இந்தியாவில் கரோனா வைரஸின் தாக்கம் நாளுக்கு நாள் அதிகரித்துவருகிறது. மத்திய சுகாதார அமைச்சகம் வெளியிட்ட தகவலின்படி, நேற்று ஒரேநாளில் புதிதாக 3,604 பேருக்கு கரோனா வைரஸ் இருப்பது உறுதிசெய்யப்பட்டது. அதில் அதிகபட்சமாக மகாராஷ்டிராவில் 1230 பேருக்கும், தமிழ்நாட்டில் 798 பேருக்கும், குஜராத்தில் 347 பேருக்கும், டெல்லியில் 310 பேருக்கும் இத்தொற்று இருப்பது கண்டறியப்பட்டது.
இதனால், நாட்டில் பாதிக்கப்பட்டவர்களின் எண்ணிக்கை 70,756ஆக அதிகரித்துள்ளது. அதேசமயம் இத்தொற்றால் நேற்று 87 உயிரிழப்புகள் ஏற்பட்டுள்ளன. மகாராஷ்டிராவில் 36 பேரும், குஜராத்தில் 20 பேரும் உயிரிழந்துள்ளனர். இதன்மூலம், உயிரிழந்தவர்களின் எண்ணிக்கை 2,293ஆக அதிகரித்துள்ளது.
நேற்று 1,538 பேர் இத்தொற்றிலிருந்து பூரணமாக குணமடைந்து வீடு திரும்பியுள்ளனர். இதனால், குணமடைந்தவர்களின் எண்ணிக்கை 22, 455ஆக அதிகரித்துள்ளது என குறிப்பிட்டுள்ளது.
கரோனாவால் அதிக பாதிப்புகளான மாநிலங்களின் பட்டியலில் மகாராஷ்டிராதான் முதலிடத்தில் உள்ளது. இத்தொற்றின் தாக்கம் மகாராஷ்டிராவில் நாளுக்கு நாள் மோசமாகிவருகிறது.
அதிக பாதிப்புகளான ஐந்து மாநிலங்களின் விவரம்:
மகாராஷ்டிராவில் இதுவரை 23,401 பேர் பாதிக்கப்பட்டுள்ளனர். அவர்களில் 868 பேர் உயிரிழந்த நிலையில், 4786 பேர் குணமடைந்துள்ளனர். இதைத்தொடர்ந்து, குஜராத்தில் 8,541 பேர் பாதிக்கப்பட்டுள்ள நிலையில், 2780 பேர் குணமடைந்துள்ளனர். 513 பேர் உயிரிழந்துள்ளனர்.
தமிழ்நாட்டில் 8002 பேர் பாதிக்கப்பட்டுள்ள நிலையில், 53 பேர் உயிரிழந்துள்ளனர். 2051 பேர் குணமடைந்துள்ளனர். டெல்லியில் 7,233 பாதிப்புகள் கண்டறியப்பட்ட நிலையில், 73 உயிரிழப்புகள் ஏற்பட்டுள்ளன. 2129 பேர் குணமடைந்துள்ளனர். இதைத்தொடர்ந்து, ராஜஸ்தானில் 3,988 பேர் பாதிக்கப்பட்டுள்ளனர். அவர்களில் 2264 பேர் குணமடைந்த நிலையில், 113 பேர் உயிரிழந்துள்ளனர்.
இதையும் படிங்க: சிறப்பு ரயில்கள்: ரூ.16 கோடிக்கு டிக்கெட்டுகள் முன்பதிவு!
