சென்னை: ராயப்பேட்டையில் உள்ள அதிமுக தலைமை அலுவலகத்தில் ஜூலை 11 ஆம் தேதி ஓ.பி.எஸ் மற்றும் ஈ.பி.எஸ் ஆதரவாளர்களிடையே கலவரம் வெடித்தது. இந்த சம்பவத்தின்போது தனது ஆதரவாளர்களுடன் கட்சி அலுவலகத்திற்கு வந்த ஓ.பி.எஸ் அலுவலகத்தில் இருந்து பல்வேறு ஆவணங்களை எடுத்துச் சென்றதாக ஈபிஎஸ் தரப்பில் குற்றஞ்சாட்டப்பட்டுள்ளது.
இது தொடர்பாக இரு தரப்பினரால் அளிக்கப்பட்ட 4 தனித்தனிப் புகார்கள் தொடர்பாக ராயப்பேட்டை காவல் நிலையத்தில் வழக்குப்பதிவு செய்து விசாரணை மேற்கொள்ளப்பட்டது.
பின்னர், அதிமுக நாடாளுமன்ற உறுப்பினர் சி.வி சண்முகம் இவ்வழக்கை சிபிசிஐடி-க்கு மாற்ற வலியுறுத்தி உயர்நீதிமன்றத்தில் வழக்கு தொடர்ந்த நிலையில், வழக்கு விசாரணை சி.பி.சி.ஐ.டி-க்கு மாற்றப்பட்டது.
அதன் தொடர்ச்சியாக, விசாரணை அதிகாரியாக சிபிசிஐடி டி.எஸ்.பி வெங்கடேசன் தலைமையில் 4 ஆய்வாளர்கள் அடங்கிய குழு அமைக்கப்பட்டது. இவ்வழக்கு தொடர்பாக ராயப்பேட்டை அதிமுக அலுவலகத்தில் சிபிசிஐடி போலீசார் இருமுறை நேரடியாக விசாரணை நடத்தினர்.
அதேபோல, அதிமுக அலுவலக மேலாளர் மகாலிங்கத்திடமும், அதிமுக நாடாளுமன்ற உறுப்பினர் சி.வி சண்முகத்திடமும் சிபிசிஐடி போலீசார் நேரில் விசாரணை நடத்தி வாக்குமூலம் பெற்றுள்ளனர்.
இவ்வழக்கு தொடர்பாக உயர்நீதிமன்றத்தில் முன் ஜாமீன் பெற்ற ஓ.பி.எஸ், ஈ.பி.எஸ் ஆதரவாளர்கள் 69 பேரை நேரில் ஆஜராகி கையெழுத்திட சிபிசிஐடி போலீசார் சார்பில் தெரிவிக்கப்பட்டிருந்தது.
அதன்படி, இன்று(செப்.22) காலை முதல் ஈ.பி.எஸ் தரப்பில் முன் ஜாமீன் பெற்ற அவரது ஆதரவாளர்கள், எழும்பூர் சிபிசிஐடி அலுவலகத்தில் ஆஜராகி கையெழுத்திட்டு வருகின்றனர்.
இவர்களுக்கு 10-12 மணி வரை கையெழுத்திடுவதற்கான நேரம் ஒதுக்கப்பட்டுள்ளது. அதேபோல, ஓ.பி.எஸ் தரப்பில் முன் ஜாமீன் பெற்ற அவரது ஆதரவாளர்களுக்கு இன்று மதியம் 2-4 மணி வரை நேரம் ஒதுக்கப்பட்டுள்ளது.
இதையும் படிங்க: மதுரை காமராஜர் பல்கலைக்கழகத்தில் வேலைவாய்ப்பு
