ଫୁଲବାଣୀ : କନ୍ଧମାଳ ଜିଲ୍ଲା ତୁମୁଡ଼ିବନ୍ଧ ପ୍ରଜେକ୍ଟ ଇମ୍ପ୍ଲିମେଣ୍ଟିଂ ଏଜେନ୍ସି (PIA) ଅଫିସର ସହାୟକ ନଗେନ୍ଦ୍ର ନାଥ ସ୍ୱାଇଁ ଭିଜିଲାନ୍ସ ହାତରେ ଧରାପଡ଼ିଛନ୍ତି । ଡୁପି ଓ ଏଡିପଦର ଗାଁର ୪ ଜଣ ହିତାଧିକାରୀଙ୍କ ଫାର୍ମ ପୋଖରୀ ବିଲ୍ କରାଇ ଦେବାକୁ କହି ୫୦ ହଜାର ଟଙ୍କା ଲାଞ୍ଚ ନେଉଥିଲେ ।
ଏନେଇ ଆଜି କୁର୍ତ୍ତମଗଡ଼ ନିକଟରେ ଟଙ୍କା ନେଉଥିବା ବେଳେ ଭିଜିଲାନ୍ସ ହାତରେ ଧରା ପଡିଛନ୍ତି । ନଗେନ୍ଦ୍ର ନାଥ ସ୍ୱାଇଁଙ୍କ ନିକଟରୁ ରଙ୍ଗ ବୋଳା ଟଙ୍କା ଜବତ କରାଯାଇଛି । ଏ ସଂକ୍ରାନ୍ତରେ ବ୍ରହ୍ମପୁର ଭିଜିଲାନ୍ସ ଡିଭିଜନରେ ଏକ ମାମଲା ରୁଜୁ ହୋଇଛି ।
ମିଳିଥିବା ସୂଚନା ଅନୁସାରେ ଜଳଛାୟା ବିଭାଗ ପକ୍ଷରୁ ତୁମୁଡିବନ୍ଧ ବ୍ଲକ ଗୁମା ପଞ୍ଚାୟତ ଡୁ଼ପି ଇଡିପଦର ଗ୍ରାମରେ ୪ ଜଣ ହିତାଧିକାରୀଙ୍କ ୪ ଟି ପୋଖରୀ ଖନନ କାର୍ଯ୍ୟ ହୋଇଥିଲା । ଜଣେ ହିତାଧିକାରୀଙ୍କ ସମ୍ପର୍କୀୟ ଦାଦା ସୁବାସ ମଲ୍ଲିକ କାମ ବୁଝାବୁଝି କରୁଥିଲେ । ହେଲେ କାମର ମଷ୍ଟରରୋଲ ବାହାର କରିବା ପାଇଁ ନଗେନ୍ଦ୍ରନାଥ ଗୋଟିଏ ପୋଖରୀ ପିଛା ୩୦ ହଜାର ଲେଖାଏଁ ଟଙ୍କା ଦାବି କରିଥିଲେ ।
ହିତାଧିକାରୀ ଏତେ ଟଙ୍କା ଦେଇପାରିବେ ନାହିଁ ବୋଲି କହିଥିଲେ । ପରେ ୧ ଲକ୍ଷ ଟଙ୍କାରେ କଥା ଛିଡି ଥିଲା । ଏ ନେଇ ସୁବାସ ଭିଜିଲାନ୍ସରେ ଅଭିଯୋଗ କରିଥିଲେ । ଯୋଜନା ମୂତାବକ ବୁଧବାର କୁର୍ତ୍ତମଗଡ଼ ଠାରେ ଟଙ୍କା ନେବା ପାଇଁ ନଗେନ୍ଦ୍ରନାଥ ପହଁଞ୍ଚିଥିଲେ । ବଜାରଠାରୁ କିଛି ଦୂର ଜଙ୍ଗଲ ଭିତର ରାସ୍ତାରେ ସୁବାସ ରହିଥିଲେ । ସେଠାରେ ନଗେନ୍ଦ୍ରନାଥ ପହଁଞ୍ଚି ୫୦ ହଜାର ଟଙ୍କା ଲାଞ୍ଚ ଗ୍ରହଣ କରୁଥିବାବେଳେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଅଧିକାରୀମାନେ ନଗେନ୍ଦ୍ରନାଥଙ୍କୁ ଧରି ତାଙ୍କ ପାଖରୁ ଟଙ୍କା ଜବତ କରିବାସହ ଗିରଫ କରିଥିଲେ । ଭିଜିଲାନ୍ସ ପକ୍ଷରୁ ଏକ ମାମଲା ରୁଜୁ ହୋଇଥିବା ଭିଜିଲାନ୍ସ ଡିଏସ୍ପି ଅରୁଣ ନାୟକ ସୂଚନା ଦେଇଛନ୍ତି । ଏଥିସହ ନଗେନ୍ଦ୍ରନାଥଙ୍କ କାର୍ଯ୍ୟାଳୟ ଏବଂ ବାସଭବନରେ ଚଢ଼ଉ ଜାରି ରହିଛି ।
କନ୍ଧମାଳରୁ ସଞ୍ଜୟ ପାତ୍ର,ଇଟିଭି ଭାରତ
