அரசு உதவினால் உலக சாதனை படைப்பேன்: பொறியியல் மாணவரின் நம்பிக்கை!

author img

By

Published : Aug 10, 2021, 10:42 PM IST

அரசு உதவினால் உலக சாதனை படைப்பேன்

சிறு வயதில், நாக்கால் மூக்கைத் தொடும் பந்தையத்தை நாம் அனைவரும் விளையாடியிருப்போம். பெரும்பாலனவர்கள் அந்த பந்தையத்தில் தோல்வியையே தழுவி இருப்போம். அதிகமுறை நாக்கால் மூக்கைத் தொட்டு சாதனை படைத்ததுடன், தன் முந்தைய சாதனையை தானே முறியடித்து கிராண்ட் மாஸ்டர் பட்டத்தையும் வென்றுள்ளார் விருதுநகரைச் சேர்ந்த கல்லூரி மாணவர் பிரவீன்.

விருதுநகர்: "சின்ன வயசுல, பள்ளிக்கூடத்துல என்னை விட வயசுல மூத்த அண்ணங்க, நீளமான என் நாக்கை நீட்டி வேடிக்கை காட்டச் சொல்லி கேட்பாங்க. அவங்க வாங்கித் தர்ற மிட்டாய்க்காக நானும் அடிக்கடி அதைச் செய்வேன். இப்போ யோசிச்சா அவங்க தான் எனக்குள்ள இருந்த திறமையை கண்டுபிடிச்சவங்கனு தோணுது" வேடிக்கையாக பேசத் தொடங்கும் பிரவீன் தான் இந்தியாவின் நீளமான நாக்கு உடையவர். இவர் தன் நீளமான நாக்கினால் பல சாதனைகளைச் செய்து வருகிறார்.

விருதுநகர் மாவட்டம், சிவகாசி அருகே உள்ள திருத்தங்கல் பழைய பால்பண்ணைத் தெருவில் வசித்து வரும் நடுத்தரக் குடும்பத்தைச் சேர்ந்த கல்லூரி மாணவர் பிரவீன். அப்பா காளிராஜன், அம்மா கமலா, தம்பி தீபக். பிரவீன் தனியார் பொறியியல் கல்லூரியில், இயந்திரவியல் துறையில் இரண்டாம் ஆண்டு படித்து வருகிறார்.

சிறுவயதில் தன்னைவிட மூத்த அண்ணன்களை மகிழ்விக்க நாக்கை நீட்டி வித்தை செய்திருந்தாலும், பிரவீன் அதைப் பெரிதாக எடுத்துக் கொள்ளவில்லை. கல்லூரி வந்ததும் நீளமான தன் நாக்கினைக் கொண்டு நண்பர்களை மகிழ்விப்பதைத் தாண்டி, வேறு ஏதாவது சாதிக்க வேண்டும் என்ற உத்வேகம் அவருக்கு உருவாகியிருக்கிறது. விளைவு சாதனை மேல் சாதனை.

தன்னைத் தேடிக் கண்டடைதல்

"அடிப்படையில் நான் ஒரு பாக்ஸர். மாநில அளவில் 27 போட்டிகளில் விளையாடியிருக்கிறேன். நான் கொஞ்சம் உயரம் குறைவுங்கிறதால என்னால் அதில் சாதிக்க முடியவில்லை. அதனால சோர்ந்து போய் இருக்கும் போது தான், இயற்கையாகவே நீளமான நாக்கு இருக்கும் நாம் ஏன் அதைவைத்து சாதனை செய்யக் கூடாது எனத் தோன்றியது. நாக்கைக் கொண்டு என்ன என்ன சாதனைகள் செய்யப்பட்டிருக்கிறன எனத் தேடிப் பார்த்து, அதன்படி பயிற்சி செய்ய ஆரம்பித்தேன்" தோல்வியில் இருந்து பினீக்ஸ் பறவையாய் தான் மீண்ட கதையை விவரிக்கிறார் பிரவீன்.

கடந்த 2013ஆம் ஆண்டு, ஒரு நிமிடத்தில் 110 முறை நாக்கைக் கொண்டு மூக்கைத் தொட்டு, உத்திரப்பிரதேச மாநிலம் பார்லி நகரைச் சேர்ந்த அமிட் அகர்வாலின், நிமிடத்திற்கு 97 தடவை நாக்கைக் கொண்டு மூக்கைத் தொட்ட சாதனையை முறியடித்தார் பிரவீன்.

அதேபோல, கையை மடித்து வைத்து முழங்கை முட்டியை நாக்கைக் கொண்டு நிமிடத்திற்கு 142 முறை தொட்டு, பஞ்சாப் மாநிலம் அமிர்தசரஸ் பகுதியைச் சேர்ந்த, மேகா குப்தா என்ற பெண்ணின், நிமிடத்திற்கு 140 முறை என்ற சாதனையை முறியடித்தார். இந்த இரண்டு சாதனைகளும் இந்தியன் புக் ஆப் ரெக்கார்ட்ஸில் இடம் பெற்றது.

