சென்னை: திமுக இளைஞரணியின் 45வது தொடக்க விழா, சென்னை தேனாம்பேட்டையில் இளைஞர் நலன் மற்றும் விளையாட்டுத் துறை அமைச்சர் உதயநிதி ஸ்டாலின் தலைமையில் இன்று (சனிக்கிழமை) நடைபெற்றது.
இந்நிகழ்ச்சியில் பேசிய உதயநிதி ஸ்டாலின், "முதலமைச்சருக்கு துணையாக நான் வரவேண்டும் என்று இன்று தீர்மானம் நிறைவேற்றப்பட்டுள்ளது, பத்திரிகையில் வரும் வதந்தி, கிசுகிசுக்களை எல்லாம் நம்பி நீங்கள் தீர்மானம் செய்திருக்கிறீர்கள். எனக்கு எந்த பொறுப்பு வந்தாலும் இளைஞரணியை மறக்கமாட்டேன் என்று கூறினார்.
சமூக வலைத்தளங்கள் மற்றும் ஒரு சில பத்திரிகைகளில் முதலமைச்சர் மு.க.ஸ்டாலின், வெளிநாட்டு பயணத்திற்கு முன்பு அமைச்சரவையை மாற்ற திட்டமிட்டுள்ளதாகவும், குறிப்பாக உதயநிதி துணை முதலமைச்சராக பொறுப்பேற்க உள்ளதாகவும் செய்திகள் வெளியிட்டிருந்த நிலையில் உதயநிதி ஸ்டாலின் இந்த விளக்கத்தை அளித்துள்ளார்.
முன்னதாக விழா மேடையில் பேசிய அமைச்சர் உதயநிதி ஸ்டாலின், "எப்படியாவது இரண்டு அல்லது மூன்று சீட் ஜெயித்து விடுவோம் என்ற நம்பிக்கையில், எந்த முறையும் இல்லாத அளவிற்கு மோடி ஆறு முறை தமிழகத்திற்கு வந்திருந்தார். 1000 முறை அவர் வந்தாலும் தமிழக மக்கள் உங்களை ஏற்றுகொள்ள மாட்டார்கள் என அப்பவே கூறியிருந்தேன். அதை நிருபித்து காட்டி, 40க்கு 40க்கு தொகுதிகளிலும் வெற்றியை கொடுத்த தமிழக மக்களுக்கு நன்றி" என்றார்.
தொடர்ந்து பேசிய அவர், "மக்களை சந்திப்பதற்கு அரசியல் களம் எவ்வளவு முக்கியமாக இருக்கிறதோ அதேபோல் இன்று சமூக வலைத்தளங்களும் மிக முக்கியமான ஒன்றாக இருக்கிறது. குறிப்பாக, பாஜக பொய்களை பரப்பி, பொய்களை மட்டுமே பேசி அரசியல் செய்கிறது. திமுகவில் எப்போதும் இளைஞரணி தான் முதன்மை, முதலமைச்சருக்கு நெருக்கமானது இந்த இளைஞரணி. சமூக வலைதளங்களில் இளைஞரணி நிர்வாகிகள் திறம்பட செயல்பட வேண்டும்" என கேட்டுக்கொண்டார்.
மேலும், "புதுமை பெண் திட்டத்தால் ஆண்டு தோறும் இரண்டரை லட்சம் மாணவிகள் பயனடைகின்றனர். தற்போது மாணவர்களுக்கு தமிழ் புதல்வன் திட்டம் ஆகஸ்ட மாதத்தில் இருந்து விரிவுபடுத்தப்பட உள்ளது. 2026ல் என்ன நடந்தாலும், என்ன கூட்டணி வந்தாலும் வெற்றியை சூடப்போவது திமுக தான். மீண்டும் தமிழகத்தை ஆளப்போவது முத்துவேல் கருணாநிதி ஸ்டாலின் தான்" என்றார்.
ஈடிவி பாரத் தமிழ் வாட்ஸ்ஆப் சேனலில் இணைய இங்கே கிளிக் செய்யவும்
இதையும் படிங்க: துணை முதல்வர் ஆகிறாரா உதயநிதி ஸ்டாலின்? உண்மை நிலவரம் என்ன?
