ్బాయి వైభవ్​ 90శాతం వైకల్యంతో బాధపడుతున్నాడు. నడవడం, మాట్లాడడం కూడా రావు. ఒక చేయి కాస్త పనిచేస్తుండడం వల్ల చిన్న చిన్న పనులను చేసుకుంటాడు. వైభవ్​ పనులకు కుటుంబ సభ్యులు సహకారం అందిస్తూ అండగా ఉంటున్నారు.

చెస్ ఆడుతున్న వైభవ్​ (ETV Bharat)

టైమ్​పాస్​కు చెస్
ఏడేళ్ల క్రితం తన తండ్రి మనోజ్​ గౌతమ్​తో కలిసి టైమ్​పాస్​కు చెస్ ఆడడం ప్రారంభించాడు వైభవ్. ఆ తర్వాత అతడికి ఇదే అలవాటుగా మారిపోయింది. ఎవరూ శిక్షణ ఇవ్వకపోయినా తరచూ ప్రాక్టీస్ చేస్తుండేవాడు. ఆన్​లైన్​ వేదికలను ఉపయోగించి దాదాపు 7-8 గంటల పాటు చెస్ ఆడుతుండేవాడు. మొబైల్​ను ఉపయోగించి ప్రపంచంలోని అనేక మంది ఆటగాళ్లతో పోటీ పడుతుంటాడు. ఇలా చెస్​లో నైపుణ్యం సంపాదించాడు.

తండ్రితో చెస్ ఆడుతున్న వైభవ్​ (ETV Bharat)

సాధారణ పిల్లలతో పోటీపడి మొదటి స్థానం
ఈ క్రమంలోనే ఒకసారి పాఠశాలలో చెస్​ పోటీలు నిర్వహించగా, సాధారణ పిల్లలతో పోటీపడి మొదటి స్థానం సంపాదించాడు. ఆ తర్వాత క్రమక్రమంగా జాతీయ, అంతర్జాతీయ టోర్నమెంట్లకు వెళ్లడం ప్రారంభించాడు. సాధారణ ఆటగాళ్లతో పోటీ పడి మరీ అంతర్జాతీయ గ్రాండ్ మాస్టర్​ టోర్నమెంట్​లో పాల్గొని ప్రతిభ కనబరిచాడు. ఉదయ్​పుర్​లో జరిగిన పోటీలో పాల్గొని మొదటి స్థానంతో పాటు రూ.1.11లక్షల బహుమతిని సాధించాడు. ప్రస్తుతం జూన్​లో ఆంధ్రప్రదేశ్​ విజయనగరంలో, జూలైలో గోవాలో జరగనున్న చెస్ పోటీలకు సిద్ధమవుతున్నాడు.

వైభవ్​ సంపాదించిన పతకాలు (ETV Bharat)

వైభవ్​ సంపాదించిన పతకాలు (ETV Bharat)

వైభవ్​ సంపాదించిన పతకాలు (ETV Bharat)

"ప్రతి పిల్లవాడికి ఏదో ఒక రంగంలో ప్రతిభ ఉంటుంది. వారు ఎంచుకున్న వాటికి మనం అండగా ఉండాలి. వారి శక్తి సామర్థ్యాలు గుర్తించి మద్దతు తెలపాలి. మీరు చేసే చిన్న సహాయమే వారిని ఉన్నత స్థాయిలో నిలిపేలా చేస్తుంది. అందుకు వైభవ్​ జీవితమే ఊదాహారణ. అతడి శరీరంలో బలహీనత ఉంది కానీ ధైర్యంలో లేదు." అని వైభవ్ తల్లిదండ్రులు చెబుతున్నారు.

వైభవ్​ (ETV Bharat)

మహిళకు రోబోటిక్ సర్జరీ - ప్రపంచంలోనే అతిపెద్ద అడ్రినల్ కణితి తొలగింపు

పుట్టిన రోజునాడే మరణించిన బైకర్- అంత్యక్రియలకు హాజరైన బైక్! కుటుంబసభ్యులు ఎమోషనల్