பெங்களூரு: 16வது ஐபிஎல் கிரிக்கெட் தொடரில் பெங்களூரு அணிக்கு எதிரான லீக் ஆட்டத்தில் குஜராத் அணி 6 விக்கெட் வித்தியாசத்தில் வெற்றி பெற்றது. நடப்பு சீசனின் 70வது மற்றும் கடைசி லீக் போட்டி சின்னசாமி மைதானத்தில் நடைபெற்றது. அடுத்த சுற்று வாய்ப்பை உறுதி செய்யும் வாழ்வா? சாவா? ஆட்டத்தில் பெங்களூரு ராயல் சேலஞ்சர்ஸ், குஜராத் டைட்டன்ஸ் அணிகள் களமிறங்கின.

மழையின் காரணமாக டாஸ் போடுவதில் தாமதம் ஏற்பட்டது. டாஸ் வென்ற குஜராத் கேப்டன் ஹர்திக் பாண்ட்யா பந்துவீச்சை தேர்வு செய்தார். பெங்களூரு அணியின் இன்னிங்சை விராட் கோலியும், கேப்டன் பாப் டு பிளிஸ்சிசும் தொடங்கினர். நிதானமாக விளையாடிய இருவரும் ஏதுவான பந்துகளை எல்லைக் கோட்டுக்கு அனுப்பினர்.

கேப்டன் பாப் டு பிளஸ்சிஸ் 28 ரன்களில் அவுட்டாகி வெளியேறினார். அடுத்தடுத்து களமிறங்கி க்ளென் மேக்ஸ்வெல் 11 ரன், மனிபல் லோம்ரர் 1 ரன் என பெரிய அளவில் சோபிக்கவில்லை. மறுபுறம் நிதானமாக விளையாடி வந்த விராட் கோலி அரை சதம் அடித்தார். அணியின் நிலை அறிந்து விளையாடத் தொடங்கிய விராட் கோலி வாண வேடிக்கை காட்டத் தொடங்கினார்.

குஜராத் பந்துவீச்சாளர்களில் சோதித்து பார்த்த கோலி, அதிரடியாக விளையாடி அணியின் ஸ்கோரை ராக்கெட் வேகத்தில் உயர்த்தினார். அடித்து விளையாடிய கோலி, அடுத்த 20 பந்துகளில் சதம் விளாசினார். 20 ஓவர்கள் முடிவில் பெங்களூரு அணி 5 விக்கெட் இழப்புக்கு 197 ரன்கள் எடுத்தது.

அதிரடியாக விளையாடிய விராட் கோலி 61 பந்துகளில் 13 பவுண்டரி 1 சிக்சர் என 101 ரன்கள் விளாசினார். குஜராத் அணியில் பந்துவீச்சாளர்கள் நூர் அகமது 2 விக்கெட்டும், முகமது ஷமி, யாஷ் தயால், ரஷித் கான் ஆகியோர் தலா 1 விக்கெட் வீழ்த்தினர்.

198 ரன் என்ற சற்று கடினமான இலக்கை நோக்கி குஜராத் அணி களமிறங்கியது. பெங்களூரு அணியை போல் குஜராத் அணியிலும் ஒரு சேர தொடக்க ஆட்டக்காரர் பெரிய அளவில் சோபிக்க தவறினார். விருதமான் சஹா 12 ரன்கள் மட்டும் எடுத்து விரைவாக வெளியேறினார். மறுபுறம் பெங்களூரு அணியில் விராட் கோலியை போல், குஜராத் அணியில் சுப்மான் கில் நங்கூரம் போல் நிலைத்து நின்று அதிரடி காட்டினார்.

அவருக்கு உறுதுணையாக தமிழக வீரர் விஜய் சங்கர் நல்ல ஒத்துழைப்பு கொடுத்தார். அடித்து ஆடிய விஜய் சங்கர் அரை சதம் கடந்தார். தன் பங்குக்கு 53 ரன்கள் எடுத்து கொடுத்து விஜய் சங்கர் ஆட்டமிழந்தார். அடுத்தடுத்து விக்கெட் வீழ்ந்தாலும் குஜராத் அணியில் நங்கூரம் போல் விளையாடிய சுப்மான் கில் சதம் விளாசினார்.

பரபரப்பான இறுதி ஓவரில் குஜராத் அணியின் வெற்றிக்கு 8 ரன்கள் தேவைப்பட்டன. இறுதி ஓவரை வீசிய வெய்ன் பார்னல் முதல் பந்தை நோ பாலாக வீசினார். இரண்டாவது பந்து வைட்டாக மாறியது. அடுத்த பந்தில் சிக்சர் அடித்த சுப்மான் கில் அணியின் வெற்றியை உறுதி செய்தார். குஜராத் அணி 6 விக்கெட் வித்தியாசத்தில் அபார வெற்றி பெற்றது.

இந்த வெற்றியின் மூலம் குஜராத் அணி பிளே ஆப் சுற்றுக்கு முன்னேறியது. அடுத்த சுற்று வாய்ப்பை இழந்த பெங்களூரு அணி தொடரை விட்டு வெளியேறியது. மே. 23ஆம் தேதி நடைபெறும் குவாலிஃபயர் ஆட்டத்தில் சென்னை சூப்பர் கிங்ஸ், குஜராத் டைட்டன்ஸ் அணிகள் பலப்பரீட்சை நடத்துகின்றன. இந்த ஆண்டும் கோப்பை வெல்லும் என்ற பெங்களூரு அணியின் ஆசை நிராசையாகவே மாறியது.

இதையும் படிங்க : MI vs SRH: கேமரூன் க்ரீன் ருத்ர தாண்டவம்: மும்பை அணி அபார வெற்றி!