ଭୁବନେଶ୍ବର: ସତ୍ୟର ସାମ୍ନା କରିବାକୁ ଇଣ୍ଡିଆ ମେଣ୍ଟର ସତସାହସ ନାହିଁ । ଭାରତର ଇତିହାସରେ ପ୍ରଥମଥର ପାଇଁ କୌଣସି ରାଜନୈତିକ ଦଳ ଟିଭି ଚ୍ୟାନେଲ ଆଙ୍କର ମାନଙ୍କ ଶୋ’ କୁ ବର୍ଜନ କରିଛନ୍ତି। ସେମାନଙ୍କ କହିବା କଥା ହେଲା ଏହି ସବୁ ଚ୍ୟାନେଲ ମାନଙ୍କରେ ଘୃଣା ଭାବର ପ୍ରଚାର ଓ ପ୍ରସାର ଚାଲିଛି। ତେଣୁ ସେହି ସବୁ ଚ୍ୟାନେଲର ନିର୍ଦ୍ଦିଷ୍ଟ ଉପସ୍ଥାପକ ମାନଙ୍କ ଶୋ’କୁ ଇଣ୍ଡିଆ ମେଣ୍ଟର କୌଣସି ନେତା ଯିବେ ନାହିଁ ବୋଲି ଇଣ୍ଡିଆ ମେଣ୍ଟ ବୈଠକରେ ନିଷ୍ପତ୍ତି ହୋଇଛି ।

ଏହାବି ପଢନ୍ତୁ- PM Vishwakarma Scheme: ସେପ୍ଟେମ୍ବର 17ରୁ ପ୍ରଧାନମନ୍ତ୍ରୀ ବିଶ୍ଵକର୍ମା ଯୋଜନା, ଉପକୃତ ହେବେ ପାରମ୍ପରିକ କାରିଗର ଓ ଶିଳ୍ପୀକାର

ଏହାକୁ ନେଇ ସାଂସଦ ପ୍ରତାପ ଷଡଙ୍ଗୀ କହିଛନ୍ତି ଗଣତନ୍ତ୍ରରେ ଗଣମାଧ୍ୟମ ଏକ ବଡ ଅସ୍ତ୍ର । ହେଲେ ଗଣମାଧ୍ୟମକୁ ଏଭଳି ବୟକଟ କରିବା କେତେ ସମୀଚିନ ? ଗଣତନ୍ତ୍ରର ଚତୁର୍ଥ ସ୍ତମ୍ଭକୁ ଅପମାନିତ କରୁଛନ୍ତି କାରଣ ସତ୍ୟକୁ ସାମ୍ନା କରିବାକୁ ତାଙ୍କ ସାହସ ନାହିଁ। ଇଣ୍ଡିଆ ମେଣ୍ଟ ଏକ ଅସାଧୁ ମେଣ୍ଟ। ୟୁପିଏକୁ ନେଇ ସ୍ଥିର ନିଶ୍ଚିତ ହୋଇପାରିଲେ ନାହିଁ। ସେମାନଙ୍କ ବିଶ୍ବାସ ହେଲାନାହିଁ ସେଥିପାଇଁ ପରିବର୍ତ୍ତନ କଲେ ଇଣ୍ଡିଆ । ଗାନ୍ଧୀଙ୍କ ମୌଳିକ ଶିକ୍ଷା, କୁଟୀର ଶିଳ୍ପ, ଗୋ ରକ୍ଷା ଏପରିକି ଗାନ୍ଧୀଙ୍କ ଆତ୍ମାକୁ ସେମାନେ ହତ୍ୟା କରିଛନ୍ତି। ଗାନ୍ଧୀଙ୍କ ସାଙ୍ଗିଆକୁ ହଡପ କଲେ। ସେ ମେଣ୍ଟ ଆଉ ଜନତାର ବିଶ୍ବାସର ପାତ୍ର ହୋଇପାରିଲେ ନାହିଁ । ଭାରତର ଜନତା ତାଙ୍କୁ ପ୍ରତ୍ୟାଖ୍ୟାନ କରି ସାରିଛନ୍ତି। ସେମାନେ ବିରୋଧୀ ଦଳ ମାନ୍ୟତା ବି ପାଇଲେନି ।

ସୂଚନାଯୋଗ୍ୟଯେ ବିଜେପି ମେଣ୍ଟ ବିରୋଧରେ ଏକାଠି ହୋଇଛନ୍ତି ଦେଶର 26 ଟି ରାଜନୈତିକ ଦଳ । ଏହି ମେଣ୍ଟ ଏବେ ମିଳିତ ଭାବେ ବିଜେପି ବିରୋଧରେ ଲଢେଇ କରିବାକୁ ଯାଉଥିବା ବେଳେ, ମେଣ୍ଟ ଗତତାଲି ଜାତୀୟ ଗଣମାଧ୍ୟମର କିଛି ଆଙ୍କରଙ୍କ ଶୋ’କୁ ବର୍ଜନ କରିବାକୁ ଘୋଷଣା କରିଛି । ଯାହାକୁ ନେଇ ଏବେ ଶାସକ ବିରୋଧୀ ମୁହାଁମୁହାଁ ହୋଇଛନ୍ତି ।

ଏପଟେ ପ୍ରଧାନମନ୍ତ୍ରୀ ବିଶ୍ଵକର୍ମା ଯୋଜନା ଆରମ୍ଭ କରିବେ କେନ୍ଦ୍ର ସରକାର । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନ ତଥା ବିଶ୍ଵକର୍ମା ପୂଜା ଅବସରରେ 17 ସେପ୍ଟେମ୍ବରରେ ଆରମ୍ଭ ହେବ ଯୋଜନା । ଭାରତର ବିଭିନ୍ନ ସ୍ଥାନରେ କାର୍ଯ୍ୟକ୍ରମ ହେବ । ଓଡ଼ିଶାରେ ମଧ୍ୟ 3ଟି ସ୍ଥାନରେ କାର୍ଯ୍ୟକ୍ରମ ପାଇଁ ଯୋଜନା ରହିଛି । ଭୁବନେଶ୍ୱରରେ କେନ୍ଦ୍ର ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ, ସମ୍ବଲପୁରରେ କେନ୍ଦ୍ର ସଂଖ୍ୟା ଲଘୁ ବ୍ୟାପାର ରାଷ୍ଟ୍ରମନ୍ତ୍ରୀ ଜନ୍ ବର୍ଲା ଏବଂ ପୁରୀରେ କେନ୍ଦ୍ର ମହିଳା ଏବଂ ଶିଶୁ କଲ୍ୟାଣ ରାଷ୍ଟ୍ର ମନ୍ତ୍ରୀ ଡ଼. ମୁଞ୍ଜାପରା ମହେନ୍ଦ୍ର ଭାଇ କାଲୁଭାଇ ଉପସ୍ଥିତ ରହିବେ ।

ଇଟିଭି ଭାରତ, ଭୁବନେଶ୍ବର