ਜੇਨੇਵਾ: ਸੰਯੁਕਤ ਰਾਸ਼ਟਰ ਸ਼ਰਨਾਰਥੀ ਏਜੰਸੀ (united nations refugee agency) ਨੇ ਵੀਰਵਾਰ ਨੂੰ ਕਿਹਾ ਕਿ ਰੂਸ ਦੇ ਹਮਲੇ ਤੋਂ ਬਾਅਦ 10 ਲੱਖ ਲੋਕ ਯੂਕਰੇਨ ਛੱਡ ਚੁੱਕੇ ਹਨ। ਇਸ ਸਦੀ ਵਿੱਚ ਪਹਿਲਾਂ ਕਦੇ ਵੀ ਇੰਨੀ ਤੇਜ਼ੀ ਨਾਲ ਪਰਵਾਸ ਨਹੀਂ ਹੋਇਆ ਸੀ।
ਸੰਯੁਕਤ ਰਾਸ਼ਟਰ ਸ਼ਰਨਾਰਥੀ ਹਾਈਕਮਿਸ਼ਨ (UNHCR) ਦੇ ਅੰਕੜਿਆਂ ਅਨੁਸਾਰ, ਪ੍ਰਵਾਸ ਕਰਨ ਵਾਲੇ ਲੋਕਾਂ ਦੀ ਸੰਖਿਆ ਯੂਕਰੇਨ ਦੀ ਆਬਾਦੀ ਦੇ ਦੋ ਪ੍ਰਤੀਸ਼ਤ ਤੋਂ ਵੱਧ ਬਣਦੇ ਹਨ। ਵਿਸ਼ਵ ਬੈਂਕ ਦੇ ਅਨੁਸਾਰ 2020 ਦੇ ਅੰਤ ਵਿੱਚ ਯੂਕਰੇਨ ਦੀ ਆਬਾਦੀ ਚਾਰ ਕਰੋੜ, 40 ਲੱਖ ਸੀ।
ਏਜੰਸੀ ਦਾ ਅੰਦਾਜ਼ਾ ਹੈ ਕਿ 4 ਮਿਲੀਅਨ ਲੋਕ ਆਖਰਕਾਰ ਯੂਕਰੇਨ ਤੋਂ ਪਰਵਾਸ ਕਰ ਸਕਦੇ ਹਨ ਅਤੇ ਇਹ ਗਿਣਤੀ ਉਮੀਦ ਤੋਂ ਵੱਧ ਹੋ ਸਕਦੀ ਹੈ। UNHCR ਦੇ ਬੁਲਾਰੇ ਜੋਂਗ-ਆਹ ਘਦੀਨੀ-ਵਿਲੀਅਮਜ਼ ਨੇ ਇੱਕ ਈਮੇਲ ਵਿੱਚ ਲਿਖਿਆ ਕਿ "ਰਾਸ਼ਟਰੀ ਅਧਿਕਾਰੀਆਂ ਦੀਆਂ ਗਣਨਾਵਾਂ ਦੇ ਅਨੁਸਾਰ, ਸਾਡੇ ਅੰਕੜੇ ਦਰਸਾਉਂਦੇ ਹਨ ਕਿ ਮੱਧ ਯੂਰਪ ਵਿੱਚ ਅਸੀਂ ਅੱਧੀ ਰਾਤ ਨੂੰ ਇੱਕ ਮਿਲੀਅਨ ਦਾ ਅੰਕੜਾ ਪਾਰ ਕਰ ਲਿਆ ਹੈ।" ਸੰਯੁਕਤ ਰਾਸ਼ਟਰ ਦੇ ਹਾਈ ਕਮਿਸ਼ਨਰ ਫਿਲਿਪੋ ਗ੍ਰਾਂਡੀ ਨੇ ਟਵੀਟ ਕੀਤਾ, “ਅਸੀਂ ਸਿਰਫ ਸੱਤ ਦਿਨਾਂ ਵਿੱਚ ਯੂਕਰੇਨ ਤੋਂ ਗੁਆਂਢੀ ਦੇਸ਼ਾਂ ਵਿੱਚ 10 ਲੱਖ ਲੋਕਾਂ ਦੇ ਪਲਾਇਨ ਨੂੰ ਦੇਖਿਆ ਹੈ।
