ਨਵੀਂ ਦਿੱਲੀ: ਬ੍ਰਿਟੇਨ 'ਚ ਆਪਣੇ ਬਿਆਨ ਨੂੰ ਲੈ ਕੇ ਹੋਏ ਹੰਗਾਮੇ ਅਤੇ ਸਰਕਾਰ ਵਲੋਂ ਮੁਆਫੀ ਮੰਗਣ ਦੀ ਮੰਗ ਦੇ ਵਿਚਕਾਰ ਰਾਹੁਲ ਗਾਂਧੀ ਨੇ ਬੁੱਧਵਾਰ ਨੂੰ ਏਲਾਰਾ ਨਾਂ ਦੀ ਵਿਦੇਸ਼ੀ ਇਕਾਈ 'ਤੇ ਸਵਾਲ ਚੁੱਕਦੇ ਹੋਏ ਅਡਾਨੀ ਸਮੂਹ ਅਤੇ ਸਰਕਾਰ 'ਤੇ ਨਵਾਂ ਹਮਲਾ ਬੋਲਿਆ ਹੈ। ਆਪਣੀ ਵਿਦੇਸ਼ ਯਾਤਰਾ ਤੋਂ ਦਿੱਲੀ ਪਰਤਣ ਤੋਂ ਬਾਅਦ ਗਾਂਧੀ ਨੇ ਦੋਸ਼ ਲਾਇਆ ਕਿ ਮਿਜ਼ਾਈਲ ਅਤੇ ਰਾਡਾਰ ਅਪਗ੍ਰੇਡ ਕਰਨ ਦਾ ਠੇਕਾ ਅਡਾਨੀ ਗਰੁੱਪ ਅਤੇ ਏਲਾਰਾ ਨੂੰ ਦਿੱਤਾ ਗਿਆ ਸੀ। ਇੱਕ ਟਵੀਟ ਵਿੱਚ ਉਹਨਾਂ ਨੇ ਕਿਹਾ ਕਿ ‘ਭਾਰਤ ਦੇ ਮਿਜ਼ਾਈਲ ਅਤੇ ਰਾਡਾਰ ਅਪਗ੍ਰੇਡ ਦੇ ਠੇਕੇ ਅਡਾਨੀ ਦੀ ਮਲਕੀਅਤ ਵਾਲੀ ਇੱਕ ਕੰਪਨੀ ਅਤੇ ਇਲਾਰਾ ਨਾਮ ਦੀ ਇੱਕ ਸ਼ੱਕੀ ਵਿਦੇਸ਼ੀ ਸੰਸਥਾ ਨੂੰ ਦਿੱਤੇ ਗਏ ਹਨ।’

ਏਲਾਰਾ ਨੂੰ ਕੌਣ ਕੰਟਰੋਲ ਕਰ ਰਿਹਾ ਹੈ ?: ਰਾਹੁਲ ਗਾਂਧੀ ਨੇ ਕਿਹਾ ਕਿ ਰਣਨੀਤਕ ਰੱਖਿਆ ਉਪਕਰਨਾਂ ਦਾ ਕੰਟਰੋਲ ਅਣਜਾਣ ਵਿਦੇਸ਼ੀ ਸੰਸਥਾਵਾਂ ਨੂੰ ਦੇ ਕੇ ਭਾਰਤ ਦੀ ਰਾਸ਼ਟਰੀ ਸੁਰੱਖਿਆ ਨਾਲ ਸਮਝੌਤਾ ਕਿਉਂ ਕੀਤਾ ਜਾ ਰਿਹਾ ਹੈ ? ਰਾਹੁਲ ਗਾਂਧੀ ਜਿੱਥੇ ਵਿਵਾਦਾਂ ਵਿੱਚ ਹਨ, ਉੱਥੇ ਹੀ ਵਿਰੋਧੀ ਧਿਰ ਅਡਾਨੀ ਵਿਵਾਦ ‘ਤੇ ਇੱਕਜੁੱਟ ਹੈ। ਤ੍ਰਿਣਮੂਲ ਕਾਂਗਰਸ ਹਾਲਾਂਕਿ ਕਾਂਗਰਸ ਦੀ ਅਗਵਾਈ ਵਾਲੀ ਗੁੱਟਬੰਦੀ ਤੋਂ ਦੂਰ ਰਹੀ ਹੈ। ਕਾਂਗਰਸ ਪ੍ਰਧਾਨ ਮਲਿਕਾਰਜੁਨ ਖੜਗੇ ਨੇ ਆਪਣੇ ਬ੍ਰਿਟੇਨ ਦੇ ਭਾਸ਼ਣ ਵਿੱਚ ਰਾਹੁਲ ਗਾਂਧੀ ਵੱਲੋਂ ਕਿਸੇ ਵੀ ਤਰ੍ਹਾਂ ਦੀ ਮੁਆਫੀ ਮੰਗਣ ਤੋਂ ਇਨਕਾਰ ਕੀਤਾ ਹੈ।

