ଭୁବନେଶ୍ବର: ଓଡ଼ିଶାରେ ଚାଲିଛି ହକି ମହାକୁମ୍ଭ । ହକି ମହାସମର ୧୩ରୁ ଆରମ୍ଭ ହୋଇଥିବା ବେଳେ ୨୯ ତାରିଖ ପର୍ଯ୍ୟନ୍ତ ଚାଲିବ । ଏହି ସମୟରେ ରାଜ୍ୟରେ ୧୬ଟି ଦେଶର ଖେଳାଳିଙ୍କ ସହ ରହୁଛନ୍ତି ପର୍ଯ୍ୟଟକ । ଏପଟେ ବିଶ୍ବକପକୁ ଅଧିକ ଆକର୍ଷଣୀୟ କରିବା ପାଇଁ ସହରକୁ ସଜାଯାଇଥିବା ବେଳେ ଭୁବନେଶ୍ୱରେ ଆନ୍ତର୍ଜାତୀୟ ଖାଦ୍ୟର ମେଳା ସହ ଚାଲିଛି ଡଟ ଫେଷ୍ଟ ବା ସିଟି ଫେଷ୍ଟ। ଆଉ ପାରମ୍ପରିକ ନୃତ୍ୟ ,ଗୀତ ଓ ସାମଗ୍ରୀର ପସରାକୁ ନେଇ ଏକାମ୍ର ହାଟରେ ଚାଲିଛି ନାଇଟ ବଜାର। ଏହି ନାଇଟ୍ ବଜାର ରାଜଧାନୀର ଶୀତୁଆ ରାତିକୁ ଆହୁରି ଆକର୍ଷଣ କରୁଛି। ଏହା ବିଳମ୍ବିତ ରାତି ପର୍ଯ୍ୟନ୍ତ ଅର୍ଥାତ ୫ ଟାରେ ଆରମ୍ଭ ହୋଇ ରାତି ୧୨ଟା ପର୍ଯ୍ୟନ୍ତ ଚାଲୁଛି ।

ତେବେ ଏନେଇ ସ୍ଥାନୀୟ କଳାକାର, ଷ୍ଟାର୍ଟଅପ୍‌, ପ୍ରଦର୍ଶନକାରୀ, କାରିଗର ଓ ଉଦ୍ଭାବକମାନଙ୍କୁ ନିଜର ସାମଗ୍ରୀ ଓ କଳାର ପ୍ରଦର୍ଶନ କରିବା ପାଇଁ ଏକ ଉନ୍ନତ ମଞ୍ଚ ପ୍ରଦାନ କରିଛି । ଓଡ଼ିଶାର ହସ୍ତଶିଳ୍ପ ଓ ବୟନଶିଳ୍ପକୁ ପ୍ରୋତ୍ସାହିତ କରିବାର ଉଦ୍ଦେଶ୍ୟ ସହିତ ଆୟୋଜିତ ହୋଇଥିବା ଫ୍ଲି ମାର୍କେଟ୍ ଏକ ଉଲ୍ଲେଖନୀୟ ଜନସମାଗମକାରୀ ପଦକ୍ଷେପ ଭାବେ ପ୍ରମାଣିତ ହୋଇଛି । ଏହି ଫ୍ଲି ମାର୍କେଟ୍‌ରେ ୧୨୦ରୁ ଅଧିକ ସ୍ଥାନୀୟ ଓ ଅନ୍ୟ ରାଜ୍ୟର ଅଧିକ ଉତ୍ପାଦିତ ସାମଗ୍ରୀ ପ୍ରଦର୍ଶିତ ହୋଇଛି । ଦୁଇବର୍ଷର କୋଭିଡ କଟକଣା ଭିତରେ ମଜାମସ୍ତି ସମ୍ପୂର୍ଣ୍ଣ ବନ୍ଦ ରହିଥିଲା । ବିଶେଷ ଭାବେ ବିଳମ୍ବିତ ଯାଏଁ କୌଣସି ଦୋକାନ ବଜାର ବି ଖୋଲୁନଥିଲା। ତେଣୁ ରାଜଧାନୀବାସୀଙ୍କ ସହ ରାଜ୍ୟର ସମସ୍ତ ଲୋକଙ୍କୁ ଏହି ରାତି ବଜାରରର ଏକ ନିଆରା ଅନୁଭୂତି ଦେଇଛି । ମନୋରଞ୍ଜନର ଖୋରାକ ଯୋଗାଇବାକୁ ଏଭଳି ଆୟୋଜନ ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଏମ୍ସିର ସହଯୋଗରେ ଏଭଳି ନାଇଟ ବଜାର ଆୟୋଜନ କରାଯାଇଛି ।

