ମାଲକାନଗିରି: କିଛିଦିନର ନୀରବତା ପରେ ପୁଣି ସକ୍ରିୟ ନକ୍ସଲ । ମାଲକାନଗିରି ସୀମାନ୍ତ ଛତିଶଗଡ଼ର କାଙ୍କେର ଜିଲ୍ଲାରେ ନକ୍ସଲଙ୍କ ହିଂସା ଦେଖିବାକୁ ମିଳିଛି । ଯାତ୍ରୀବାହୀ ବସ୍କୁ ନିଆଁ ଲଗାଇ ପୋଡ଼ିବା ପରେ ଏକ ଜିଓ ଟାୱାରରେ ମଧ୍ୟ ନିଆଁ ଲଗାଇଛନ୍ତି ଲାଲ୍ ବାହିନୀ । ଘଟଣାସ୍ଥଳରୁ ମାଓ ପୋଷ୍ଟର ଜବତ ହୋଇଛି । ପୁଣି ନକ୍ସଲଙ୍କ ତାଣ୍ଡବ ଦେଖି ସ୍ଥାନୀୟ ଲୋକେ ଆତଙ୍କିତ ଅବସ୍ଥାରେ ଅଛନ୍ତି ।
ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ମାଲକାନଗିରି ସୀମାନ୍ତ ଛତିଶଗଡ଼ କାଙ୍କେର ଜିଲ୍ଲାର କୋଇଲବଡ଼ି ଗ୍ରାମରେ ସଶସ୍ତ୍ର ନକ୍ସଲ ପହଞ୍ଚିଥିଲେ । ଏଠାରେ ଛିଡ଼ା ହୋଇଥିବା ଏକ ଯାତ୍ରୀବାହୀ ବସ୍କୁ ନିଆଁ ଲଗାଇ ପୋଡ଼ି ଦେଇଛନ୍ତି । ବସରେ ଥିବା ଡ୍ରାଇଭର ଏବଂ କଣ୍ଡକ୍ଟରଙ୍କୁ ଓହ୍ଲାଇ ସେଠାରୁ ଚାଲିଯିବାକୁ କହିଥିଲେ । ଏହାପରେ ବସ୍ରେ ନିଆଁ ଲଗାଇଥିଲେ ନକ୍ସଲ । ସେଠାରେ ପୋଷ୍ଟର ମଧ୍ୟ ଛାଡିଥିଲେ । ଏହାପରେ ପଖାଞ୍ଜୁର ଥାନା ଅନ୍ତର୍ଗତ ପିଭି ୪୫ ଗ୍ରାମରେ ଥିବା ଜିଓ ଟାୱାରରେ ମଧ୍ୟ ନିଆଁ ଲଗାଇଛନ୍ତି ନକ୍ସଲ । ତେବେ ଏଭଳି ଘଟଣା ପରେ ସେହି ଅଞ୍ଚଳରେ ଲୋକେ ଆତଙ୍କିତ ହୋଇପଡିଛନ୍ତି ।
ଇଟିଭି ଭାରତ, ମାଲକାନଗିରି
