ସୁବର୍ଣ୍ଣପୁର: ଚଳିତ ଖରିଫ ୠତୁ ଧାନ ବିକ୍ରି ପାଇଁ ପଞ୍ଜିକରଣରେ ହେଉଥିବା ସମସ୍ୟା ଯୋଗୁଁ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଛନ୍ତି ଚାଷୀମାନେ । ଏନେଇ ସୁବର୍ଣ୍ଣପୁର ଜିଲ୍ଲା ଦୁର୍ଜନତୈଲା ପଞ୍ଚାୟତର ଚାଷୀମାନେ ପଞ୍ଜିକରଣ ସମସ୍ୟାର ସମାଧାନ କରିବା ସହିତ ଏହାକୁ ସରଳୀକରଣ କରିବା ନେଇ ଜିଲ୍ଲାପାଳଙ୍କ ନିକଟରେ ଦାବି ଉପସ୍ଥାପନ କରିଛନ୍ତି ।
ସୂଚନାନୁଯାୟୀ ଗତ ବର୍ଷ ଦୁର୍ଜନତୈଲା ପଞ୍ଚାୟତରେ ଧାନ ସଂଗ୍ରହ ପାଇଁ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ଦାୟିତ୍ବ ଦିଆଯାଇଥିଲା । ତେବେ କୌଣସି କାରଣରୁ ସଂପୃକ୍ତ ଗୋଷ୍ଠୀଙ୍କୁ ପୁଣି ବିରତ କରିବା ସହ ବୀରମହାରାଜପୁର ନିକଟ ନୁଆଁଗଡର ଏକ ମହିଳା ସ୍ବୟଂ ସହାୟକ ଗୋଷ୍ଠୀକୁ ଧାନ ସଂଗ୍ରହ ପାଇଁ ଦାୟିତ୍ବ ଦିଆଯାଇଛି ।
ତେବେ ସଂପୃକ୍ତ ଗୋଷ୍ଠୀର କର୍ମକର୍ତ୍ତା ସେଠାରେ ରହୁ ନ ଥିବାବେଳେ ଦୁର୍ଜନତୈଲାରୁ ବୀରମହାରାଜପୁରକୁ ୩୦ କିଲୋମିଟର ରାସ୍ତା ଚାଷୀମାନେ ପଞ୍ଜିକରଣ ପାଇଁ ଆସୁଛନ୍ତି । ଫଳରେ ଚାଷୀମାନଙ୍କୁ ଅନେକ କଷ୍ଟ ସ୍ବୀକାର କରିବାକୁ ପଡୁଛି । ସେନେଇ ସ୍ଥାନୀୟ ଅଞ୍ଚଳରେ କୌଣସି ମହିଳା ସ୍ବୟଂ ସହାୟକ ଗୋଷ୍ଠୀକୁ ଧାନ ସଂଗ୍ରହ ନେଇ ଦାୟିତ୍ବ ଦେବାକୁ ଜିଲ୍ଲାପାଳଙ୍କୁ ଏକ ସ୍ମାରକ ପତ୍ର ମାଧ୍ୟମରେ ଚାଷୀମାନେ ଦାବି କରିଛନ୍ତି ।
ସେପେଟେ ଏହାର ତୁରନ୍ତ ଏହାର ସମାଧାନ କରିବା ସହ ମହିଳା ସ୍ବୟଂ ସହାୟକ ଗୋଷ୍ଠୀକୁ ପରିବର୍ତନ କରିବାକୁ ଚାଷୀମାନେ ଜିଲ୍ଲା ପ୍ରଶାସନକୁ ନିବେଦନ କରିଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
