ରାୟଗଡ଼ା ରାୟଗଡ଼ାରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି । ଅପରାହ୍ନ ସମୟରେ କାଳବୈଶାଖୀ ପ୍ରଭାବରେ ବର୍ଷା ସାଙ୍ଗକୁ ଝଡ଼ବତାସ ହୋଇଛି । ଏଥିରେ କିଛି ଲୋକଙ୍କ ଘର ଛପର ଉଡ଼ିଯାଇଥିବାବେଳେ କେତେକ ସ୍ଥାନରେ ଗଛ ପଡ଼ି ରାସ୍ତା ଅବରୋଧ ହୋଇଛି । ବିଶାଖାପାଟଣାକୋରାପୁଟ ଡିଏମୟୁ ଟ୍ରେନ ଉପରେ ଗଛ ଭାଙ୍ଗି ପଡିବାରୁ ୩ ଘଣ୍ଟା ଟ୍ରେନ ଅଟକି ରହିଥିଲା । ବର୍ଷା ସମୟରେ ଆମ୍ବ ଗୋଟାଇ ଯାଇଥିବାବେଳେ ବଜ୍ରାଘାତ ଯୋଗୁଁ ଜଣଙ୍କ ମୃତ୍ୟୁ ଘଟିଛି । ରାୟଗଡ଼ା ଜିଲ୍ଲା ବିଷମକଟକ ବ୍ଲକ ଅଞ୍ଚଳର ଅନେକ ଗ୍ରାମରେ କାଳବୈଶାଖୀର ପ୍ରଭାବ ଦେଖିବାକୁ ମିଳିଛି l ଅପରାହ୍ନ ସମୟରେ ବିଷମକଟକ ଅଞ୍ଚଳର ଅନେକ ଗ୍ରାମରେ ପବନ ବର୍ଷା ସାଙ୍ଗକୁ ଘଡଘଡି ବିଜୁଳି ହେବା ଯୋଗୁଁ ଚାଟିକଣା ମଣ୍ଡାପାଇ ଓ ବଡ ମଟକବାଡି ଗ୍ରାମଗୁଡିକରେ ଅନେକ ଲୋକଙ୍କ ଘର ଛପର ଉଡିଯାଇଛି । ସେହିପରି ରାସ୍ତା ଉପରେ ଗଛପଡି ମଣ୍ଡାପାଇ ଗ୍ରାମରେ ଯାତାୟତ ଠପ ହୋଇଥିବା ଜଣାପଡି଼ଛି । ବଡମଟକ ବାଡି ଗ୍ରାମରେ ଜଣେ ଯୁବକ ଆମ୍ବ ଗୋଟାଇବାକୁ ଯାଇଥିବା ସମୟରେ ବଜ୍ରଘାତରେ ତାଙ୍କ ମୃତ୍ୟୁ ଘଟିଛି । ମୃତ ଯୁବକ ଜଣଙ୍କ ବୁଡୁ କନ୍ଦପାଣି ବୋଲି ଜଣାପଡ଼ିଛି । ଯୁବକ ଜଣକ ପବନ ବର୍ଷାରେ ଆମ୍ବ ଗୋଟାଇବା ସମୟରେ ବିଜୁଳି ମାରିବା ଯୋଗୁଁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଖବର ପାଇ ବିଷମକଟକ ପୋଲିସ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି । ଅନ୍ୟପଟେ କାଳବୈଶାଖୀ ଜନିତ ବର୍ଷା ପ୍ରଭାବରେ ରାୟଗଡ଼ା ବ୍ଲକର ହାଲୁଆ ନିକଟରେ ୩୨୬ ନମ୍ବର ଜାତୀୟ ରାଜପଥର ଏକ ବଡ ଗଛ ଉପୁଡି ପଡିବାରୁ 326 ନମ୍ବର ଜାତୀୟ ରାଜପଥ ଅବରୋଧ ହୋଇଥିଲା । ଫଳରେ ଦୀର୍ଘ ସମୟ ଧରି ରାୟଗଡ଼ାକୋରାପୁଟ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା । ବର୍ଷା ସମୟରେ ଏକ ଗଛ ଭାଙ୍ଗି ବିଶାଖାପାଟଣାକୋରାପୁଟ ଡିଏମୟୁ ଟ୍ରେନ ଉପରେ ପଡ଼ିବାରୁ ଦୀର୍ଘ ତିନି ଘଣ୍ଟା ଧରି ରାୟଗଡ଼ାସିଙ୍ଗାପୁର ରୋଡ ଷ୍ଟେସନ ମଧ୍ୟରେ ଥିବା ବିରନାରାୟଣପୁର ଗାଁ ନିକଟରେ ଟ୍ରେନଟି ଅଟକି ରହିଥିଲା । ଫଳରେ ଏହି ରୁଟରେ ଟ୍ରେନ ଯାତାୟାତ ବାଧାପ୍ରାପ୍ତ ହୋଇଥିଲା । ଖବର ଇ ରାୟଗଡ଼ା ରେଳବାଇ ବିଭାଗର ପିଆରଡି ଓ ଇଂଜିନିୟରିଂ ଟିମ ଘଟଣାସ୍ଥଳରେ ପହଞ୍ଚି ଗଛଟିକୁ କାଟି ସଫା କରିବା ସହ ବିଦ୍ୟୁତ ଲାଇନକୁ ମରାମତି କରିଥିଲେ । ଅପରାହ୍ନ ସାଢେ ୫ଟା ସୁଦ୍ଧା ସମସ୍ତ କାର୍ଯ୍ୟ ଶେଷ ହେବା ପରେ ପୁଣି ଟ୍ରେନଟି କୋରାପୁଟ ଅଭିମୁଖେ ବାହାରିଥିଲା । ସେହିପରି ରାୟଗଡ଼ା ବ୍ଲକର ହାଲୁଆ ନିକଟରେ ୩୨୬ ନମ୍ବର ଜାତୀୟ ରାଜପଥ ଉପରେ ଏକ ବଡ଼ଗଛ ଉପୁଡି ପଡିବାରୁ ରାସ୍ତା ଅବରୋଧ ହୋଇଥିଲା । ଦୀର୍ଘ ସମୟ ଧରି ଯାତାୟାତ ବାଧାପ୍ରାପ୍ତ ହୋଇଥିଲା । ରାସ୍ତାର ଦୁଇ ପାର୍ଶ୍ବରେ ଶତାଧିକ ବସ ଟ୍ରକ କାର ଓ ମୋଟରସାଇକେଲ ଅଟକି ରହିଥିଲା । ଖବରପାଇ ଅଗ୍ନିଶମ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଗଛକାଟି ରାସ୍ତା ସଫା କରିଥିଲେ । ଏହାପରେ ଗାଡ଼ି ଚଳାଚଳ ସ୍ଵାଭାବିକ ହୋଇଥିଲା । ସେପଟେ ଅଦନିଆ କାଳବୈଶାଖୀ ତାଣ୍ଡବ ରଚିଥିବା ବେଳେ ଏହାର ପ୍ରଭାବରେ ଅନେକ ଘରର ଛାତ ଉଡିଯାଇଛି । ଇଟିଭି ଭାରତ ରାୟଗଡ଼ା