ଲଣ୍ଡନ: ସାଧାରଣତଃ 20 ରୁ 30 ବର୍ଷ ମଧ୍ୟରେ ଆମେ କୌଣସି ସ୍ବାସ୍ଥ୍ୟଗତ ସମସ୍ୟା କଥା ଚିନ୍ତା କରିନଥାନ୍ତି । କିନ୍ତୁ ସାମ୍ପ୍ରତିକ ଅନୁସନ୍ଧାନରୁ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି । ଜଣାପଡିଛି ଯେ 1990 ପରେ ଜନ୍ମ ହୋଇଥିବା ଲୋକମାନେ ଅନ୍ୟ ପିଢି ଅପେକ୍ଷା 50 ବର୍ଷ ବୟସ ପୂର୍ବରୁ କ୍ୟାନ୍ସରରେ ପୀଡିତ ହେବାର ଆଶଙ୍କା ଅଧିକ(preventable cancer) । ଏନେଇ ଇଂଲଣ୍ଡ ଲାନ୍ସେଷ୍ଟର ବିଶ୍ୱବିଦ୍ୟାଳୟର ସାର୍ହ ଆଲିନ୍ସନ୍(Sarah Allinson) ସୂଚନା ଦେଇଛନ୍ତି ।
ସାଧାରଣତଃ ପ୍ରାରମ୍ଭିକ ପର୍ଯ୍ୟାୟରେ ଆମ ଜୀବନଶୈଳୀ ଉପରେ ନିର୍ଭର କରେ କ୍ୟାନ୍ସର । ତେଣୁ କର୍କଟ ରୋଗ ହେବାର ଆଶଙ୍କା ହ୍ରାସ କରିବା ପାଇଁ ନିମ୍ନରେ କେତେକ ଗୁରୁତ୍ବପୂର୍ଣ୍ଣ ଜୀବନଶୈଳୀ ପରିବର୍ତ୍ତନ ଉପରେ ଆଲୋଚନା କରାଯାଇଛି...
1. ଧୂମପାନ କରନ୍ତୁ ନାହିଁ: ଧୂମପାନ ଯେ, କେବଳ ଫୁସଫୁସ କର୍କଟ ରୋଗର ମୁଖ୍ୟ କାରଣ ତାହା ନୁହେଁ । ଏହା ପାଟି ଏବଂ ଗଳା କର୍କଟ ସହ ଅନ୍ୟ 14 ପ୍ରକାରର କର୍କଟ ରୋଗ ସହ ଜଡିତ । ଅନୁସନ୍ଧାନରୁ ଜଣାପଡିଛି ଯେ, ପ୍ରତି 10 ଜଣଙ୍କ ମଧ୍ୟରୁ ନଅ ଜଣ 25 ବର୍ଷ ବୟସ ପୂର୍ବରୁ ଧୂମପାନ ଅଭ୍ୟାସ ଆରମ୍ଭ କରିଥାନ୍ତି । ଯଦି ଆପଣ ବିଭିନ୍ନ ପ୍ରକାର ସ୍ବାସ୍ଥ୍ୟ ସମସ୍ୟାକୁ ଦୂର କରିବାକୁ ଚାହୁଁଛନ୍ତି ତେବେ ଧୂମପାନ ଠାରୁ ଦୂରେଇ ରହନ୍ତୁ ।
ଧୂମପାନ ଅପେକ୍ଷା ବାଷ୍ପ ନିଶ୍ଚିତ ଭାବରେ କମ୍ କ୍ଷତିକାରକ ହୋଇଥିବାବେଳେ ଏହାର ଦୀର୍ଘକାଳୀନ ପ୍ରଭାବ ଏପର୍ଯ୍ୟନ୍ତ ଅଧ୍ୟୟନ କରାଯାଇ ନାହିଁ । ଏହି କାରଣରୁ, Cancer Research UK ଧୂମପାନ ଛାଡିବାରେ ସାହାଯ୍ୟ କରିବା ପାଇଁ କେବଳ ଇ-ସିଗାରେଟ ବ୍ୟବହାର କରିବାକୁ ପରାମର୍ଶ ଦେଇଛି ।
