ଭବାନୀପାଟଣା: ଜାତୀୟ ଜୁନିଅର ଆଥଲେଟିକ ଚମ୍ପିଆନସିପରେ ଚମକିଲେ ଡିଏମ ଜୟରାମ । ମଧ୍ୟପ୍ରଦେଶର ଭୋପାଳରେ ଅନୁଷ୍ଠିତ ଜାତୀୟ ଜୁନିଅର ଆଥଲେଟିକ ଚମ୍ପିଆନସିପରେ କମାଲ କରିଛନ୍ତି କଳାହାଣ୍ଡି ପୁଅ । 100 ମିଟର ଦୌଡରେ 10.9 ସେକେଣ୍ଡର ରେକର୍ଡ କରି ରୌପ୍ୟ ପଦକ ହାସଲ କରିଛନ୍ତି ଜୟରାମ । ଜାତୀୟ ସ୍ତରରେ ରେକର୍ଡ କରି ରାଜ୍ୟ ତଥା ଜିଲ୍ଲା ପାଇଁ ଗୌରବ ଆଣିଛନ୍ତି ।
ଏହି ସଫଳତା ପରେ ଆସନ୍ତା ଅକ୍ଟୋବର ଶେଷ ସପ୍ତାହରେ କୁଏତରେ ଅନୁଷ୍ଠିତ ହେବାକୁ ଥିବା ଏସିଆର ୟୁଥ ଆଥଲେଟିକ ଚମ୍ପିଆନସିପ ପାଇଁ ଉତ୍ତୀର୍ଣ୍ଣ ହୋଇଛନ୍ତି । ଜୟରାମଙ୍କ ଏ ସଫଳତା ପାଇଁ ତାଙ୍କୁ ଜିଲ୍ଲା ପ୍ରଶାସନ ପକ୍ଷରୁ ସମ୍ବର୍ଦ୍ଧନା ଦିଆଯାଇଛି । ଜିଲ୍ଲାପାଳ ପି ଅନ୍ବେଷା ରେଡ୍ଡୀ ଜୟରାମଙ୍କୁ ୩୦ ହଜାର ଟଙ୍କାର ପ୍ରୋତ୍ସାହନ ରାଶି ସମେତ ଦୌଡ ପାଇଁ ବ୍ରାଣ୍ଡେଡ୍ ସ୍ପାଇକ୍ ଦେଇ ଉତ୍ସାହିତ କରିଛନ୍ତି । ଡିଏମ୍ ଜୟରାମ ଭବାନୀପାଟଣା ବିକାଶ କଲେଜର ଛାତ୍ର । ତାଙ୍କର ଏହି ସଫଳତା ଆଗାମୀ ଦିନରେ ଯୁବପିଢ଼ିଙ୍କ ପାଇଁ ପ୍ରେରଣା ପାଲଟିବ । ଏହି ସଫଳତା ପରେ ତାଙ୍କୁ ଶୁଭେଚ୍ଛାର ସୁଅ ଛୁଟୁଛି ।
ଏହା ବି ପଢନ୍ତୁ...କଣ ଏହି ମାଙ୍କଡିଂ, ଜାଣନ୍ତୁ କେବେଠୁ ହୋଇଥିଲା ଆରମ୍ଭ
ମଧ୍ୟପ୍ରଦେଶର ଭୋପାଳରେ 17 ସେପ୍ଟେମ୍ବରୁ 19 ସେପ୍ଟେମ୍ବର ଯାଏଁ ଜାତୀୟ ଜୁନିଅର ଆଥଲେଟିକ ଚମ୍ପିଆନସିପ ଅନୁଷ୍ଠିତ ହୋଇଥିଲା । ଯେଉଁଥିରେ ରାଜ୍ୟ ତଥା ଜିଲ୍ଲା ପାଇଁ ଗୌରବ ଆଣିଛନ୍ତି ଜୟରାମ ।
ଇଟିଭି ଭାରତ, କଳାହାଣ୍ଡି
