திருவள்ளூர் மாவட்டம் சோழவரம் அருகே உள்ள சென்னை-கொல்கத்தா தேசிய நெடுஞ்சாலையில் அமைந்துள்ள சுங்கச்சாவடிகளில் சரக்கு வாகன ஓட்டுநர் ஜேம்ஸ் மற்றும் சரக்கு வாகன உரிமையாளர் பன்னீர் செல்வம், தண்டபாணி ஆகிய மூன்று பேரிடமும் உரிய அனுமதிச் சீட்டு இருந்ததாக கூறப்படுகிறது.
ஆனால் அதனை ஏற்காமல் சுங்கச்சாவடியில் பணியாற்றும் வடமாநிலத் தொழிலாளர்கள் ஐந்து பேர் அவர்களை தாக்கியதாகத் தெரிகிறது.
இதனால் ஆத்திரமடைந்த சக ஓட்டுநர்கள் மற்றும் பொதுமக்கள் சுங்கச்சாவடி கண்ணாடிகளை உடைத்து அந்த ஊழியர்களை கைது செய்யக்கோரி சாலை மறியல் போராட்டத்தில் ஈடுபட்டனர். இதனையடுத்து, அப்பகுதியில் பெரும் பரபரப்பு ஏற்பட்டது.
சம்பவம் குறித்து தகவல் அறிந்து வந்த காவல் துணை கண்காணிப்பாளர் பவன் குமார் ரெட்டி, பொன்னேரி சட்டப்பேரவை உறுப்பினர் பலராமன் மற்றும் சோழபுரம் காவல் துறையினர் உள்ளிட்டோர் சமரச பேச்சுவார்த்தை நடத்தினர்.
மேலும் ஊழியர்கள் மீது உரிய நடவடிக்கை எடுப்பதாக உறுதி அளித்ததைத் தொடர்ந்து சாலை மறியல் கைவிடப்பட்டது. இந்த மறியலால் அப்பகுதியில் சுமார் ஒரு மணி நேரம் போக்குவரத்து பாதிப்பு ஏற்பட்டது.
