କୋରାପୁଟ: ସୀମା ବିବାଦକୁ ନେଇ ଓଡିଶାକୁ ପୁଣି ଖୋଲା ଚ୍ୟାଲେଞ୍ଜ ଦେଲା ଆନ୍ଧ୍ର । ଦୁଇ ରାଜ୍ୟର ସୀମାନ୍ତ କୋରାପୁଟ ଜିଲ୍ଲାର କୋଟିଆ ପଞ୍ଚାୟତ ଅନ୍ତର୍ଗତ ନେରେଡିବାଲାସାରେ ଆନ୍ଧ୍ର ସରକାର ଦ୍ଵିତୀୟ ଥର ପାଇଁ ଆଜି ପୁଣିଥରେ ଜନସମ୍ପର୍କ କାର୍ଯ୍ୟକ୍ରମ ‘ସ୍ପନ୍ଦନ’ର ଦ୍ଵିତୀୟ ଶିବିର ଆୟୋଜନ କରି ଓଡିଶାକୁ ଖୋଲାଖୋଲି ଚ୍ୟାଲେଞ୍ଜ ଦେଇଥିବା ଦେଖିବାକୁ ମିଳିଛି ।
ଗତ ସପ୍ତାହରେ ସାଲୁରରେ ଥିବା ଆନ୍ଧ୍ରପ୍ରଦେଶର ପୋଲିସ ଅଧିକାରୀ ରୋହିଣୀ କୁମାରଙ୍କ ନେତୃତ୍ବରେ ପୋଲିସ ଅଧିକାରୀମାନେ ନେରେଡିବାଲାସା, ଧୁକିପଦର ଓ ଅନ୍ୟାନ୍ୟ ଗ୍ରାମ ବୁଲିବା ସହ ସେଠାରେ ଜନସମ୍ପର୍କ ଶିବିର ଆୟୋଜନ କରିଥିଲେ । ଆଜି ମଧ୍ୟ ସେମାନେ ନେରେଡିବାଲାସାରେ ଲୋକଙ୍କ ନିକଟରୁ ଅଭିଯୋଗପତ୍ର ସଂଗ୍ରହ କରି ସେମାନଙ୍କୁ ଆନ୍ଧ୍ର ସରକାରଙ୍କ ପକ୍ଷରୁ ଅଭୟବାଣୀ ଦେଇଛନ୍ତି ।
ତେବେ ଗତ ସୋମବାର ଆନ୍ଧ୍ରପ୍ରଦେଶ ସରକାରଙ୍କ ପକ୍ଷରୁ ଆୟୋଜିତ କାର୍ଯ୍ୟକ୍ରମ ସ୍ପନ୍ଦନକୁ ନେଇ କୋରାପୁଟ ଜିଲ୍ଲାରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । ଅନ୍ୟପଟେ ଓଡିଶା ସରକାରଙ୍କ ତରଫରୁ କୌଣସି ପ୍ରତିବାଦ ନ ହେବା ଫଳରେ ଆନ୍ଧ୍ର ଆଜି ପୁଣିଥରେ ଦ୍ଵିତୀୟ ଥର ପାଇଁ ଅନୁରୂପ କାର୍ଯ୍ୟକ୍ରମ କରି ଲୋକଙ୍କୁ ଆକର୍ଷିତ କରିବା ପାଇଁ ସାହସ କରିପାରିଥିବା ମଧ୍ୟ ଅଭିଯୋଗ ହୋଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
