வாடிகன் நகரம்: உலகம் முழுவதும் வாழும் கத்தோலிக்க கிறிஸ்தவர்களின் மதத் தலைவரான போப் பிரான்சிஸ் கடந்த 21 ஆம் தேதி காலமானார். இவரது மறைவுக்கு உலக தலைவர்கள் பலரும் இரங்கல் தெரிவித்து இருந்தனர். போப் பிரான்சிஸ் இறுதிச் சடங்கு கடந்த 26 ஆம் தேதி நடைபெற்றது. இதில், இந்திய குடியரசு தலைவர் திரவுபதி முர்மு, அமெரிக்க அதிபர் டொனால்ட் ட்ரம்ப் உள்ளிட்ட உலக நாடுகளின் தலைவர்கள் நேரில் பங்கேற்று அஞ்சலி செலுத்தினர்.
பிரான்சிஸ் இறுதிச்சடங்கில் அரச குடும்ப உறுப்பினர்கள், உலகத் தலைவர்கள் மற்றும் சாதாரண யாத்ரீகர்கள் உள்ளிட்ட 4,00,000 பேர் செயிண்ட் பீட்டர்ஸ் சதுக்கத்திற்கும், அதற்கு அப்பாலும் கலந்து கொண்டனர்.
"ஏழைகளின் போப்" வத்திக்கானின் சுவர்களுக்கு வெளியே அடக்கம் செய்ய தேர்ந்தெடுத்ததை அடுத்து, ரோமில் உள்ள சாண்டா மரியா மாகியோர் பசிலிக்காவில் உள்ள அவரது பளிங்கு கல்லறையை கடந்து சுமார் 70,000 பேர் துக்கம் அனுசரித்தனர்.
'ஜார்ஜ் பெர்கோகிலோ' என்ற இயற்பெயர் கொண்ட போப் பிரான்சிஸ், லத்தீன் அமெரிக்காவை சேர்ந்த முதல் போப் என்ற பெருமையை பெற்றவர். கடந்த 2013 ஆம் ஆண்டு மார்ச் 13 ஆம் தேதி 266 ஆவது போப்பாக தேர்வு செய்யப்பட்ட 'பிரான்சிஸ்' கத்தோலிக்க கிறிஸ்தவ மத நடைமுறைகளில் பல்வேறு சீர்திருத்தங்கள் கொண்டு வந்தவராக அறியப்படுகிறார்.
இந்நிலையில் கத்தோலிக்க கிறிஸ்தவர்களுக்கு புதிய போப்பை தேர்ந்தெடுப்பதற்கான மாநாடு வரும் மே 7 ஆம் தேதி தொடங்கும் என வாடிகனின் பத்திரிகை அலுவலகமான ஹோலி சீ அறிவித்துள்ளது. இதுகுறித்து வெளியிடப்பட்ட அறிக்கையில், "புதிய போப்பை தேர்ந்தெடுக்கும் மாநாடு மே 7 ஆம் தேதி தொடங்கும்.
ரோமில் உள்ள கார்டினல்கள் இன்று (ஏப்ரல் 28) ஒன்று கூடி தங்களது ஐந்தாவது பொது சபையில் இந்த முடிவை எடுத்தனர். இந்த மாநாடு வாடிகனின் சிஸ்டைன் ஆலயத்தில் நடைபெறும். மாநாடு நடக்கும் நாட்களில் வாடிகன் சிஸ்டைன் ஆலயத்தில் பார்வையாளர்கள் யாருக்கும் அனுமதி வழங்கப்படாது" என்று, ஹோலி சீ வெளியிட்டுள்ள அறிக்கையில் கூறப்பட்டுள்ளது.
அதன்படி உலகின் 1.4 பில்லியன் கத்தோலிக்க கிறிஸ்தவர்களுக்கான புதிய மத தலைவரை தேர்ந்தெடுக்க 80 வயதுக்குட்பட்ட திருச்சபையின் 252 கார்டினல்கள் ரோமுக்கு அழைக்கப்பட்டுள்ளனர். இவர்களில் 135 பேர் மட்டுமே மாநாட்டில் வாக்களிக்க தகுதியுடையவர்கள்.
உலகம் முழுவதும் மோதல்கள் மற்றும் இராஜதந்திர நெருக்கடிகள் தலைதூக்கும் வேளையில் பிரான்சிஸின் கீழ் வெளியுறவுச் செயலாளராக இருந்த இத்தாலிய கார்டினல் பியட்ரோ பரோலின் (போப்பின் இரண்டாவது இடத்தில் இருந்தவர்) பிரான்சிஸ்க்கு பின் வருவதற்கான பலரது விருப்பமாக இருக்கிறார்.
பிரிட்டிஷ் போட்டியாளராக வில்லியம் ஹில், மணிலாவின் மெட்ரோபாலிட்டன் பேராயர் எமரிட்டஸ் பிலிப்பைன்ஸ் லூயிஸ் அன்டோனியோ டேகிளை விட சற்று முன்னிலை வகித்தார். அதைத் தொடர்ந்து கானாவின் கார்டினல் பீட்டர் டர்க்சன் இரண்டாவது இடத்தை பிடித்தார்.
