ମାଲକାନଗିରି: ହଷ୍ଟେଲ ସୁପରିଟେଣ୍ଡେଣ୍ଟଙ୍କ ନାଁରେ ସାଂଘାତିକ ଅଭିଯୋଗ । ପିଲାଙ୍କ ପାଇଁ ଆସୁଥିବା ଚାଉଳ ବିକ୍ରି ହେଉଥିବା ଛାତ୍ରମାନେ ଅଭିଯୋଗ କରିଛନ୍ତି । ମାଲକାନଗିରି ଜିଲ୍ଲା ମାରିଓ୍ବାଡା ଆଶ୍ରମ ସ୍କୁଲର ୨୦ ଜଣ ଛାତ୍ର ରାତି ୪ ସମୟରେ ହଷ୍ଟେଲ ପାଚେରୀ ଡେଇଁ ସମସ୍ୟା ଜଣାଇବାକୁ ଜିଲ୍ଲାପାଳଙ୍କ କାର୍ଯ୍ୟାଳୟ ପହଞ୍ଚିଥିଲେ । ଏହି ସମୟରେ ଜିଲ୍ଲା ମଙ୍ଗଳ ଅଧିକାରୀ (Students Meet to District Welfare Officer) ଖବର ପାଇ ଛାତ୍ରମାନଙ୍କୁ ନିଜ କାର୍ଯ୍ୟାଳୟକୁ ନେଇଥଲେ ଓ ସ୍କୁଲର ସମସ୍ୟା ପଚାରି ବୁଝିଥିଲେ ।
ଗତ ମାସ ୨୩ତାରିଖ ଦିନ ଏକ ଅଟୋରିକ୍ସାରେ ୨୦ ବସ୍ତା ହଷ୍ଟେଲ ଚାଉଳ ବାହାରକୁ ନିଆଯାଉଥିବା ସମୟରେ କିଛି ଛାତ୍ର ଫଟୋ ଉଠାଇ ସ୍କୁଲ ପ୍ରଧାନ ଶିକ୍ଷକଙ୍କୁ ଲିଖିତ ଅଭିଯୋଗ ସହ ମୋବାଇଲରେ ଉଠାଯାଇଥିବା ଫୋଟୋ ଦେଖାଇଥିଲେ । ହେଲେ ପ୍ରଧାନ ଶିକ୍ଷକ ଏହାର ସମାଧାନ କରିନଥିବାରୁ ଛାତ୍ରମାନେ ଜିଲ୍ଲାପାଳଙ୍କ ଦ୍ଵାରସ୍ଥ ହୋଇଛନ୍ତି । ସ୍କୁଲ ସୁପରିଟେଣ୍ଡ ରଞ୍ଜିତା ବେହେରା ଓ ଶିକ୍ଷକ ପ୍ରଦୀପ କୁମାର ସେଠୀ ଉଭୟେ ମିଶି ଚାଉଳ ବିକ୍ରି କରୁଥିବା ଛାତ୍ରମାନେ ଅଭିଯୋଗ କହିଛନ୍ତି । ଛାତ୍ରମାନେ କହିଛନ୍ତି, "ସ୍କୁଲରୁ ତିନି ଥର ଚାଉଳ ବିକ୍ରି ହୋଇଛି । କିନ୍ତୁ ଏପଟେ ଆମକୁ ଭାତ ପାଉନି । ପାଣିଆ ଡାଲିରେ ଖାଇବାକୁ ବାଧ୍ୟ ହେଉଛୁ । ତେଣୁ ଆମେ ଜାଣିବାକୁ ଚାହୁଁଛୁ ଚାଉଳ କେଉଁଆଡେ ଯାଉଛି ।"
ଏହା ମଧ୍ୟ ପଢ଼ନ୍ତୁ: ପରୀକ୍ଷା ପୂର୍ବରୁ ଉତ୍ତର ସିଟ ଭାଇରାଲ ଘଟଣା, ଉଚ୍ଚସ୍ତରୀୟ ତଦନ୍ତ ଦାବି
ଅନ୍ୟପଟେ ସ୍କୁଲ ସୁପରିଟେଣ୍ଡଣ୍ଟ ପିଲାମାନଙ୍କ ଅଭିଯୋଗକୁ ଖଣ୍ଡନ କରିଛନ୍ତି । ସେ କହିଛନ୍ତି, "୪ ମାସ ହଷ୍ଟେଲରେ ଚାଉଳ ଅଭାବ ଦେଖାଦେଇଥିଲା । ତେଣୁ ଲିଖିତ ଆକାରରେ ମାରିଓ୍ବାଡା ପଞ୍ଚାୟତରୁ ୨୦ ବସ୍ତା ଚାଉଳ ଆଣିଥିଲି । ସ୍କୁଲକୁ ଏମଡିଏମ ଚାଉଳ ଆସିବା ପରେ ପଞ୍ଚାୟତକୁ ଫେରସ୍ତ କରିଥିଲି ।" ଘଟଣାର ତଦନ୍ତ କରି ସମ୍ପୃକ୍ତ ଶିକ୍ଷକମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା ମଙ୍ଗଳ ଅଧିକାରୀ କହିଛନ୍ତି ।
ଇଟିଭି ଭାରତ, ମାଲକାନଗିରି