2. ନିରାପଦ ଯୌନ ସମ୍ପର୍କ ରଖନ୍ତୁ:- HPV (ହ୍ୟୁମାନ୍ ପାପିଲୋମାଭାଇରସ୍) ଯାହା ଜେନେଟାଲ୍ ୱାର୍ଟ ସୃଷ୍ଟି କରେ, ଏହା ଦୁନିଆରେ ସବୁଠାରୁ ସାଧାରଣ ଯୌନ ସଂକ୍ରମଣ । ଏହା ମଧ୍ୟ ଗର୍ଭାଶୟ, ଲିଙ୍ଗ, ପାଟି ଏବଂ ଗଳା କର୍କଟ ସହିତ ବିଭିନ୍ନ କର୍କଟ ରୋଗର କାରଣ ହୋଇପାରେ । ଯୁବକମାନଙ୍କ ମଧ୍ୟରେ HPV- ସମ୍ବନ୍ଧୀୟ କର୍କଟ ବିଶେଷ ଭାବରେ ଦେଖାଯାଏ । କେବଳ ବ୍ରିଟେନରେ, 30-34 ବର୍ଷ ବୟସର ମହିଳାମାନଙ୍କଠାରେ ଗର୍ଭାଶୟ କର୍କଟ ଚିହ୍ନଟ କରାଯାଇଛି ।
ଏହା ମଧ୍ୟ ଚିନ୍ତା କରାଯାଇଛି ଯେ, HPV ର ବୃଦ୍ଧି ହାର ଯୁବକମାନଙ୍କ ନିକଟରେ ପାଟିରେ କର୍କଟ ରୋଗର ବୃଦ୍ଧି ଘଟାଇପାରେ । HPV ବିରୁଦ୍ଧରେ ଟୀକାକରଣ ଏବଂ ନିରାପଦ ଯୌନ ଅଭ୍ୟାସ ଆପଣଙ୍କୁ ଜୀବାଣୁ ସଂକ୍ରମଣରୁ ରକ୍ଷା କରିବ । ମହିଳାମାନଙ୍କ ପାଇଁ, ଗର୍ଭାଶୟ ସ୍କ୍ରିନିଂ(a smear test) ମଧ୍ୟ ଗୁରୁତ୍ୱପୂର୍ଣ୍ଣ, କାରଣ ଏହା କର୍କଟ ସଂକ୍ରମଣ ପୂର୍ବରୁ HPV ସଂକ୍ରମଣ ବାବଦରେ ପୂର୍ବାନୁମାନ କରିପାରେ । ତେଣୁ 25 ରୁ 64 ମଧ୍ୟରେ ଥିବା ମହିଳାମାନେ ପ୍ରତି ପାଞ୍ଚ ବର୍ଷରେ ଥରେ ନିୟମିତ ସ୍କ୍ରିନିଂ କରିବା ଉଚିତ୍ ।
3. ଏକ ସୁସ୍ଥ ଓଜନ ବଜାୟ ରଖନ୍ତୁ: ଅଧିକ ଓଜନ କିମ୍ବା ମୋଟାପଣ 13 ଟି ବିଭିନ୍ନ କର୍କଟ ରୋଗର ଆଶଙ୍କା ସହିତ ଜଡିତ, ଯେପରିକି ଅନ୍ତନଳୀ, ସ୍ତନ, ଗର୍ଭାଶୟ ଏବଂ ଅଗ୍ନାଶୟ ଇତ୍ୟାଦି । ଅତ୍ୟଧିକ ଚର୍ବି ଶରୀରରେ ପ୍ରଦାହ ସୃଷ୍ଟି କରେ ଯାହା ଟ୍ୟୁମରର ବୃଦ୍ଧିକୁ ପ୍ରୋତ୍ସାହିତ କରେ ଏବଂ କର୍କଟ କୋଷଗୁଡ଼ିକୁ ବିଭାଜନ କରିବାରେ ସାହାଯ୍ୟ କରେ । ଫ୍ୟାଟ୍ କୋଷଗୁଡ଼ିକ ମଧ୍ୟ ହରମନ୍ ଇଷ୍ଟ୍ରୋଜେନ୍ ଉତ୍ପାଦନ କରନ୍ତି, ଯାହା ସ୍ତନ ଏବଂ ଗର୍ଭରେ ଟ୍ୟୁମରର ବୃଦ୍ଧି କରାଇଥାଏ ।