ਯੂਕਰੇਨ ਛੱਡਣ ਵਾਲੇ ਇਨ੍ਹਾਂ ਲੋਕਾਂ ਵਿੱਚ ਜ਼ਿਆਦਾਤਰ ਸਮਾਜ ਦੇ ਕਮਜ਼ੋਰ ਵਰਗਾਂ ਦੇ ਲੋਕ ਸ਼ਾਮਲ ਹਨ, ਜੋ ਆਪਣੇ ਪਰਵਾਸ ਬਾਰੇ ਫੈਸਲਾ ਨਹੀਂ ਕਰ ਸਕਦੇ ਹਨ ਅਤੇ ਆਪਣੀ ਯਾਤਰਾ ਨੂੰ ਸੁਰੱਖਿਅਤ ਬਣਾਉਣ ਲਈ ਮਦਦ ਦੀ ਲੋੜ ਹੈ।
ਬੁੱਧਵਾਰ ਨੂੰ 200 ਤੋਂ ਵੱਧ ਅਪਾਹਜ ਯੂਕਰੇਨੀਅਨ ਹੰਗਰੀ ਦੇ ਸ਼ਹਿਰ ਜਾਹੋਨੀ ਪਹੁੰਚੇ, ਜੋ ਕਿ ਯੂਕਰੇਨ ਦੀ ਰਾਜਧਾਨੀ ਕੀਵ ਵਿੱਚ ਦੋ ਆਸਰਾ ਘਰਾਂ ਵਿੱਚ ਰਹਿੰਦੇ ਸਨ। ਸ਼ਰਨਾਰਥੀਆਂ ਵਿੱਚ ਕਈ ਬੱਚੇ ਵੀ ਸ਼ਾਮਲ ਹਨ। ਇਨ੍ਹਾਂ ਵਿਚ ਬਹੁਤ ਸਾਰੇ ਲੋਕ ਸ਼ਾਮਲ ਹਨ ਜੋ ਮਾਨਸਿਕ ਜਾਂ ਸਰੀਰਕ ਤੌਰ 'ਤੇ ਅਪਾਹਜ ਹਨ ਅਤੇ ਜਿਨ੍ਹਾਂ ਨੂੰ ਰੂਸੀ ਹਮਲੇ ਕਾਰਨ ਪਨਾਹ ਕੇਂਦਰ ਛੱਡ ਕੇ ਦੇਸ਼ ਛੱਡਣਾ ਪਿਆ ਹੈ।
ਕੀਵ ਵਿੱਚ ਸਵੈਤੋਸ਼ਿੰਕਸੀ ਅਨਾਥ ਆਸ਼ਰਮ ਦੀ ਡਾਇਰੈਕਟਰ ਲਾਰੀਸਾ ਲਿਓਨੀਡੋਵਨਾ ਨੇ ਕਿਹਾ ਕਿ ਉੱਥੇ ਰਹਿਣਾ ਸੁਰੱਖਿਅਤ ਨਹੀਂ ਹੈ। ਰਾਕੇਟ ਡਿੱਗ ਰਹੇ ਸਨ। ਉਹ ਕੀਵ 'ਤੇ ਹਮਲਾ ਕਰ ਰਹੇ ਸਨ। ਬੰਬ ਧਮਾਕੇ ਦੌਰਾਨ ਅਸੀਂ ਕਈ ਘੰਟਿਆਂ ਤੋਂ ਵੱਧ ਜ਼ਮੀਨਦੋਜ਼ ਬਿਤਾਏ।
ਇਹ ਵੀ ਪੜ੍ਹੋ : ਯੂਕਰੇਨ ’ਚੋਂ ਆਏ ਵਿਦਿਆਰਥੀਆਂ ਨੇ ਸੋਨੂੰ ਸੂਦ ਦਾ ਭਰੇ ਮਨ ਨਾਲ ਕੀਤਾ ਧੰਨਵਾਦ
ਸ਼ੁਰੂਆਤੀ ਅੰਕੜਿਆਂ ਅਨੁਸਾਰ, ਯੂਕਰੇਨ ਤੋਂ ਅੱਧੇ ਤੋਂ ਵੱਧ ਸ਼ਰਨਾਰਥੀ ਲਗਭਗ 5,05,000 ਲੋਕ ਪੋਲੈਂਡ ਗਏ ਹਨ, 1,16,300 ਤੋਂ ਵੱਧ ਲੋਕ ਹੰਗਰੀ ਅਤੇ 79,300 ਤੋਂ ਵੱਧ ਲੋਕ ਮੋਲਡੋਵਾ ਵਿੱਚ ਦਾਖਲ ਹੋਏ ਹਨ। ਇਨ੍ਹਾਂ ਤੋਂ ਇਲਾਵਾ 71,000 ਲੋਕ ਸਲੋਵਾਕੀਆ ਅਤੇ 69,600 ਦੇ ਕਰੀਬ ਲੋਕ ਦੂਜੇ ਯੂਰਪੀ ਦੇਸ਼ਾਂ ਵਿਚ ਜਾ ਚੁੱਕੇ ਹਨ।
ਪੀਟੀਆਈ- ਭਾਸ਼ਾ