ਹੈਦਰਾਬਾਦ: ਅੰਤਰਰਾਸ਼ਟਰੀ ਪੁਲਾੜ ਕੇਂਦਰ (ISS) ਵਿੱਚ 9 ਮਹੀਨੇ ਬਿਤਾਉਣ ਤੋਂ ਬਾਅਦ ਪੁਲਾੜ ਯਾਤਰੀ ਸੁਨੀਤਾ ਵਿਲੀਅਮਜ਼ ਅਤੇ ਬੁਚ ਵਿਲਮੋਰ ਆਖਿਰਕਾਰ ਘਰ ਪਰਤ ਆਏ ਹਨ। ਉਨ੍ਹਾਂ ਦੀ ਵਾਪਸੀ ਤੋਂ ਬਾਅਦ ਹੁਣ ਕਈ ਲੋਕਾਂ ਦੇ ਮਨਾਂ 'ਚ ਇਹ ਸਵਾਲ ਉੱਠ ਰਿਹਾ ਹੈ ਕਿ ਨਾਸਾ ਇਨ੍ਹਾਂ ਦੋਵਾਂ ਪੁਲਾੜ ਯਾਤਰੀਆਂ ਨੂੰ ਕਿੰਨਾ ਪੈਸਾ ਦੇਵੇਗੀ? ਕੀ ਉਨ੍ਹਾਂ ਨੂੰ ਓਵਰਟਾਈਮ ਮਿਲੇਗਾ? ਇੱਥੇ ਅਸੀਂ ਇਨ੍ਹਾਂ ਸਾਰੀਆਂ ਚੀਜ਼ਾਂ ਬਾਰੇ ਜਾਣਕਾਰੀ ਦੇਣ ਜਾ ਰਹੇ ਹਾਂ।
ਨਾਸਾ ਸੁਨੀਤਾ ਵਿਲੀਅਮਜ਼ ਅਤੇ ਵਿਲਮੋਰ ਨੂੰ ਕਿੰਨਾ ਵਾਧੂ ਭੁਗਤਾਨ ਕਰੇਗਾ?
ਹੈਰਾਨੀ ਦੀ ਗੱਲ ਹੈ ਕਿ ਹੋਰ ਨੌਕਰੀਆਂ ਦੇ ਉਲਟ, ਪੁਲਾੜ ਮਿਸ਼ਨਾਂ 'ਤੇ ਸਮਾਂ ਬਿਤਾਉਣ ਵਾਲੇ ਪੁਲਾੜ ਯਾਤਰੀਆਂ ਨੂੰ ਕੋਈ ਵਿਸ਼ੇਸ਼ ਓਵਰਟਾਈਮ ਮੁਆਵਜ਼ਾ ਨਹੀਂ ਦਿੱਤਾ ਜਾਂਦਾ ਹੈ। ਰਿਟਾਇਰਡ ਨਾਸਾ ਪੁਲਾੜ ਯਾਤਰੀ ਕੈਡੀ ਕੋਲਮੈਨ ਨੇ ਕਿਹਾ ਕਿ ਪੁਲਾੜ ਯਾਤਰੀ ਇੱਕ ਸੰਘੀ ਕਰਮਚਾਰੀ ਹੈ। ਅਜਿਹੀ ਸਥਿਤੀ ਵਿੱਚ ਪੁਲਾੜ ਵਿੱਚ ਬਿਤਾਇਆ ਗਿਆ ਉਨ੍ਹਾਂ ਦਾ ਸਾਰਾ ਸਮਾਂ ਧਰਤੀ ਉੱਤੇ ਕਿਸੇ ਵੀ ਆਮ ਕੰਮਕਾਜੀ ਦਿਨ ਵਾਂਗ ਹੀ ਗਿਣਿਆ ਜਾਵੇਗਾ, ਜਿਸ ਵਿੱਚ ਲੰਬੇ ਸਮੇਂ ਲਈ ਕੋਈ ਵਾਧੂ ਭੁਗਤਾਨ ਨਹੀਂ ਕੀਤਾ ਜਾਵੇਗਾ।