ਖੜਗੇ ਨੇ ਕਿਹਾ ਕਿ ਗਾਂਧੀ ਨੇ ਕੁਝ ਗਲਤ ਨਹੀਂ ਕਿਹਾ ਅਤੇ ਸਿਰਫ ਲੋਕਤੰਤਰ ਦੀ ਗੱਲ ਕੀਤੀ, ਜਦਕਿ ਪ੍ਰਧਾਨ ਮੰਤਰੀ ਨੇ ਵਿਦੇਸ਼ਾਂ 'ਚ ਕਈ ਥਾਵਾਂ 'ਤੇ ਬੋਲ ਕੇ ਦੇਸ਼ ਦਾ ਅਪਮਾਨ ਕੀਤਾ। ਰਾਹੁਲ ਗਾਂਧੀ ਦੇ ਬਿਆਨ ਨੂੰ ਲੈ ਕੇ ਹੋਏ ਹੰਗਾਮੇ ਦਰਮਿਆਨ ਕਾਂਗਰਸ ਨੇ ਇਹ ਸਪੱਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ਕਿ ਪਾਰਟੀ ਇਸ ਮੁੱਦੇ 'ਤੇ ਝੁਕਣ ਵਾਲੀ ਨਹੀਂ ਹੈ ਅਤੇ ਇਸ ਮੁੱਦੇ 'ਤੇ ਹਮਲਾਵਰ ਹੋ ਕੇ ਹਿੰਡਨਬਰਗ-ਅਡਾਨੀ ਵਿਵਾਦ 'ਚ ਜੇਪੀਸੀ ਦੀ ਮੰਗ ਕਰੇਗੀ।

ਪ੍ਰਧਾਨ ਮੰਤਰੀ ਉੱਤੇ ਸਾਧਿਆ ਨਿਸ਼ਾਨਾਂ: ਪੀਐੱਮ ਮੋਦੀ 'ਤੇ ਨਿਸ਼ਾਨਾ ਸਾਧਦੇ ਹੋਏ ਕਾਂਗਰਸ ਪ੍ਰਧਾਨ ਅਤੇ ਵਿਰੋਧੀ ਧਿਰ ਦੇ ਨੇਤਾ ਮੱਲਿਕਾਰਜੁਨ ਖੜਗੇ ਨੇ ਟਵੀਟ ਕੀਤਾ ਸੀ, ਮੈਂ ਤੁਹਾਨੂੰ ਚੀਨ 'ਚ ਦਿੱਤੇ ਤੁਹਾਡੇ ਬਿਆਨ ਦੀ ਯਾਦ ਦਿਵਾਉਣਾ ਚਾਹੁੰਦਾ ਹਾਂ। ਤੁਸੀਂ ਕਿਹਾ, ਪਹਿਲਾਂ ਤੁਹਾਨੂੰ ਭਾਰਤੀ ਹੋਣ 'ਤੇ ਸ਼ਰਮ ਆਉਂਦੀ ਸੀ। ਹੁਣ ਤੁਸੀਂ ਦੇਸ਼ ਦੀ ਨੁਮਾਇੰਦਗੀ ਕਰਦਿਆਂ ਮਾਣ ਮਹਿਸੂਸ ਕਰਦੇ ਹੋ ਕੀ ਇਹ ਭਾਰਤ ਅਤੇ ਭਾਰਤੀਆਂ ਦਾ ਅਪਮਾਨ ਨਹੀਂ ਸੀ? ਆਪਣੇ ਮੰਤਰੀਆਂ ਨੂੰ ਕਹੋ ਕਿ ਉਹ ਆਪਣੀਆਂ ਯਾਦਾਂ ਨੂੰ ਤਾਜ਼ਾ ਕਰਨ। (ਆਈ.ਏ.ਐਨ.ਐਸ)

ਇਹ ਵੀ ਪੜੋ:- Adani Row: ਅਡਾਨੀ ਮੁੱਦੇ 'ਤੇ ਵਿਰੋਧੀ ਧਿਰ ਦੇ ਸੰਸਦ ਮੈਂਬਰਾਂ ਨੇ ED ਦਫ਼ਤਰ ਤੱਕ ਕੱਢੀ ਰੈਲੀ, ਪੁਲਿਸ ਨੇ ਵਿਜੇ ਚੌਕ 'ਤੇ ਰੋਕਿਆ