சென்னை: தமிழ்நாடு சட்டப்பேரவையில் 2021-22ஆம் ஆண்டிற்கான திருத்திய வரவு செலவு கூட்டத்தொடரில் ஆதிதிராவிடர் நலன், மலைவாழ் பழங்குடியினர்கள் மற்றும் கொத்தடிமைத் தொழிலாளர்கள் நலன் அமைச்சர் கயல்விழி, அத்துறையின் மானியக் கோரிக்கையின் மீதான விவாதத்தின்போது அறிவித்ததாவது, “பழங்குடியினர் நலத்துறையின்கீழ் 318 உண்டி உறைவிடப் பள்ளிகள் இயங்கி வருகின்றன.
இதில், தர்மபுரி, ஈரோடு, சேலம், திருச்சி, திருநெல்வேலி, கள்ளக்குறிச்சி, திருவண்ணாமலை, வேலூர், திருப்பத்தூர், நீலகிரி ஆகிய மாவட்டங்களில் உள்ள 14 தொடக்கப்பள்ளிகள், 11 நடுநிலைப்பள்ளிகள், ஐந்து உயர்நிலைப் பள்ளிகள், ஒன்பது மேல்நிலைப்பள்ளிகள் என மொத்தம் 39 உண்டி உறைவிடப் பள்ளிகளில் ரூ. 15 கோடி செலவில் கூடுதல் வகுப்பறைகள் கட்டப்படும்.
45 உண்டி உறைவிடப் பள்ளிகளில் ரூ. 6.13 கோடி செலவில் சுற்றுச்சுவர்களும் என மொத்தம் ரூ.21.13 கோடி செலவில் கட்டப்படும்” என்றார்.
அதனை நிறைவேற்றும் விதமாக, பழங்குடியினர் நலத்துறையின்கீழ் இயங்கி வரும் பள்ளிகளில் படிக்கும் மாணவர்கள் பயன்பெறும் வகையில் 39 உண்டி உறைவிடப் பள்ளிகளில் 65 வகுப்பறைகள் கட்டுவதற்கு ரூ.14 கோடியே 95 லட்சம் மற்றும் 34 உண்டி உறைவிட பள்ளிகளில் சுற்றுச்சுவர் கட்டுவதற்கு ரூ.6 கோடியே 14 லட்சத்து 16 ஆயிரம் என மொத்தம் ரூ. 21 கோடியே 9 லட்சத்து 16 ஆயிரம் செலவில் வகுப்பறைகள், சுற்றுச்சுவர் கட்டுமானப் பணிகளை மேற்கொள்ள, நிர்வாக அனுமதி அளித்து அரசாணை வெளியிடப்பட்டுள்ளது.
