ନୟାଗଡ଼: ଗ୍ୟାସ ଟାଙ୍କି ଫାଟି ମହିଳା ମୃତ ଘଟଣାରେ ସହାୟତାର ହାତ ବଢାଇଲେ ଜିଲ୍ଲା ପ୍ରଶାସନ । ଗତ ଅଗଷ୍ଟ 31 ତାରିଖରେ ରୋଷେଇ କଲାବେଳେ ଗ୍ୟାସ ଟାଙ୍କି ଫାଟି ଘଟଣାସ୍ଥଳରେ ଜୀବନ୍ତ ଦଗ୍ଧ ହୋଇ ପ୍ରାଣ ହରାଇଥିବା ମହିଳାଙ୍କ ପରିବାରକୁ ସହାୟତା ପ୍ରଦାନ କରିବା ପାଇଁ ଅଣ୍ଟା ଭିଡିଛି ଜିଲ୍ଲା ପ୍ରଶାସନ l ନୟାଗଡ ଜିଲ୍ଲା ଖଣ୍ଡପଡା ଥାନା ରାଣୀପଡ଼ା ପଞ୍ଚାୟତ ବିରିଡିହି ଗାଁରେ ଦେଖିବାକୁ ମିଳିଥିଲା ଏଭଳି ଅଭାବନୀୟ ଘଟଣା l ମୃତ ମହିଳାଙ୍କ ଏକ 6 ମାସର ଶିଶୁ ଥିବାବେଳେ ଦୁର୍ଘଟଣା ସମୟରେ ସ୍ତ୍ରୀକୁ ଉଦ୍ଧାର କରିବାକୁ ଯାଇ ସ୍ବାମୀ ମଧ୍ୟ ଗୁରୁତର ହୋଇ ବର୍ତ୍ତମାନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ।
ସେପଟେ ନିଆଁରେ ସବୁ କିଛି ହରାଇବା ପରେ ମାତ୍ର ଖଣ୍ତେ ପାଲ ଯୋଗାଇ ଦେଇ ନିଜ କାନ୍ଧରୁ ଦାୟିତ୍ବ ଖସାଇ ଦେଇଛି ସ୍ଥାନୀୟ ପ୍ରଶାସନ । ପିତାମାତା ଉଭୟଙ୍କ ଅନୁପସ୍ଥିତି ଓ ଏପରି ଅସହାୟତା ମଧ୍ୟରେ କଅଁଳ ଶିଶୁଟିର ଭବିଷ୍ୟତକୁ ନେଇ ଉଠିଛି ପ୍ରଶ୍ନ। ଅନ୍ୟପଟେ ନୟାଗଡ଼ ଜିଲ୍ଲାପାଳ ଗଣମାଧ୍ୟମ ଆଗରେ ମୁହଁ ଖୋଲି କହିଛନ୍ତି ଯେ, ଜିଲ୍ଲା ଶିଶୁ ସୁରକ୍ଷା ଏହାର ତଦନ୍ତ କରୁଛି l ଛୋଟ ଛୁଆକୁ ଜିଲ୍ଲା ଶିଶୁ ସୁରକ୍ଷା ପାଖକୁ ଆଣି ତାହାର ଦାୟିତ୍ବ ନିଆଯିବ, ନଚେତ ତାଙ୍କ ପରିବାରକୁ ସହାୟତା ପ୍ରଦାନ କରାଯିବ l
ସୂଚନାଯୋଗ୍ୟ ଯେ,ଏହି ଗାଁର ମହିଳା ହରପ୍ରିୟା ଜେନା ରନ୍ଧନ ଗ୍ୟାସ ଯୋଗେ ରୋଷେଇ କରୁଥିବାବେଳେ ଅଚାନକ ଗ୍ୟାସ ଟାଙ୍କି ଫାଟିବାରୁ ନିଆଁରେ ପୋଡି ହୋଇ ପ୍ରାଣ ହରାଇଥିଲେ । ମହିଳାଙ୍କ ଦେହରେ ନିଆଁ ଲାଗିଯାଇ ଥିବାବେଳେ ଉଦ୍ଧାର ଉଦ୍ୟମ କରିଥିବା ସ୍ବାମୀ ସିଲୁ ଜେନା ନିଆଁରେ ପୋଡି ଗୁରୁତର ହୋଇଥିଲେ l ଏବେ ବି ସ୍ବାମୀ ସିଲୁ ମେଡିକାଲରେ ଚିକିତ୍ସାଧୀନ ରହିଛନ୍ତି । ଅତ୍ୟନ୍ତ ଗରିବ ପରିବାର ହୋଇଥିବାରୁ ସିଲୁଙ୍କ ଚିକିତ୍ସା ଖର୍ଚ୍ଚ ବହନ କରିବା ପରିବାର ପକ୍ଷେ ସମ୍ଭବ ହୋଇପାରୁନାହିଁ। ତେବେ ଜିଲ୍ଲା ପ୍ରଶାସନ ତରଫରୁ ସହାୟତାର ହାତ ବଢିବା ପରେ ସାମାନ୍ୟ ଆଶ୍ବସ୍ତି ପାଇଛନ୍ତି ପରିବାର ଲୋକେ ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
