ନବରଙ୍ଗପୁର: ସାରା ଓଡ଼ିଶାର ଜିଲ୍ଲାସ୍ତରୀୟ ଆଇନଜୀବୀ ସଂଘର ସଭାପତି ଓ ସମ୍ପାଦକଙ୍କ ସହ ଆଭାସୀ କାର୍ଯ୍ୟକ୍ରମ ଜରିଆରେ ଓଡିଶା ଉଚ୍ଚନ୍ୟାୟାଳୟର ମୁଖ୍ୟ ବିଚାରପତି ଡଃ ଏସ୍. ମୁରଲୀଧର କଥା ହୋଇ ସମସ୍ତ ସମସ୍ୟା ଶୁଣିଥିଲେ । ନବରଙ୍ଗପୁର ଜିଲ୍ଲା ଆଇନଜୀବୀ ସଂଘ ପକ୍ଷରୁ ସଭାପତି ଆଶିଷ ରଞ୍ଜନ ପଟ୍ଟନାୟକ ଓ ସମ୍ପାଦକ ରାମ ପ୍ରସାଦ ପାତ୍ର ଆଇନଜୀବୀ ସଂଘର ଅନେକ ସମସ୍ୟା ଓ ପ୍ରସ୍ତାବ ଗୁଡିକ ସମ୍ବନ୍ଧରେ ମୁଖ୍ୟ ବିଚାରପତିଙ୍କୁ ଅବଗତ କରିଥିଲେ।
ଜିଲ୍ଲା ଅଦାଲତର ସମ୍ମିଳନୀ କକ୍ଷରେ ଜିଲ୍ଲା ଓ ଦୌରାଜଜ ଅଶୋକ କୁମାର ପଣ୍ଡାଙ୍କ ସହ ରେଜିଷ୍ଟ୍ରାର ଅପର୍ଣ୍ଣା ମହାପାତ୍ର ଉପସ୍ଥିତ ଥିଲେ । ନବରଙ୍ଗପୁର କୋର୍ଟରେ ଅଗଷ୍ଟ ମାସ ସୁଦ୍ଧା ବିଚାର ପାଇଁ ପଡିରହିଥିବା ୧୨୨୦ଟି ଦେୱାନି ମାମଲା ଓ ୨୭୧୬୯ଟି ଫୌଜଦାରୀ (ସମୁଦାୟ ୨୮୨୯୩) ମାମଲା, ବିଶେଷକରି ପଡିରହିଥିବା ପୁରୁଣା ମାମଲା ଗୁଡିକୁ ଯଥାଶୀଘ୍ର ବିଚାର କରିବା ପାଇଁ ବୈଠକରେ ଗୁରୁତ୍ତ୍ବାରୋପ କରାଯାଇଥିଲା ।
ନୂତନ କୋର୍ଟ ଗୃହରେ ତୃତୀୟ ମହଲା ନିର୍ମାଣ କରିବା, ଆଇନଜୀବୀ ସଂଘର ପ୍ରସ୍ତାବିତ ନୂତନ କୋଠା ନିର୍ମାଣ କରିବା, କ୍ୟାଣ୍ଟିନ୍ ଗୃହ ନିର୍ମାଣ କରିବା, ନିୟମିତ ଭିଜିଲାନ୍ସ କୋର୍ଟ ସ୍ଥାପନ, ସ୍ଥାୟୀ ଓ ନିରନ୍ତର ଲୋକ ଅଦାଲତ ସ୍ଥାପନ, ଜିଲ୍ଲାର ଡାବୁଗାଁ ଓ ଅନ୍ୟ ଅଞ୍ଚଳରେ ପ୍ରଥମ ଶ୍ରେଣୀ ବିଚାରପତି କୋର୍ଟ ସ୍ଥାପନ ପାଇଁ ଜିଲ୍ଲା ଆଇନଜୀବୀ ସଂଘ ତରଫରୁ ମୁଖ୍ୟ ବିଚାରପତିଙ୍କ ନିକଟରେ ଦାବି ଉପସ୍ଥାପନ କରାଯାଇଥିଲା । କୋଭିଡ କଟକଣା ଯୋଗୁଁ ଦୀର୍ଘ ଏକ ବର୍ଷରୁ ଅଧିକ ଦିନ କୋର୍ଟ କାର୍ଯ୍ୟ ବନ୍ଦ ଥିବା ଯୋଗୁଁ ବିଚାରାଧୀନ ମାମଲା ସଂଖ୍ୟା ବୃଦ୍ଧି ହୋଇଥିବା ସଂଘ ପକ୍ଷରୁ ଅବଗତ କରାଯାଇଥିଲା।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
