முன்னாள் பிசிசிஐ துணைத் தலைவர் நிரஞ்சன் ஷா வின் ஈடிவி பாரத்திற்கு சிறப்பு பேட்டி

கொல்கத்தா: 1965-66ல் முதல்தர கிரிக்கெட் வீரராகத் தொடங்கி, 1972ஆம் ஆண்டு சவுராஷ்டிரா கிரிக்கெட் சங்கத்தின் (SCA) செயலாளராக பதவியேற்று, பல ஆண்டுகளாக இந்திய கிரிக்கெட் கட்டுப்பாட்டு வாரியத்தில் (பிசிசிஐ) துணைத் தலைவர் பதவி மற்றும் ஐபிஎல் துணைத் தலைவர் பதவியைத் தவிர நான்கு முறை வாரியத்தின் செயலாளராக இருந்த நிரஞ்சன் ஷா ஈடிவி பாரத்திற்கு சிறப்பு பேட்டி அளித்துள்ளார்.

லோதா கமிட்டி விதித்த பல சர்ச்சைக்குரிய உட்கூறுகளை தளர்த்தும் உச்ச நீதிமன்றத் தீர்ப்பால், பிசிசிஐ தனது 91வது ஆண்டு பொதுக் கூட்டத்தை அக்டோபர் 18ஆம் தேதி நடத்தும் முனைப்பில் உள்ளது. இந்நிலையில், நிபுணர்கள் கேட்ட கேள்விகளுக்கு பதிலளித்த அவர்,

இந்தத் தீர்ப்பு உங்கள் தலைமுறை கிரிக்கெட் நிர்வாகிகளுக்கு உதவுமா?

11 ஆண்டுகள் உச்ச வரம்பு இருப்பதால், இந்த நிபந்தனைகளை பொறுத்த வரை எங்களில் பலர் வரம்பை கடந்துவிட்டோம் அல்லது கடக்க உள்ளோம் என்பதால் இந்தத் தீர்ப்பு எங்களுக்குப் பயன்படாது. எங்களுக்கு அந்த வழியில் உதவி செய்யப்படவில்லை.

குழுவின் செயல்பாட்டுடன் நீங்கள் தொடர்பு கொள்வீர்களா?

வாரிய விவகாரங்களை நடத்துவதில் எங்கள் சேவைகள் வேண்டுமா என்பது புதிய அலுவலகப் பொறுப்பாளர்களைப் பொறுத்தது. அவர்கள் எங்கள் சேவைகளை விரும்பினால், நாங்கள் நிச்சயமாக எங்கள் அறிவுரைகளை வழங்குவோம்.

நிர்வாகிகளை தேர்வு செய்யும் போது வாரியத்தின் மீது அரசியல் அழுத்தம் உள்ளதா?

எங்களுக்கு எந்த அரசியல் அழுத்தமும் இல்லை. வாரியம் ஒரு ஜனநாயக செயல்முறையில் இயங்குகிறது மற்றும் ஒவ்வொரு சங்கமும் ஜனநாயக வழியில் இயங்குகிறது. மாநில சங்கங்கள் குழுவிற்கு பிரதிநிதிகளை அனுப்புகின்றன.

குழுவின் உயர்மட்டத்தில் இருக்க வேண்டும் என்று நீங்கள் நினைக்கும் ஐந்து பேரைக் குறிப்பிட முடியுமா?

குறிப்பாக யாருடைய பெயரையும் குறிப்பிட விரும்பவில்லை. யார் வருவார்கள், யார் தொடர விரும்புகிறார்கள், இது அனைத்தும் பிரதிநிதிகளைப் பொறுத்தது.

இப்போதும் பிசிசிஐ நிர்வாகத்தில் என் சீனிவாசன் எப்படி பயனுள்ளதாக இருப்பார் என்று நினைக்கிறீர்கள்?

நிச்சயமாக, வாரியத்திற்கு சீனிவாசனிடமிருந்து ஏதேனும் வழிகாட்டுதல் தேவைப்படும் போதெல்லாம், அவர் தனது எண்ணங்களையும் அனுபவங்களையும் பகிர்ந்து கொள்வதில் மகிழ்ச்சி அடைவார் என்று நான் 100 சதவீதம் உறுதியாக நம்புகிறேன்.

பதவியில் இருப்பவர்களை எப்போது முடிவு செய்வீர்கள்?

இந்த வாரம் பிசிசிஐயின் மூத்த உறுப்பினர்கள் கூடி எதிர்கால நடவடிக்கையை முடிவு செய்வார்கள் என்று நினைக்கிறேன்.

இதையும் படிங்க: ’சென்னையின் எஃப்சி’ கால் பந்து அணியில் களமிறங்கவுள்ள கேரள வீரர்..!