ଏହି କାରଣରୁ, ମହିଳାମାନଙ୍କଠାରେ କର୍କଟ ରୋଗର ଆଶଙ୍କା ଅଧିକ ଦେଖାଯାଏ । ଅଧିକ ଓଜନ କିମ୍ବା ମେଦବହୁଳତା ସହିତ ଜଡିତ କର୍କଟ ଅଧିକ ସାଧାରଣ ହେବାରେ ଲାଗିଛି, ବିଶେଷ କରି କମ୍ ବୟସ୍କମାନଙ୍କଠାରେ । କେବଳ ସେତିକି ନୁହେଁ, ଖରାପ ଖାଦ୍ୟ ଗ୍ରହଣ ମଧ୍ୟ କର୍କଟରେ ଆକ୍ରାନ୍ତ କରିପାରେ । ଉଦାହରଣ ସ୍ୱରୂପ, ଅତ୍ୟଧିକ ଲାଲ୍ ଏବଂ ପ୍ରକ୍ରିୟାକୃତ ମାଂସ ଖାଇବା ଦ୍ୱାରା ଅନ୍ତନଳୀ କର୍କଟ ହେବାର ସମ୍ଭାବନା ରହିଛି ।
4. ମଦ୍ୟପାନ କମ୍ କରନ୍ତୁ: ମଦ୍ୟପାନ ଯକୃତ, ସ୍ତନ ଏବଂ ଏସୋଫାଗସ୍ ସହିତ ଅନେକ କର୍କଟ ରୋଗ ହେବାର ଆଶଙ୍କା ବୃଦ୍ଧି କରିଥାଏ । ମାତ୍ରାଧିକ ମଦ୍ୟପାନ, ନାନା ବିପଦ ସୃଷ୍ଟି କରିଥାଏ । ଏହାର ଅର୍ଥ ନୁହେଁ କମ୍ ମଦ୍ୟପାନରେ ବିପଦ ନଥାଏ । ଅନୁସନ୍ଧାନ ଅନୁଯାୟୀ ମଧ୍ୟମ ପରିମାଣରେ ମଦ୍ୟପାନ କାରଣରୁ ବିଶ୍ବବ୍ୟାପୀ କର୍କଟ ରୋଗର ବାର୍ଷିକ 100,000 ରୋଗୀ ଚିହ୍ନଟ ହୋଇଥାନ୍ତି ।
ଯଦିଓ ମଦ୍ୟପାନର ପ୍ରଭାବ ଅଧିକ ଅଧ୍ୟୟନ କରାଯାଇନାହିଁ, ଗୋଟିଏ ଅଧ୍ୟୟନରୁ ଜଣାପଡିଛି ଯେ, ମଧ୍ୟମ ପାନୀୟ ଯେଉଁମାନେ ନିୟମିତ ଭାବରେ ପାନ କରନ୍ତି ସେମାନଙ୍କର ସ୍ତନ କର୍କଟ ହେବାର ସମ୍ଭାବନା 50% ଅଧିକ । ମଦ୍ୟପାନ କରିବା ସମୟରେ ଧୂମପାନ କରିବା ଦ୍ୱାରା ଧୂମପାନର କର୍କଟ ସୃଷ୍ଟି କରୁଥିବା ପ୍ରଭାବ ମଧ୍ୟ ବଢିପାରେ । NHS ସୁପାରିଶ କରେ ଯେ, ସପ୍ତାହରେ 14 ୟୁନିଟ୍ରୁ ଅଧିକ ମଦ୍ୟପାନ କରନ୍ତୁ ନାହିଁ । ଏଥିସହ ପ୍ରତି ସପ୍ତାହରେ ବିନା ମଦ୍ୟପାନରେ ରହିବାକୁ ଚେଷ୍ଟା କରନ୍ତୁ ।
5. ସନ୍ସ୍କ୍ରିନ୍ ଲଗାନ୍ତୁ: ଚର୍ମ କର୍କଟ ହେଉଛି 40 ବର୍ଷରୁ କମ୍ ରୋଗରେ ଚିହ୍ନଟ ହୋଇଥିବା ସବୁଠାରୁ ସାଧାରଣ କର୍କଟ ମଧ୍ୟରୁ ଗୋଟିଏ । ବିଗତ କିଛି ଦଶନ୍ଧି ମଧ୍ୟରେ ଏହା ମଧ୍ୟ ସାଧାରଣ ହୋଇଗଲାଣି । ଚର୍ମ କର୍କଟ ରୋଗର ମୂଳ କାରଣ ହେଉଛି ସୂର୍ଯ୍ୟକିରଣରୁ ନିର୍ଗତ ହେଉଥିବା ଅତିବାଇଗଣି ରଶ୍ମି । ତେମୁ ସନ୍ସ୍କ୍ରିନ୍ ବ୍ୟବହାରର ଅଭ୍ୟାସ କରନ୍ତୁ ।
