ପୁରୀ: ଜିଲ୍ଲାପାଳଙ୍କ ନିର୍ଦ୍ଦେଶ କ୍ରମେ ବ୍ରହ୍ମଗିରି ବ୍ଲକରେ ଅଭିଯୋଗ ଶୁଣାଣୀ କଯ୍ୟକ୍ରମ ଆରମ୍ଭ ହୋଇଯାଇଛି । ପ୍ରଶାସନ ତରବରିଆ ଭାବେ ପୂର୍ବ ଦିନ ରାତିରେ କଯ୍ୟକ୍ରମ କରାଯିବା ପାଇଁ ନିଷ୍ପତି ନେଇଥିଲେ । ସେହି ରାତିରେ କିଛି ପଞ୍ଚାୟତସ୍ତରୀୟ ଲୋକପ୍ରତିନିଧିମାନଙ୍କୁ ଫୋନ ଯୋଗେଁ ବ୍ଲକ ଅଧିକାରୀ ଜଣାଇଥିବା ସୂଚନା ମିଳିଛି । ଏବଂ କିଛି ପ୍ରତିନିଧି ଜାଣିନଥିବା ଅଭିଯୋଗ କରିଛନ୍ତି ।
ଏହି କାର୍ଯ୍ୟକ୍ରମରେ ପୁରୀ ଉପଜିଲ୍ଲାପାଳ ଭାବତାରଣ ସାହୁ, ପୁରୀ ଆରକ୍ଷୀ ଅଧିକ୍ଷକ କେ ବିଶାଳ ସିଂ ଏବଂ ବ୍ରହ୍ମଗିରି ବ୍ଲକ ବିଡ଼ିଓ ଉପସ୍ଥିତ ରହିଥିଲେ । କିଛି ବିଭାଗର ଅଧିକାରୀମାନେ ଉପସ୍ଥିତ ନଥିବା ମଧ୍ୟ ଦେଖିବାକୁ ମିଳିଥିଲା । ଏହି ଅଭିଯୋଗ ଶୁଣାଣିରେ ମାତ୍ର 151 ଜଣ ଅଭିଯୋଗକାରୀ ନିଜର ଅଭିଯୋଗ ଉପସ୍ଥାପନ କରିଥିଲେ।
ଯଦି ଆଗରୁ ଲୋକମାନଙ୍କୁ ସୂଚନା ଦିଆଯାଇଥାନ୍ତା, ଏଥିରୁ ଲୋକମାନେ ବଞ୍ଚିତ ହୋଇନଥାନ୍ତେ । ଅଭିଯୋଗ ମଧ୍ୟରୁ ମୁଖ୍ୟତଃ ଆବାସ ଯୋଜନା ଏବଂ ବାର୍ଦ୍ଧକ୍ୟ ଭତ୍ତା ଉପରେ ଅଭିଯୋଗ ହୋଇଥିଲା । ଏବେବି ବ୍ରହ୍ମଗିରି ବ୍ଲକରେ 70 ବର୍ଷରୁ ଉର୍ଦ୍ଧ୍ବ ବୃଦ୍ଧ ବୃଦ୍ଧା ଅଛନ୍ତି ଓ ସେମାନେ ଅନଲାଇନ ଆବେଦନ କରିଥିଲେ ମଧ୍ୟ ବର୍ଷକରୁ ଅଧିକ ସମୟ ଅପେକ୍ଷା କରି ଭତ୍ତା ପାଇବାରୁ ବଞ୍ଚିତ ଅଛନ୍ତି ।
କିଛି ଲୋକ ପଛରେ ଖବର ପାଇ ଅଭିଯୋଗ ଜଣାଇବା ପାଇଁ ବ୍ଲକରେ ପହଞ୍ଚିଥିଲେ କିନ୍ତୁ ସେହିସମୟରେ ଉପଜିଲ୍ଲାପାଳ ଏବଂ ଆରକ୍ଷୀ ଅଧିକ୍ଷକ ଫେରି ଯାଇଥିଲେ । ଫଳରେ ଗୁହାରି କରିବା ପାଇଁ ଆସିଥିବା ନିରୀହ ଲୋକମାନେ ନିରାଶ ହୋଇ ଘରକୁ ଫେରିଥିଲେ । ତେବେ ଏହି ଅଭିଯୋଗ ଶୁଣାଣି କାର୍ଯ୍ୟକ୍ରମ କାହାପାଇଁ ଆୟୋଜନ କରାଯାଇଥିଲା ତାହା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ଇଟିଭି ଭାରତ, ପୁରୀ
