ଭୁବନେଶ୍ବର: ଜାନୁଆରୀ ୨୬ରୁ ସାରା ଦେଶରେ ଆରମ୍ଭ ହେବ ହାଥ୍‌ ସେ ହାଥ୍‌ ଯୋଡୋ କାର୍ଯ୍ୟକ୍ରମ । ପ୍ରତିଟି ଘରେ ପହଞ୍ଚିବ ରାହୁଲ ଗାନ୍ଧୀ ଏବଂ କଂଗ୍ରେସର ବାର୍ତ୍ତା । ଏନେଇ କଂଗ୍ରେସ ପକ୍ଷରୁ ସର୍ବଭାରତୀୟସ୍ତରରେ ଆରମ୍ଭ ହେବ ହାଥ୍‌ ସେ ହାଥ୍‌ ଯୋଡୋ କାର୍ଯ୍ୟକ୍ରମ । ବୁଧବାର ଭୁବନେଶ୍ୱର କଂଗ୍ରେସ ଭବନରେ ଏନେଇ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ସୁବୋଧକାନ୍ତ ସହାୟ ।

କନ୍ୟାକୁମାରୀରୁ କାଶ୍ମୀର ଭାରତ ଯୋଡ ଯାତ୍ରା ସମୟରେ ରାହୁଲ ଗାନ୍ଧୀଙ୍କ ଉପଲବ୍ଧିକୁ ନେଇ ଆସନ୍ତାକାଲିଠାରୁ ଓଡ଼ିଶାର ନବରଙ୍ଗପୁରରୁ ଆରମ୍ଭ ହେବ ହାତ ସେ ଯୋଡୋ ଯାତ୍ରା । ପ୍ରତି ପଞ୍ଚାୟତରେ ପହଞ୍ଚିବ କଂଗ୍ରେସ । ପ୍ରତିଦିନ ଗୋଟିଏ ପଞ୍ଚାୟତରେ କାର୍ଯ୍ୟକ୍ରମ ହେବ । ବ୍ଲକ ଓ ଜିଲ୍ଲାସ୍ତରରେ ମଧ୍ୟ କାର୍ଯ୍ୟକ୍ରମ କରିବାର ଯୋଜନା ରହିଛି । ତେବେ ଆଜିର ସାମ୍ବାଦିକ ସମ୍ମିଳନୀରେ କେନ୍ଦ୍ର ସରକାର ବିରୋଧରେ ବର୍ଷିଛନ୍ତି ସହାୟ । ସେ କହିଛନ୍ତି, "ମୋଦିଙ୍କ ଶିଳ୍ପପତି ବନ୍ଧୁଙ୍କର ପ୍ରତିଦିନ ୧ ହଜାର କୋଟି ଟଙ୍କା ବୃଦ୍ଧି ପାଉଛି । ସାଧାରଣ ଲୋକଙ୍କ ଆୟ କମୁଛି । କିନ୍ତୁ ବିଜେପି ବନ୍ଧୁମାନଙ୍କର ଆୟ ବଢ଼ୁଛି । ୫୫ ଲକ୍ଷ କୋଟି ଋଣରୁ ୧୫୫ ଲକ୍ଷ କୋଟି ଋଣ କଲେଣି ମୋଦି ସରକାର । ଋଣ ଛାଡ଼ ମଧ୍ୟ କରୁନାହାନ୍ତି କେନ୍ଦ୍ର ସରକାର । ୧ ଲକ୍ଷ ୮୪ ହଜାର କୋଟି ଟଙ୍କା କର୍ପୋରେଟ ଟାକ୍ସ ଛାଡ଼ କରିଛନ୍ତି । ସବୁ ବର୍ଗର ଜନସାଧାରଣ ଆଜି ନିରୁପାୟ । ଦରଦାମ ବୃଦ୍ଧି ସହ ଆଇନ ଶୃଙ୍ଖଳା ପରିସ୍ଥିତି ଅତ୍ୟନ୍ତ ଶୋଚନୀୟ ହୋଇପଡିଛି । ୧ ଲକ୍ଷ ୬୪ ହଜାର ୩୩ ଲୋକ ଆତ୍ମହତ୍ୟା କରିଛନ୍ତି । କୃଷକ, ବେକାରୀ ଯୁବକମାନଙ୍କ ଆତ୍ମହତ୍ୟା ବଢିଛି । ବାକ୍‌ ସ୍ୱାଧୀନତା ନାହିଁ, ସରକାର ବିରୋଧରେ କିଛି କହିପାରିବେ ନାହିଁ ।"

ଆଜିର ସାମ୍ବାଦିକ ସମ୍ମିଳନୀରେ ଦରଦାମ ଓ ବେକାରୀ ସମସ୍ୟା ବୃଦ୍ଧିକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ସୁବୋଧକାନ୍ତ ସହାୟ । ପ୍ରତିଘରେ କଂଗ୍ରେସ ରାହୁଲ ଗାନ୍ଧୀଙ୍କ ପତ୍ର ପହଞ୍ଚାଇବ ବୋଲି ସେ କହିଛନ୍ତି । ଏହା ସହ ଆଗାମୀ ଦିନରେ କଂଗ୍ରେସ ସହ ସାଧାରଣ ଜନତା ଯୋଡି ହେବେ ବୋଲି କହିଛନ୍ତି । ସେ କହିଛନ୍ତି, "ରାହୁଲ ଗାନ୍ଧୀଙ୍କ ଭାରତ ଯୋଡୋ ଯାତ୍ରାର ସଫଳତାକୁ ଗଣମାଧ୍ୟମରେ ପ୍ରଚାର ପ୍ରସାର ନକରିବା ପାଇଁ ବିଜେପି ପ୍ରୟାସ କରୁଛି । ଦେଶରେ ଏଭଳି ଅରାଜକତା ସୃଷ୍ଟି ହୋଇଛି, ଯାହାର କୌଣସି ସମାଧାନ ନାହିଁ । କଂଗ୍ରେସ ଏହି ହାଥ୍‌ ସେ ହାଥ୍‌ ଯୋଡୋ କାର୍ଯ୍ୟକ୍ରମ ମାଧ୍ୟମରେ ପ୍ରତି ଲୋକଙ୍କ ସହ ଯୋଡି ହେବ । ଜନସାଧାରଣଙ୍କୁ ସମସ୍ତ ବିଷୟ ଅବଗତ କରାଯିବ ।"

ଇଟିଭି ଭାରତ, ଭୁବନେଶ୍ବର