ଏଠାରେ ବିଭିନ୍ନ ରାଜ୍ୟ ସମେତ ଆମ ରାଜ୍ୟର ପାରମ୍ପରିକ କପଡା, ଅଳଙ୍କାର, ଟେରାକୋଟା ସାମଗ୍ରୀ , ବାଉଁଶ ତିଆରି ସାମଗ୍ରୀ, ମାଟିର ତିଆରି ସାମଗ୍ରୀ ସହ ଭାରତର ବିଭିନ୍ନ ରାଜ୍ୟର କଳା ସଂସ୍କୃତିର ପରିଚୟ ସାଜିଥିବା ସାମଗ୍ରୀ ବିକ୍ରି ହେଉଛି । ହାତ ପାହାନ୍ତାରେ ଲୋକମାନେ ସବୁ ବର୍ଗର ସାମଗ୍ରୀ ସହ ଘରକୁ ସଜାଇବାକୁ ବିଭିନ୍ନ କାରୁକାର୍ଯ୍ୟ ବିଶିଷ୍ଟ ଘରକରଣା ସାମଗ୍ରୀ ମଧ୍ୟ ପାଇପାରୁଛନ୍ତି । ତେଣୁ ଏଠାରେ କିଣାବିକାର ଏକ ଆସର ଜମିଛି । ବ୍ୟବସାୟୀ ଦୁଇବର୍ଷର କରୋନା କଟକଣା ପରେ ସାମଗ୍ରୀ ବିକ୍ରି ନେଇ ଖୁସି ହେଉଥିବା ବେଳେ ଗ୍ରାହକମାନେ ମଧ୍ୟ ମନ ପସନ୍ଦର ଜିନିଷ ପାଇ ଖୁସି ହେଉଛନ୍ତି । ଖାଲି ସେତିକି ନୁହେଁ ନାଇଟ ବଜାରକୁ ସୁନ୍ଦର ଭବେ ଆଲୋକମାଳାରେ ସଜା ଯାଇଥିବା ବେଳେ ଆମ ସଂସ୍କୃତି, ପରମ୍ପରା ଓ ଲୋକକାଳର ଝଲକ ସହ କଳାକାରମାନଙ୍କ ଲାଇଭ କାର୍ଯ୍ୟକ୍ରମ ମଧ୍ୟ ଦେଖିବାକୁ ମିଳୁଛି ।

ନାଚ ଗୀତ ସହ ନାଇଟ ବଜାର ର ମଜା ନେଉଛନ୍ତି ଗ୍ରାହକ । ସବୁଠାରୁ ଆକର୍ଷଣୀୟ ରହିଛି ଏଠାରେ ପ୍ରଦର୍ଶିତ ହେଉଥିବା ଲୋକକଳା ବା ଅଧ୍ୟାତ୍ମିକ ବିଷୟ ବସ୍ତୁର କାହାଣୀ ବା ନୃତ୍ୟ । ଏଠାରେ କେଉଁଠି ଓଡ଼ିଶୀ ନୃତ୍ୟ ହେଉଛି ତ ଆଉ କେଉଁଠି ଲୀଳାମୟ କୃଷ୍ଣଙ୍କ କାହାଣୀ ଦେଖିବାକୁ ମିଳିଛି । ଯାହାକୁ ଦେଖିବା ପାଇଁ ଲୋକ ମାନଙ୍କର ବେଶ ଭିଡ ଜମୁଛି । କାରଣ ସହରର ଚାକଚକ୍ୟ ଭିତରେ ପରମ୍ପରା ଓ ଲୋକକଳାର ଦୃଶ୍ୟ ସିଧାସଳଖ ଦର୍ଶକ ଦେଖିବାକୁ ପାଇଛନ୍ତି ।

ତେବେ ଖାଲି ଓଡିଶା କି ଭୁବନେଶ୍ୱର ନୁହେଁ ରାଜ୍ୟ ବାହାରର ଗ୍ରାହକ ସହ ବିଦେଶୀ ପର୍ଯ୍ୟଟକଙ୍କୁ ବି ଏହି ମେଳାରେ ଦେଖିବାକୁ ମିଳିଛି । ଏଥିପାଇଁ ଭୁବନେଶ୍ୱର ଏବେ ମହୋତ୍ସବକୁ ନେଇ ଝଲସୁଥିବା ବେଳେ ବ୍ୟବସାୟ ଓ ଉତ୍ତମ ଜିନିଷ କିଣାବିକାର ହବ୍‌ ପାଲଟିଛି ଏକାମ୍ର ହାଟ । ଏହି ମହୋତ୍ସବ ଋତୁର ଶୀତୁଆ ରାତିରେ ସମସ୍ତେ ପ୍ରଥମ ଥର ପାଇଁ ହୋଇଥିବା ଏହି ନାଇଟ ବଜାର ର ବେଶ ମଜା ଉଠାଉଛନ୍ତି । ଏହାକୁ ନେଇ ରାଜଧାନୀବାସୀ ରାଜ୍ୟ ସରକାରଙ୍କୁ ଧନ୍ୟବାଦ ଦେଇଥିବା ବେଳେ ଏହି ମହା ପର୍ବରେ ସାମିଲ ହୋଇ ଖୁସି ଅନୁଭବ କରୁଛନ୍ତି । ପରିବାର ସହ ଆସି ଖୁସି ହେବା ସହ ଏହି ନିଆରା ଅନୁଭୂତିକୁ ନିଜ କ୍ୟାମେରାରେ ମଧ୍ୟ କଏଦ କରୁଛନ୍ତି ଦର୍ଶକ ।

ଅନ୍ୟପଟେ ଅନ୍ତର୍ଜାତୀୟ ଖାଦ୍ୟ ମେଳାରେ ସବୁ ବର୍ଗର ଲୋକମାନେ ଭାରତର ୨୪ଟି ରାଜ୍ୟର ସୁସ୍ୱାଦୁ ଆଞ୍ଚଳିକ ଖାଦ୍ୟ, ଓଡ଼ିଶାର ପାରମ୍ପରିକ ଓ ଲୋକପ୍ରିୟ ଖାଦ୍ୟ ଏବଂ ହକି ବିଶ୍ୱକପ୍‌ରେ ଅଂଶଗ୍ରହଣ କରିଥିବା ୧୬ଟି ଦେଶର ଆନ୍ତର୍ଜାତୀୟ ଖାଦ୍ୟ ସ୍ୱାଦ ଚାଖିଛନ୍ତି ଲୋକେ ।

ଇଟିଭି ଭାରତ, ଭୁବନେଶ୍ବର