କେନ୍ଦ୍ରାପଡା: ଜିଲ୍ଲାର ରାଜକନିକା ଥାନା ଅନ୍ତର୍ଗତ ଅଚ୍ୟୁତପୁର ଗାଁରେ ଦେଖିବାକୁ ମିଳିଛି ଅଭାବୀ ପରିବାରର କରୁଣ କାହାଣୀ । ପୁଅର ଶୁଦ୍ଧିକ୍ରିୟା ପାଇଁ କେତେବେଳେ ରାସ୍ତା ଉପରେ ବସି ତ ଆଉ କେତେବେଳେ ଘରକୁ ଘର ଓ ଗାଁକୁ ଗାଁ ବୁଲି ଭିକ୍ଷା କରୁଛନ୍ତି ପରିବାର ଲୋକେ ।
ଗତମାସ ୧୨ ତାରିଖରେ ଭାରିଗଦା ଠାରେ ପ୍ରସ୍ତାବିତ ମେଗା ପାନୀୟଜଳ ପ୍ରକଳ୍ପ ଭଙ୍ଗାରୁଜା ଘଟଣାରେ ସମ୍ପୃକ୍ତ ଦର୍ଶାଇ ଗୋଟିଏ ପରିବାରର ରୋଜଗାରିଆ ୨ ଭାଇ ଅନିରୁଦ୍ଧ ମଳିକ ଓ ଶଙ୍କର୍ଷଣ ମଳିକଙ୍କୁ ରାତି ଅଧିଆ ପୋଲିସ ଗିରଫ କରି ଜେଲ ପଠାଇଛି । ଦୁଇଭାଇ ଜେଲରେ ଥିବା ଶୁଣି ବେଙ୍ଗାଲୁରରେ ଥିବା ସାନଭାଇ ରବୀନ୍ଦ୍ର ମଳିକ ଦୁଃଖରେ ଭାଙ୍ଗି ପଡିଥିଲେ ।
ଭାଇମାନଙ୍କୁ ଜାମିନରେ ଆଣିବା ପାଇଁ କିଛି କରିନପାରି ଗତ ୮ ତାରିଖରେ ବେଙ୍ଗାଲୁରରେ ଆତ୍ମହତ୍ୟା କରିଥିବା ପରିବାର ଲୋକେ କହିଛନ୍ତି । ହେଲେ ରବୀନ୍ଦ୍ରଙ୍କ ଶୁଦ୍ଧିକ୍ରିୟା ପାଇଁ ପରିବାର ପାଖରେ ପଇସା ନଥିବାରୁ ବାଧ୍ୟ ହୋଇ ପରିବାରର ମହିଳା ଓ ଛୋଟ ପିଲା ମାନେ ଗାଁ ଗାଁ ବୁଲି ଭିକ୍ଷା କରୁଛନ୍ତି ।
କିଛି ସାହାଯ୍ୟ ମିଳିଲେ ରବୀନ୍ଦ୍ରଙ୍କ ଶୁଦ୍ଧିକ୍ରିୟା କରିବେ ବୋଲି ପରିବାର ଲୋକେ କହିଛନ୍ତି । ଏବେ ୧୨ ଜଣ ସଦସ୍ୟ ଥିବା ପରିବାର ଭୋକ ଉପାସରେ ଦିନ କାଟୁଛନ୍ତି । ସରକାରୀ ସାହାଯ୍ୟ ସହିତ ୨ ଦୁଇ ଭାଇଙ୍କୁ ଜେଲରୁ ମୁକୁଳେଇବା ପାଇଁ ନିବେଦନ କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