நாக்கின் நீளம் சராசரியாக ஆண்களுக்கு 8.5 சென்டி மீட்டரும், பெண்களுக்கு 7.9 சென்டி மீட்டர் நீளம் இருக்கும். பிரவீனின் நாக்கின் நீளமோ 10.8 சென்டி மீட்டர் இருக்கிறது.

இந்தியாவின் நீளநாக்கு மனிதர்

இந்திய அளவில் சாதித்த பிரவீன் அடுத்து ஆசிய அளவில் தன் முயற்சியை விரிவுபடுத்தியுள்ளார். விளைவு, நிமிடத்திற்கு 219 முறை நாக்கைக் கொண்டு மூக்கைத் தொட்டு, தன் முந்தைய சாதனையான நிமிடத்திற்கு 110 முறை என்பதனை முறியடித்து, புதிய சாதனை படைத்தார். இவரது இந்த சாதனை ஏசியன் புக் ஆப் ரெக்கார்ட்ஸில் இடம் பிடித்ததுடன், பிரவீனுக்கு கிராண்ட் மாஸ்டர் பட்டத்தையும் பெற்றுத் தந்தது.

அரசு உதவினால் உலக சாதனை படைப்பேன்

நாக்கைக் கொண்டு மூக்கைத் தொடுவது, கையை மடக்கி வைத்து முட்டியைத் தொடுவது என்ற வழக்கமான விஷயங்களைத் தாண்டி வேறு ஏதாவது செய்யத் துடித்தது பிரவீனின் மனது.

தன் அடுத்த பாய்ச்சலுக்குத் தயாரான பிரவீன் இந்த முறை நாக்கால் எழுத்துக்களை எழுத பயிற்சி மேற்கொண்டார். இந்த முயற்சியையும் சாதனையாக மாற்றிக் காட்டிய அவர், ஒரு மணி நேரம், 22 நிமிடம், 26 வினாடிகளில் தமிழின் 247 எழுத்துக்களை எழுதி, இந்தியன் புக் ஆப் ரெக்கார்ட்ஸில் மீண்டும் இடம் பிடித்தார். இந்த சாதனையால், இந்தியாவின் நீளமான நாக்கினை உடையவர் என்ற மற்றொரு சாதனையையும் படைத்தார். எழுத்துக்களை எழுதுவதோடு நில்லாமல், தலைவர்களின் படங்களையும் நாக்கால் வரைய பயிற்சி எடுத்து, வரைந்து வருகிறார். தொடர்ந்து நாக்கால் கண் இமை முடியைத் தொட பயிற்சி செய்து வருகிறார். தன் நாக்கினைக் கொண்டு, 1330 திருக்குறளையும் எழுதி, உலக அளவில் சாதனை படைக்க வேண்டும் என்பது பிரவீனின் பேரவா!

அரசு உதவினால் நிச்சயம் சாதிப்பேன்

அமெரிக்காவைச் சேர்ந்த நிக்ஸ்டோல் என்பவரே உலகின் நீளமான நாக்கை உடையவராக கின்னஸ் சாதனை புத்தகத்தில் இடம் பெற்றுள்ளார். இவரது நாக்கின் நீளம், 10.1 சென்டி மீட்டர். அவரைவிட நீளமான நாக்கினை உடைய பிரவீனால், நிச்சயம், நிக்ஸ்டோலின் கின்னஸ் சாதனையை முறியடிக்க முடியும்.

ஆசிய போட்டிகள் வரை தன்முனைபில் சென்று கலந்து கொள்ள முடிந்த பிரவீனால் கின்னஸ் போன்ற உலக சாதனை அரங்கிற்குள் செல்ல முடியவில்லை. அதற்கான பொருளாதார வசதி அவரிடம் இல்லை.

தன்னைப் போன்ற தனித்திறமை படைத்தவர்களும் உலக அரங்கில் நடைபெறும் போட்டிகளில் பங்கேற்க மாநில, ஒன்றிய அரசுகள் உதவ வேண்டும் என்ற கோரிக்கையை முன் வைக்கிறார் பிரவீன்; அப்படி உதவினால் நிச்சயம் தன்னால் சாதிக்க முடியும் என்கிறார்.

மாணவனின் கோரிக்கைக் குரல் அரசின் காதுகளை எட்டட்டும்?

இதையும் படிங்க: ஒரு பக்கம் கல்வி, மறுபக்கம் சமூகப் பொறுப்பு - அரசுப்பள்ளி ஆசிரியையின் சமூக அக்கறை

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.