அடுத்ததாக போலோக்னாவின் பேராயர் மேட்டியோ ஜூப்பி, கினியாவின் கார்டினல் ராபர்ட் சாரா மற்றும் ஜெருசலேமின் லத்தீன் தேசபக்தர் பியர்பட்டிஸ்டா பிஸ்ஸாபல்லா ஆகியோரும் இந்த வரிசையில் வருகின்றனர்.
மிகவும் இரக்கமுள்ள திருச்சபையை உருவாக்க பிரான்சிஸ் மேற்கொண்ட முயற்சிகள் அவருக்கு பரவலான பாசத்தையும், மரியாதையையும் பெற்று தந்தாலும், அவரது சில சீர்திருத்தங்கள் திருச்சபையின் பழமைவாத பிரிவை குறிப்பாக அமெரிக்கா மற்றும் ஆப்பிரிக்காவில் கோபப்படுத்தியது என்றே சொல்லப்படுகிறது.
வாக்குரிமை உள்ள கார்டினல்களில் சுமார் 80 சதவீதம் பேர் பிரான்சிஸால் நியமிக்கப்பட்டவர்கள். இருப்பினும், அவர்கள் அவரது பிரான்சி சாயலில் ஒரு வாரிசை தேர்ந்தெடுப்பார்கள் என்பதற்கு எந்தவித உத்தரவாதமும் இல்லை. பெரும்பாலானவர்கள் ஒப்பீட்டளவில் இளம் வயதினர். மேலும் பலருக்கு இது அவர்களின் முதல் மாநாடாகும்.
இது தொடர்பாக இத்தாலிய பிஷப்கள் மாநாட்டின் முன்னாள் தலைவர் கார்டினல் குவால்டிரோ பாசெட்டி (83) இத்தாலி நாட்டின் கொரியர் டெல்லா செரா செய்தி நிறுவனத்திடம் கூறும்போது, ''உலகின் அனைத்து மூலைகளிலிருந்தும் கார்டினல்கள் வருகிறார்கள். இதில் பலருக்கு ஒருவரையொருவர் தெரியாது. கடந்த வாரம் அவர்களுக்காக 4 "பொது சபை" கூட்டம் நடந்தது. அங்கு அவர்கள் நன்கு தெரிந்துகொள்ள தொடங்கியதை அடுத்து அழகான, சகோதரத்துவமான சூழல் உள்ளது." என்று கூறினார்.
ஸ்பானிஷ் கார்டினல் ஜோஸ் கோபோ எல் பைஸிடம் கூறும்போது, ''இதுவரை கார்டினல்கள் யாரை தேர்வு செய்யலாம் என்பது குறித்து மிக குறைந்த தடயங்களே உள்ளன. பிரான்சிஸ் ஆச்சரியங்களின் போப்பாக இருந்திருந்தால் இந்த மாநாடும் அப்படித்தான் இருக்கும் என, நம்புகிறேன். ஏனெனில் இது கணிக்க முடியாதது" என்று ஸ்பானிஷ் கார்டினல் ஜோஸ் கோபோ கூறினார்.
இதையும் படிங்க: போர் பதற்றம்: ''பயிர்களை சீக்கிரம் அறுவடை செய்யுங்கள்'' - பஞ்சாப் விவசாயிகளுக்கு பிஎஸ்எப் வீரர்கள் உத்தரவு!
ரோமில் உள்ள போன்டிஃபிகல் கிரிகோரியன் பல்கலைக்கழகத்தில் சர்ச் வரலாறு மற்றும் கலாச்சாரப் பேராசிரியரான ராபர்டோ ரெகோலி கூறும்போது, "அதிக ஒற்றுமையை எவ்வாறு உருவாக்குவது? என்பதை அறிந்த ஒருவரை கண்டுபிடிக்க கார்டினல்கள் முயற்சி செய்வார்கள். நமது கத்தோலிக்க மதம் பல்வேறு துருவ முனைப்புகளை அனுபவிக்கும் ஒரு காலகட்டத்தில் இருக்கிறது. எனவே இது மிக மிக வேகமாக நடக்கும் என்று நான் நினைக்கவில்லை," என்று அவர் கூறினார்.
மத்திய ஆப்பிரிக்க குடியரசை சேர்ந்த கார்டினல் டியுடோன் நசபலைங்கா கூறும்போது, ''வருங்கால போப் உலகளாவிய இதயத்தை கொண்டிருக்க வேண்டும். அனைத்து கண்டங்களையும் நேசிக்க வேண்டும். நாம் நிறத்தையோ, தோற்றத்தையோ பார்க்கக்கூடாது. ஆனால் முன்மொழியப்பட்டதையே பார்க்க வேண்டும்
புயல்களிலும் கூட திருச்சபையின் தலைமையை நிலையாக பிடிக்கும் ஒரு துணிச்சலான, துணிச்சலான, வலுவாக பேசும் திறன் கொண்ட ஒரு தலைவர் நமக்கு தேவை." என்றார்.
2026 ஜூபிலி புனித ஆண்டிற்காக ரோம் நகருக்கு வருகை தந்த 68 வயதான இத்தாலியரான பாட்ரிசியா ஸ்போட்டி கூறும்போது, ''புதிய போப்பாண்டவர் போப் பிரான்சிஸ் போன்ற ஒரு போப்பாக இருப்பார் என்று நம்புகிறேன்.'' என்று அவர் கூறினார்.
ஈடிவி பாரத் வாட்ஸ்ஆப் சேனலில் இணைய இங்கே கிளிக் செய்யவும்