ਪੁਲਾੜ ਯਾਤਰੀਆਂ ਨੂੰ ਉਨ੍ਹਾਂ ਦੇ ਮਿਸ਼ਨਾਂ ਦੀ ਮਿਆਦ ਲਈ ਉਨ੍ਹਾਂ ਦੀ ਆਮ ਤਨਖ਼ਾਹ ਮਿਲਦੀ ਹੈ। ਹਾਲਾਂਕਿ NASA ਉਨ੍ਹਾਂ ਦੇ ਗੁਜ਼ਾਰੇ ਅਤੇ ਰਹਿਣ ਦੇ ਖਰਚਿਆਂ ਨੂੰ ਕਵਰ ਕਰਦਾ ਹੈ, ਜਦੋਂ ਉਹ ISS 'ਤੇ ਹੁੰਦੇ ਹਨ। ਜਾਣਕਾਰੀ ਅਨੁਸਾਰ ਪੁਲਾੜ ਯਾਤਰੀਆਂ ਨੂੰ ਵਾਧੂ ਭੁਗਤਾਨ ਵਜੋਂ ਰੋਜ਼ਾਨਾ ਇੱਕ ਛੋਟਾ ਜਿਹਾ ਵਜ਼ੀਫ਼ਾ ਮਿਲਦਾ ਹੈ। ਨਾਸਾ ਇਸ ਨੂੰ ਮਾਮੂਲੀ ਖਰਚਿਆਂ ਲਈ ਦਿੰਦਾ ਹੈ। ਕੋਲਮੈਨ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪ੍ਰਤੀ ਦਿਨ 4 ਡਾਲਰ (ਕਰੀਬ 347 ਰੁਪਏ) ਵਜ਼ੀਫੇ ਵਜੋਂ ਮਿਲਦੇ ਸਨ।
ਤੁਹਾਡੀ ਜਾਣਕਾਰੀ ਲਈ ਅਸੀਂ ਤੁਹਾਨੂੰ ਦੱਸ ਦਈਏ ਕਿ ਕੋਲਮੈਨ 2010-11 ਵਿੱਚ ਜਦੋਂ ਆਪਣੇ 159 ਦਿਨਾਂ ਦੇ ਮਿਸ਼ਨ 'ਤੇ ਸੀ, ਜਦੋਂ ਉਹ ਵਾਪਸ ਆਈ ਸੀ ਤਾਂ ਉਨ੍ਹਾਂ ਨੇ ਕੁੱਲ 636 ਡਾਲਰ ਯਾਨੀ ਕਿ 55,000 ਰੁਪਏ ਤੋਂ ਵੱਧ ਦੀ ਕਮਾਈ ਕੀਤੀ ਸੀ। ਇਸੇ ਤਰ੍ਹਾਂ ਜੇਕਰ ਅਸੀਂ ਅੰਦਾਜ਼ਾ ਲਗਾਉਂਦੇ ਹਾਂ ਤਾਂ ਵਿਲੀਅਮਜ਼ ਅਤੇ ਵਿਲਮੋਰ, ਜਿਨ੍ਹਾਂ ਨੇ ਪੁਲਾੜ ਵਿੱਚ 287 ਤੋਂ ਵੱਧ ਦਿਨ ਬਿਤਾਏ ਹਨ। ਉਨ੍ਹਾਂ ਨੂੰ ਇਸ ਮਿਸ਼ਨ ਦੇ ਲੰਬੇ ਸਮੇਂ ਲਈ ਲੱਗਭਗ 1,148 ਡਾਲਰ ਯਾਨੀ ਲਗਭਗ 1 ਲੱਖ ਰੁਪਏ ਵਾਧੂ ਮੁਆਵਜ਼ੇ ਵਜੋਂ ਮਿਲ ਸਕਦੇ ਹਨ।
ਸੁਨੀਤਾ ਵਿਲੀਅਮਜ਼ ਅਤੇ ਬੁੱਚ ਵਿਲਮੋਰ ਦੀ GS-15 ਤਨਖ਼ਾਹ
