ସୁବର୍ଣ୍ଣପୁର: ଜିଲ୍ଲାରେ ଦେଖିବାକୁ ମିଳିଛି ଠିକାଦାରଙ୍କ ଦାଦାଗିରି । ରାସ୍ତାରେ ଯା' ଆସବେଳେ ନିରୀହ ଲୋକଙ୍କ ଉପରେ ଅତ୍ୟାଚାର କରୁଛନ୍ତି ଠିକାଦାର । ଏନେଇ ଥାନାରେ ଅଭିଯୋଗ ପରେ ମଧ୍ୟ ପୋଲିସ ଅଭିଯୋଗକୁ ଗ୍ରହଣ ନକରିବା ନେଇ ସଙ୍ଗୀନ ଅଭିଯୋଗ ଆଣିଛନ୍ତି । ଆଉ ଏହି ଘଟଣାରେ ଲୋକେ ବାଧ୍ୟ ହୋଇ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଦ୍ବାରସ୍ଥ ହୋଇଛନ୍ତି ପୀଡିତା । ସୂଚନାନୁସାରେ ବୀରମହାରାଜପୁରରୁ ଖଣ୍ଡହଥା ରାସ୍ତାରେ ବ୍ରିଜ କାମ ଚାଲିଥିବାବେଳେ ତା ପାଖକୁ ଲାଗି କରି ଚୌକା ଜୋର ନାମକ ଏକ ନାଳ ଥିବାରୁ ଲୋକେ ଯା' ଆସ ବେଳେ ନାନାଦି ସମସ୍ୟାର ସମ୍ମୁଖୀନ ହେଉଛନ୍ତି ।
ସେପଟେ ଏହି ରାସ୍ତା ଦେଇ ବରଘାଟ ଗାଁର ଉତ୍ତମ ବିଶ୍ବାଳ ନିଜ ପରିବାର ସହ ବାଇକ ଯୋଗେ ଯାଉଥିବା ସମୟରେ ସାମ୍ନାପଟୁ ଏକ 10 ଚକିଆ ଟ୍ରକ ଆସିଯିବାରୁ ସେ ରାସ୍ତା ଉପରେ ଅଟକି ଯାଇଥିଲେ । ଆଉ ଠିକ୍ ସମୟରେ ଠିକାଦାର କୃତିବାସ ମିଶ୍ର ନିଜ ଚାରି ଚକିଆ ଯାନରେ ଯାଉଥିବା ସମୟରେ ଉତ୍ତମଙ୍କ ବାଇକ ସହ ଧକ୍କା ଦେଇଥିଲା । ଏତିକିରେ ଠିକାଦାର ଜଣକ ଉତକ୍ଷିପ୍ତ ହୋଇ ଉତ୍ତମକୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ ମାରିଥିବା ନେଇ ଅଭିଯୋଗ ହୋଇଛି । ଏନେଇ ତାଙ୍କ ପତ୍ନୀ ଠିକାଦାରଙ୍କୁ ନେହୁରା ହୋଇଥିଲେ ହେଁ ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରିଥିଲେ ।
ତେବେ ଘଟଣାସ୍ଥଳରେ ଠିକାଦାର ଜଣକ ମଦ୍ୟପାନ କରି ଗାଳି ଗୁଲଜ କରିଥିବା ନେଇ ଅଭିଯୋଗ ଆଣିଛନ୍ତି । ସେପଟେ ଉତ୍ତମଙ୍କ ପତ୍ନୀ ସୁବଳୟା ଥାନାରେ ଲିଖିତ ଅଭିଯୋଗ ଦେଇଥିଲେ ହେଁ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ନଥିବାବେଳେ ଓଲଟା ଠିକାଦାର ଜଣକ ଉତ୍ତମଙ୍କ ନାମରେ ଚୋରି କେସ ଦେଇଥିବା ଜଣାପଡିଛି ।
ଏନେଇ ଜିଲ୍ଲା ଆରକ୍ଷୀ ଅଧିକ୍ଷକଙ୍କୁ ଭେଟି ନ୍ୟାୟ ପାଇଁ ଗୁହାରି କରିଛନ୍ତି ଉତ୍ତମଙ୍କ ପତ୍ନୀ ଓ ଗାଁର ମହିଳାମାନେ । ତେବେ ଧନୀକ ଶ୍ରେଣୀର ଠିକାଦାରଙ୍କ ଉପରେ ପୋଲିସ କାର୍ଯ୍ୟାନୁଷ୍ଠାନ ନେଉ ନଥିବା ଅଭିଯୋଗ ହୋଇଥିବାବେଳେ ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସୁବର୍ଣ୍ଣପୁର ଜିଲ୍ଲା ଆରକ୍ଷୀ ଅଧିକ୍ଷକ ସୀତାରାମ ଶତପଥୀ ପୀଡିତାଙ୍କୁ ପ୍ରତିଶ୍ରୁତି ଦେଇଥିବା ଜଣାପଡିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
