ଖୋର୍ଦ୍ଧା: ‘ମୋ ସ୍କୁଲ’ ଯୋଜନାରେ ବୋଲଗଡ଼ ବ୍ଲକ ଅଞ୍ଚଳର ୨ଟି ସ୍କୁଲକୁ ରୂପାନ୍ତରଣ କରାଯିବା ନେଇ ଆରମ୍ଭ ହୋଇଛି ପ୍ରକ୍ରିୟା । ଏନେଇ ଆଜି (ରବିବାର) ଖୋର୍ଦ୍ଧା ଜିଲ୍ଲାପାଳ ସନତ କୁମାର ମହାନ୍ତି ସ୍ଥାନୀୟ ବ୍ଲକ ଅଞ୍ଚଳକୁ ଗସ୍ତ କରି ପ୍ରସ୍ତାବିତ ୨ ସ୍କୁଲ ପରିଦର୍ଶନ କରିବା ସହ ସ୍ଥିତି ସମୀକ୍ଷା କରିଛନ୍ତି । ଏହି ଗସ୍ତ ସମୟରେ ସାଗରଗୁଆଁ ଠାରେ ଏମଜିଏନଆରଜିଏସ କାର୍ଯ୍ୟର ମଧ୍ୟ ତଦାରଖ କରିଛନ୍ତି ଜିଲ୍ଲାପାଳ ।
ସୂଚନା ଅନୁସାରେ, ଜିଲ୍ଲାପାଳ ବ୍ଲକ ଅଞ୍ଚଳର ସାଗରଗୁଆଁ ସରକାରୀ ଉଚ୍ଚ ବିଦ୍ୟାଳୟ ଓ ଗୋପାଳପୁର ଗ୍ରାମପଞ୍ଚାୟତର ଦେଉଳି ଆଞ୍ଚଳିକ ଉଚ୍ଚ ବିଦ୍ୟାଳୟକୁ ଯାଇ ପରିଦର୍ଶନ କରିଥିଲେ । ଏହି ସମୟରେ ଜିଲ୍ଲାପାଳଙ୍କ ସହ ବୋଲଗଡ଼ ବିଡ଼ିଓ ଧୋବେଇ ନାଏକ, ତହସିଲଦାର ସନ୍ତୋଷିନୀ ଦାଶ ,ବ୍ଲକ ଶିକ୍ଷାଧିକାରୀ ନିରଞ୍ଜନ ମହାନ୍ତି, ବ୍ଲକ ସହକାରୀ ଯନ୍ତ୍ରୀ ଅମୂଲ୍ୟ ବାହିନୀପତି ଓ କନିଷ୍ଠ ଯନ୍ତ୍ରୀମାନଙ୍କ ସମେତ ପ୍ରସ୍ତାବିତ ୨ ସ୍କୁଲର କର୍ମଚାରୀମାନେ ମଧ୍ୟ ଉପସ୍ଥିତ ରହିଥିଲେ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