ਤੁਹਾਨੂੰ ਦੱਸ ਦਈਏ ਕਿ ਸੁਨੀਤਾ ਵਿਲੀਅਮਜ਼ ਅਤੇ ਬੁਚ ਵਿਲਮੋਰ ਦੋਵੇਂ ਜੀਐਸ-15 ਪੇ ਗ੍ਰੇਡ ਦੇ ਅਧੀਨ ਆਉਂਦੇ ਹਨ, ਜੋ ਕਿ ਸੰਘੀ ਕਰਮਚਾਰੀਆਂ ਲਈ ਜਨਰਲ ਅਨੁਸੂਚੀ (ਜੀਐਸ) ਪ੍ਰਣਾਲੀ ਵਿੱਚ ਸਭ ਤੋਂ ਵੱਧ ਹੈ। ਇਸ ਗ੍ਰੇਡ ਦੇ ਪੁਲਾੜ ਯਾਤਰੀਆਂ ਨੂੰ 125,133 ਡਾਲਰ ਤੋਂ 162,672 ਡਾਲਰ ਪ੍ਰਤੀ ਸਾਲ (ਲੱਗਭਗ 1.08 ਕਰੋੜ ਤੋਂ 1.41 ਕਰੋੜ ਰੁਪਏ) ਦੀ ਤਨਖ਼ਾਹ ਦਿੱਤੀ ਜਾਂਦੀ ਹੈ। ਕਿਉਂਕਿ ਉਨ੍ਹਾਂ ਦਾ ਮਿਸ਼ਨ ਲੰਬਾ ਸੀ, ਉਨ੍ਹਾਂ ਦੀ ਤਨਖ਼ਾਹ ISS 'ਤੇ ਬਿਤਾਏ ਸਮੇਂ ਦੇ ਅਧਾਰ 'ਤੇ ਅਨੁਪਾਤ ਅਨੁਸਾਰ ਕੀਤੀ ਜਾਵੇਗੀ।
ਨੌਂ ਮਹੀਨਿਆਂ ਦੇ ਮਿਸ਼ਨ 'ਤੇ ਕਿੰਨੀ ਕਮਾਈ ਹੋਈ?
ਕੁਝ ਰਿਪੋਰਟਾਂ ਦੇ ਅਨੁਸਾਰ ਉਨ੍ਹਾਂ ਦੇ ਨੌਂ ਮਹੀਨਿਆਂ ਦੇ ਮਿਸ਼ਨ ਲਈ ਸੁਨੀਤਾ ਵਿਲੀਅਮਜ਼ ਅਤੇ ਬੁਚ ਵਿਲਮੋਰ ਨੂੰ 93,850 ਡਾਲਰ ਤੋਂ 122,004 ਡਾਲਰ ਯਾਨੀ ਲੱਗਭਗ 81 ਲੱਖ ਤੋਂ 1.05 ਕਰੋੜ ਰੁਪਏ ਦੀ ਅਨੁਪਾਤਕ ਤਨਖ਼ਾਹ ਦਿੱਤੀ ਜਾਵੇਗੀ। ਜੇਕਰ ਅਸੀਂ ਇਸ ਤਨਖ਼ਾਹ ਵਿੱਚ 1,148 ਡਾਲਰ ਦੀ ਵਾਧੂ ਤਨਖ਼ਾਹ ਨੂੰ ਜੋੜਦੇ ਹਾਂ, ਤਾਂ ਇਸ ਮਿਸ਼ਨ ਦੌਰਾਨ ਉਨ੍ਹਾਂ ਦੀ ਕੁੱਲ ਕਮਾਈ 94,998 ਡਾਲਰ ਤੋਂ 123,152 ਡਾਲਰ ਯਾਨੀ ਲੱਗਭਗ 82 ਲੱਖ ਤੋਂ 1.06 ਕਰੋੜ ਰੁਪਏ ਦੇ ਵਿਚਕਾਰ ਹੋਵੇਗੀ।
