சென்னை: விஜய் சேதுபதியின் 50வது படமாக கடந்த ஆண்டு வெளியான 'மஹாராஜா' மிகப்பெரிய வெற்றியை பெற்றது. சீனாவில் கூட வசூல் சாதனை படைத்தது. அதனை தொடர்ந்து கடந்த ஆண்டு டிசம்பர் மாதம் வெளியான விடுதலை இரண்டாம் பாகம் விமர்சகர்கள் மத்தியில் பாராட்டை பெற்றது.
இந்நிலையில் விடுதலை திரைப்படத்திற்கு பிறகு விஜய் சேதுபதி தற்போது மூன்று படங்களில் நடித்து வருகிறார். ஆறுமுக குமார் இயக்கத்தில் ’ஏஸ்’, மிஷ்கின் இயக்கத்தில் ’ட்ரெய்ன்’, பாண்டிராஜ் இயக்கத்தில் பெயரிடப்படாத திரைப்படம் ஆகியவற்றில் நடித்து வருகிறார். இவற்றில் ’ஏஸ்’ திரைப்படம் விரவில் வெளியாகலாம் என எதிர்பார்க்கப்படுகிறது.
இதைத் தொடர்ந்து விஜய் சேதுபதி நடிக்கவிருக்கும் படத்தின் அறிவிப்பு சமீபத்தில் வெளியானது. தெலுங்கு திரையுலகின் முன்னணி இயக்குநரான பூரி ஜெகன்நாத் இயக்கத்தில் உருவாகும் புதிய படம் ஒன்றில் நடிக்க ஒப்பந்தமாகியுள்ளார். தெலுங்கு, தமிழ், மலையாளம், ஹிந்தி, கன்னடம் என பான் இந்தியா படமாக இத்திரைப்படம் உருவாகவுள்ளது.
இத்திரைப்படத்தில் விஜய் சேதுபதியை இதுவரை யாரும் பார்த்திராத கதாபாத்திரத்தில் பூரி ஜெகன்நாத் காட்சிப்படுத்தவுள்ளார் என அறிவித்துள்ளனர். இந்தப் படத்தில் மிக முக்கியமான கதாபாத்திரத்தில் நடிகை தபு நடிக்கவுள்ளதாக தகவல் வெளியாகி வந்த நிலையில் அதனை அதிகாரப்பூர்வமாக அறிவித்துள்ளது படக்குழு.
She’s electric.
— Puri Connects (@PuriConnects) April 10, 2025
She’s explosive .
She’s THE TABU.
Proudly welcoming THE GEM OF INDIAN CINEMA, Actress #Tabu on-board for a ROLE as DYNAMIC as her presence in #PuriSethupathi ❤️🔥
A #PuriJagannadh Film
Starring Makkalselvan @VijaySethuOffl
Produced by Puri Jagannadh,… pic.twitter.com/WGp0kkuZDl
பூரி ஜெகன்நாத்தின் தயாரிப்பு நிறுவனமான பூரி கனெக்ட்ஸ் சமூக வலைதள பக்கத்தில் இது குறித்த அதிகாரப்பூர்வ அறிவிப்பு வெளியாகியுள்ளது. தபு ஏற்று நடிக்கவிருக்கும் கதாபாத்திரம் இத்திரைப்படத்தின் மிக முக்கியமான கதாபாத்திரமாக இருக்கும் என அதில் தெரிவிக்கப்பட்டுள்ளது.
மேலும் இந்த ஆண்டு ஜுன் மாதம் படத்தின் படப்பிடிப்பு தொடங்கப்படும் எனவும் படத்தில் உள்ள மற்ற கலைஞர்கள் குறித்த அறிவிப்பு விரைவில் அறிவிக்கப்படும் எனவும் தெரிவிக்கப்பட்டுள்ளது. இத்திரைப்படத்தில் தபு, விஜய் சேதுபதியின் ஜோடியாக நடிப்பாரா அல்லது வேறு ஏதேனும் கதாபாத்திரத்தில் நடிக்கிறாரா என தெரியவில்லை.
எது எப்படி இருந்தாலும் 25 ஆண்டுகள் கழித்து தபு தமிழ் நடிகருடன் நடிக்கவிருக்கிறார். கடந்த 2000ஆம் ஆண்டுப் வெளியான ’கண்டுகொண்டேன் கண்டுகொண்டேன்’ திரைப்படத்தில் அஜித் ஜோடியாக நடித்திருந்தார் தபு. அதே ஆண்டு வெளியான ’சிநேகிதியே’ திரைப்படத்தில் ஜோதிகாவுடன் நடித்திருந்தார்.
இதையும் படிங்க: திரையரங்கிற்குள் பட்டாசு வெடித்த அஜித் ரசிகர்கள்... ’குட் பேட் அக்லி’ ரிலீஸில் பரபரப்பு!
அதன் பிறகு தற்போது தான் தமிழ் நடிகரருடன் நடிக்கவுள்ளார். ஹிந்தி படங்களில் அதிகம் நடித்துள்ள தபு, 1996ஆம் ஆண்டு வெளிவந்த ’காதல் தேசம்’ படம் மூலமாக தமிழ் சினிமாவில் அறிமுகமானார். தொடர்ந்து தமிழில் ‘இருவர்’, ’தாயின் மணிக்கொடி’, ’கண்டுகொண்டேன் கண்டுகொண்டேன்’, ’சிநேகிதியே’ ஆகிய படங்களில் நடித்துள்ளார்.
ஹாலிவுட்டில் மிகப்பிரபலமான டூயூன் திரைப்படத்தை அடிப்படையாக கொண்டு உருவாக்கப்பட்டு வரும் டூன் ப்ரொஃபசி (Dune: Prophecy) எனும் வெப் சீரிஸில் முக்கிய கதாபாத்திரத்தில் தற்போது நடித்து வருகிறார் தபு.
