କୋରାପୁଟ: ବିଶାଖାପାଟଣାରେ ରବିବାର ଜାତୀୟସ୍ତରୀୟ ଆଦିବାସୀ ନୃତ୍ୟ ମହୋତ୍ସବ ଅନୁଷ୍ଠିତ ହୋଇଥିଲା । ଏଥିରେ ଉତ୍ତମ ପ୍ରଦର୍ଶନ କରି କୋରାପୁଟ ଜିଲ୍ଲାର ଦୁରୁଆ ନୃତ୍ୟ ଜାତୀୟ ସ୍ତରରେ ତୃତୀୟ ସ୍ଥାନ ଅଧିକାର କରିଛି । ଶାବେରୀ ନଦୀର ଗୁପ୍ତେଶ୍ବର ନିକଟବର୍ତ୍ତୀ ସିରିବେଡା ଠାରୁ ଆରମ୍ଭକରି ଗାଁ ଗଣ୍ଡାରେ ରହୁଥିବା ହଜାର ହଜାର ଦୁରୁଆ ପରିବାର ଆଦିବାସୀ ରାଜ୍ୟ ଓ ରାଜ୍ୟ ବାହାରେ ଅନେକ ଥର ପୁରସ୍କୃତ । କିନ୍ତୁ ସେଠାରେ ସିରିବେଡା ଅଞ୍ଚଳର ଦୁରୁଆ କଳାକାରଙ୍କ ଦ୍ବାରା ପ୍ରଦର୍ଶିତ ଏହି ନୃତ୍ୟ ଦର୍ଶକଙ୍କ ହୃଦୟ ଜିଣିବାରେ ସମର୍ଥ ହୋଇଥିଲା । ତେଣୁ ଏହି ଦଳକୁ ପ୍ରୋତ୍ସାହିତ କରିବା ପାଇଁ ତାଙ୍କୁ ପୁରସ୍କାର ପ୍ରଦାନ କରିଛନ୍ତି ବୋଲି ସିରିବେଡ଼ା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ କୁଳମଣି ଜେନା ସୂଚନା ଦେଇଛନ୍ତି ।
ଗତ କିଛିଦିନ ପୂର୍ବେ ଭୁବନେଶ୍ବରରେ ଆୟୋଜିତ ଏକ ଆଦିବାସୀ ନୃତ୍ୟ ପ୍ରତିଯୋଗିତାରେ ଉତ୍ତମ ପ୍ରଦର୍ଶନ କରି ଏହି ଦଳ ବିଶାଖାପାଟଣା ଠାରେ ଆୟୋଜିତ ଜାତୀୟ ଆଦିବାସୀ ନୃତ୍ୟ ଉତ୍ସବରେ ଭାଗ ନେବାର ସୁଯୋଗ ପାଇଥିବା ଶ୍ରୀ ଜେନା ଜଣାଇଛନ୍ତି । ଦେଶର ବିଭିନ୍ନ ରାଜ୍ୟରୁ କଳାକାରମାନେ ନୃତ୍ୟ ପ୍ରଦର୍ଶନ କରିଥିବାବେଳେ ଓଡ଼ିଶାକୁ ପ୍ରତିନିଧିତ୍ଵ କରି କୋରାପୁଟ ମାଟିକୁ ଗର୍ବ ଓ ଗୌରବ ଆଣିଥିବା ଯୋଗୁଁ ଦର୍ଶକ ମହଲରୁ ମଧ୍ୟ ଅଭିନନ୍ଦନର ସୁଅ ଛୁଟିଥିଲା ।
ଇଟିଭି ଭାରତ, କୋରାପୁଟ
