ଭୁବନେଶ୍ବର: ରାଜ୍ୟରେ ଜଳୁଛି ଜଙ୍ଗଲ । ଚିନ୍ତା ପ୍ରକଟ କଲେ ଭାରତର ଶିଶୁ ପରିବେଶବିତ । ସବୁଥିରେ ରାଜ୍ୟ ସରକାର କୋଟିକୋଟି ଟଙ୍କା ଖର୍ଚ୍ଚ କରୁଛନ୍ତି କିନ୍ତୁ ଜଙ୍ଗଲ ନିଆଁ ଲିଭାଇବାକୁ ନାହିଁ ମାନବ ଶକ୍ତି। ସାରା ରାଜ୍ୟରେ ହୁତୁ ହୂତୁ ହୋଇ ଜଳୁଛି ଜଙ୍ଗଲ। ଏପଟେ ଏବେବି ଜଙ୍ଗଲ ନିଆଁରେ ଦେଶରେ ପ୍ରଥମ ଓଡ଼ିଶା । ଜଙ୍ଗଲ ଜଳୁଥିବାରୁ ରାଜ୍ୟ ସରକାର ନିଆଁ ଲିଭାଇବା ପାଇଁ ହେଲିକପ୍ଟର ବା ଅତ୍ୟାଧୁନିକ ଯନ୍ତ୍ରପାତି ପଦ୍ଧତି ଆପଣାଉ ନାହାଁନ୍ତି ।

ଜଳୁଛି ଜଙ୍ଗଲ, ଚିନ୍ତା ପ୍ରକଟ କଲେ ଭାରତର ଶିଶୁ ପରିବେଶବିତ

ସେପଟେ ରାଜ୍ୟରେ ଜଙ୍ଗଲ ନିଆଁ ଲାଗିବା ନେଇ ଚିନ୍ତା ପ୍ରକଟ କରିଛନ୍ତି ଭାରତର ଶିଶୁ ପରିବେଶବିତ ଲିସିପ୍ରିୟା କାଙ୍ଗୁଜାମ । ଦିନକୁ ଦିନ ସାରା ରାଜ୍ୟରେ ଜଙ୍ଗଲରେ ନିଆଁ ବ୍ୟାପିବାରେ ଲାଗିଛି । ଏନେଇ ରାଜ୍ୟ ସରକାର ଓ ବନ ବିଭାଗର ଅଧିକାରୀ କାର୍ମଚାରିମାନେ ଚିନ୍ତାରେ ପଡିଛନ୍ତି । ବର୍ଷା ହେଲେ ଜଙ୍ଗଲ ନିଆଁ କମିବ ସେହି ଆଶାରେ ରହିଛନ୍ତି ସମସ୍ତେ । କିନ୍ତୁ ଏପଟେ ଜଣେ ଶିଶୁ ପରିବେଶବିତ ଲିସିପ୍ରିୟା କାଙ୍ଗୁଜାମ ଟୁଇଟ କରି ରାଜ୍ୟ ସରକାରଙ୍କୁ କହିଛନ୍ତି ଯେ କ୍ରୀଡା, ସଙ୍ଗୀତ ଇତ୍ୟାଦି ପାଇଁ ଓଡିଶାରେ କୋଟିକୋଟି ଟଙ୍କା ରହିଛି । କିନ୍ତୁ ରାଜ୍ୟରେ ଥିବା ଏସିଆର ବୃହତ୍ତମ ଜୈବ ସଂରକ୍ଷଣ ପାଇଁ ରାଜ୍ୟ ସରକାରଙ୍କ ପାଖରେ ପର୍ଯ୍ୟାପ୍ତ ଅର୍ଥ ନାହିଁ । ଅତ୍ୟନ୍ତ ଲଜ୍ଜାଜନକ ଯେ ସେମାନଙ୍କ ପାଖରେ ପର୍ଯ୍ୟାପ୍ତ ମାନବ ଶକ୍ତି ମଧ୍ୟ ନାହିଁ । ନିଆଁକୁ ଆୟତ୍ତ କରିବା ପାଇଁ ଆଧୁନିକ ଜ୍ଞାନକ କୌଶଳ ନାହିଁ ବୋଲି କହିଛନ୍ତି ଶିଶୁ ପରିବେଶବିତ ଲିସିପ୍ରିୟା ।

ସୂଚନା ଅନୁଯାୟୀ, ରାଜ୍ୟରେ ବନାଗ୍ନିକୁ କମ୍‌ କରିବା ନିମନ୍ତେ ସ୍ୱତନ୍ତ୍ର ପଦକ୍ଷେପ ଗ୍ରହଣ କରାଯାଇଛି । ବନାଗ୍ନି କମ କରିବା ନିମନ୍ତେ ପଞ୍ଚାୟତ ସ୍ତରରୁ ସ୍ୱତନ୍ତ୍ର ଅଭିଯାନ ଆରମ୍ଭ କରାଯିବ । ସଂପୃକ୍ତ ଅଞ୍ଚଳର ସରପଞ୍ଚ, ସ୍ଥାନୀୟ ଜନ ପ୍ରତିନିଧି, ମିଶନ ଶକ୍ତି, ସ୍ଥାନୀୟ କ୍ଲବ ଏବଂ ବିଭିନ୍ନ ସ୍ୱେଚ୍ଛାସେବୀମାନଙ୍କୁ ଏହି ଅଭିଯାନରେ ସାମିଲ କରାଯିବ । ପ୍ରାଥମିକତା ଭିତ୍ତିରେ ସ୍ୱତନ୍ତ୍ର ଟାସ୍କ ଫୋର୍ସ ଗଠନ କରାଯିବ । ବନାଗ୍ନି ରୋକିବାକୁ କ୍ଷେତ୍ରସ୍ତରୀୟ ଅଧିକାରୀମାନଙ୍କ ଦକ୍ଷତା ବୃଦ୍ଧି ସହ ଆବଶ୍ୟକ ସ୍ଥଳେ ଓଡ୍ରାଫ ଟିମ୍‌କୁ ମୁତୟନ କରାଯିବ ବୋଲି ସରକାର କହିଛନ୍ତି । ଆଗକୁ ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିବା ଆଶଙ୍କା ଥିବାରୁ ବନାଗ୍ନି ବ୍ୟାପିବା ସମ୍ଭାବିତ ସ୍ଥାନ ଗୁଡ଼ିକରେ ଆଗୁଆ ଓଡ୍ରାଫ ଟିମ୍‌ ମୁତୟନ ପାଇଁ ମୁଖ୍ୟ ଶାସନ ସଚିବ ଗତକାଲି ବୈଠକରେ ନିର୍ଦ୍ଦେଶ ଦେଇଛନ୍ତି । ରାଜ୍ୟରେ ଏପର୍ଯ୍ୟନ୍ତ ୨୩ ହଜାର ୮୬୦ଟି ସ୍ଥାନରେ ବନାଗ୍ନି ସଂପର୍କରେ ତଥ୍ୟ ଥିବାବେଳେ ସେଥି ମଧ୍ୟରୁ ୯୮ ପ୍ରତିଶତ ଜଙ୍ଗଲ ନିଆଁକୁ ନିୟନ୍ତ୍ରଣ କରାଯାଇଛି ।

ଇଟିଭି ଭାରତ, ଭୁବନେଶ୍ବର