ମାଲକାନଗିରି: ମାଲକାନଗିରି ଜିଲ୍ଲାରେ ପୋଲିସକୁ ମିଳିଲା ଆଉ ଏକ ବଡ଼ ସଫଳତା । ସ୍ବାଭିମାନ ଅଞ୍ଚଳର ଜୋଡାଆମ୍ବ ଥାନା ଅଞ୍ଚଳର ଜଙ୍ଗଲରେ ପୋତାଯାଇଥିବା ଅନେକ ମାଓ ସାମଗ୍ରୀ ଜବତ ହୋଇଛି । ଏହି ମାଓ ସାମଗ୍ରୀ ମଧ୍ୟରେ ଗୋଟିଏ ଇଭିଏମ୍ ମେସିନ ରହିଥିବା ସୂଚନା ମିଳିଛି । ଏଗୁଡ଼ିକ ମାଟି ତଳେ ପୋତା ହୋଇଥିବା ଗୁଇନ୍ଦା ସୂତ୍ରରୁ ଖବର ପାଇ ଏସଓଜି (Special Operation Group) ଓ ଡିଭିଏଫ (District Voluntary Force) ପକ୍ଷରୁ ଜବତ କରାଯାଇଛି ।
ବିଶେଷ ଗୁଇନ୍ଦା ସୂତ୍ରରୁ ଖବର ପାଇ ଗତକାଲି (ମଙ୍ଗଳବାର) ଏସଓଜି ଓ ଡିଭିଏଫ ପକ୍ଷରୁ ଯୋଡ଼ାଆମ୍ବ ଜଙ୍ଗଲରେ ସର୍ଚ୍ ଅପରେସନ କରାଯାଇଥିଲା । ଏହି ଅପରେସନରେ ମାଟିତଳେ ମାଓ ସାମଗ୍ରୀ ଥିବା ସୂଚନା ପାଇଥିଲେ ଜବାନ । ପରେ ଗ୍ରାମବାସୀଙ୍କ ସହାୟତାରେ ମାଟି ଖୋଳି ମାଓବାଦୀଙ୍କ ସମସ୍ତ ସାମଗ୍ରୀ ଜବତ କରାଯାଇଥିଲା । ସେଥିରେ ୧୧ରୁ ଅଧିକ ଲ୍ୟାଣ୍ଡମାଇନ, ଗୋଟିଏ ବନ୍ଧୁକ ଓ ଗୋଟିଏ ପିସ୍ତଲ ସହ ୭୪ ପ୍ରକାର ମାଓ ସାମଗ୍ରୀ ଜବତ କରିଛନ୍ତି ଜବାନ । ତେବେ ଏହାରି ମଧ୍ୟରେ ଗୋଟିଏ ଇଭିଏମ୍ ମେସିନ ରହିଥିବା ସୂଚନା ମିଲିଛି । ମାଓବାଦୀମାନେ ପୋଲିସକୁ ଟାର୍ଗେଟ କରି ଏହି ସବୁ ସାମଗ୍ରୀ ମାଟି ତଳେ ପୋତି ରଖିଥିବା ଅନୁମାନ କରାଯାଉଛି ।
ଏହା ମଧ୍ୟ ପଢ଼ନ୍ତୁ...ମାଲକାନଗିରି ସୀମାରେ ସକ୍ରିୟ ନକ୍ସଲ, ଜାଳିଦେଲେ ଯାତ୍ରୀବାହୀ ବସ୍
ଏହି ସଫଳତା ପରେ ପ୍ରତିକ୍ରିୟା ରଖିଛନ୍ତି ମାଲକାନଗିରି ଏସ୍ପି ନୀତେଶ ୱ।ଧୱ।ନି । ସେ କହିଛନ୍ତି, "ପୋଲିସର ଘର ପ୍ରତ୍ୟାବର୍ତ୍ତନ ଆହ୍ବାନରେ ଧିରେ ଧିରେ ମାଓଗଡ଼ ଭାଙ୍ଗୁଛି । ଯାହା ଫଳରେ ଲୋକମାନଙ୍କର ପୋଲିସ ଉପରେ ଭରସା ବଢ଼ୁଛି । ତେବେ ଜୋଡ଼ାଆମ୍ବ ଅଞ୍ଚଳରେ ଲୋକଙ୍କ ସହାୟତାରେ ଆମେ ଏହି ବିପୁଳ ମାଓ ସାମଗ୍ରୀ ଜବତ କରିଛୁ । ଏଭଳି ଲୋକଙ୍କ ସହୟତା ମିଳିଲେ ଆଗକୁ ମାଲକାନଗିରି ଜିଲ୍ଲାରେ ମାଓବାଦୀଙ୍କ ମୂଳପୋଛ ହୋଇପାରିବ ।"
ଇଟିଭି ଭାରତ, ମାଲକାନଗିରି
