ଭବାନୀପାଟଣା: ଭୁଶୁଡ଼ିଲା ଇନ୍ଦ୍ରାବତୀ ବାମ ମୁଖ୍ୟ କେନାଲ । ଫଳରେ ଶହଶହ ଏକର ଚାଷ ଜମି ଜଳମଗ୍ନ ହୋଇଛି । କଳାହାଣ୍ଡି ଜିଲ୍ଲାରେ ଖରିଫ ଋତୁ ଧାନ ସଂଗ୍ରହ ପ୍ରକ୍ରିୟା ଜାରି ରହିଥିବାବେଳେ ଚାଷୀ ଏବେ ରବି ଋତୁ ଚାଷ କାମ ଆରମ୍ଭ କରିଛି । କ୍ଷେତରେ ହଳ ବୁଲାଇ ତଳି ପକାଇବା ଆରମ୍ଭ କରିଥିବାବେଳେ କେନାଲ ଭୁଶୁଡିବା ଫଳରେ ଚାଷୀଙ୍କ ଚିନ୍ତା ଦ୍ବିଗୁଣିତ ହୋଇପଡିଛି । ଇନ୍ଦ୍ରାବତୀ ବାମ ମୁଖ୍ୟ ଖେନାଲ ଭୁଶୁଡିବା ଯୋଗୁଁ ଶହଶହ ଏକର ଚାଷ ଜମିରେ ପାଣି ମାଡ଼ି ତଳି ନଷ୍ଟ କରିଦେଇଛି ।

ସୂଚନା ଅନୁଯାୟୀ କଳାହାଣ୍ଡି ଜିଲ୍ଲାର ଲାଇଫଲାଇନ କୁହାଯାଉଥିବା ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପର ବାମ ମୁଖ୍ୟ କେନାଲ ଯୋଗେ ଚାଷୀମାନଙ୍କୁ ରବି ଋତୁ ଚାଷ କାମ ପାଇଁ ଜଳ ଭଣ୍ଡାରରୁ ପାଣି ଛଡାଯାଇଥିଲା । ହେଲେ ନିମ୍ନ ମାନର କାମ ଯୋଗୁଁ ଏହି କେନାଲ ଏବେ ଭୁଶୁଡ଼ି ପଡ଼ିଛି । ଜୟପାଟଣା ବ୍ଲକ ଅନ୍ତର୍ଗତ ଗୁନଗୁନିଆ ଡିଷ୍ଟିବ୍ୟୁଟାରି ରେଙ୍ଗାଲପାଲି ଗାଁ ନିକଟରେ କେନାଲ ଭୁଶୁଡ଼ିବା ଫଳରେ ୩୦ ଫୁଟ ଗଭୀର ଘାଇ ସୃଷ୍ଟି ହୋଇଛି । ଫଳରେ ଶହଶହ ଏକର ଜମିରେ ଚାଷୀ ତଳି ପକାଇଥିବାବେଳେ ସବୁ ଚାଷ ଜମି ଏବେ ଜଳମଗ୍ନ ହୋଇଛି । ଖବର ପାଇ ଘଟଣାସ୍ଥଳରେ ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପ ଅଧିକାରୀ ପହଞ୍ଚି କ୍ଷୟକ୍ଷତିର ଆକଳନ କରିବା ପରେ ବାଲି ବସ୍ତା ପକାଇ କେନାଲର ମରାମତି କାର୍ଯ୍ୟ ଆରମ୍ଭ ହୋଇଛି ।

ସେପଟେ କେନାଲ ଭରସାରେ ତଳି ପକାଇଥିବା ତଳମୁଣ୍ଡର ଚାଷୀଙ୍କୁ ସକାଳୁ ଜଳ ଯୋଗାଣ ବନ୍ଦ କରାଯାଇଥିବା ବେଳେ ଚାଷ ନଷ୍ଟ ହେବାର ସମ୍ଭାବନା ରହିଛି । ତେବେ ଗତ ଦୁଇମାସ ତଳେ ଏହି ସ୍ଥାନରେ ୧୦ ଲକ୍ଷ ଟଙ୍କା ବ୍ୟୟ ଅଟକଳରେ କେନାଲ ମରାମତି କରାଯାଇଥିଲା । ହେଲେ ନିମ୍ନ ମାନର କାମ ଯୋଗୁଁ କେନାଲ ଭୁଶୁଡି ପଡିଥିବା ଗ୍ରାମବାସୀ ବିଭାଗ ନିକଟରେ ଅଭିଯୋଗ କରିଛନ୍ତି । ପ୍ରତ୍ୟେକ ବର୍ଷ ରବି ଋତୁ ଧାନ ଚାଷ ସମୟରେ ଏଭଳି କେନାଲ ଭୁଶୁଡି ପଡ଼ିଥାଏ । ହେଲେ ଇନ୍ଦ୍ରାବତୀ ଜଳ ବିଦ୍ୟୁତ ପ୍ରକଳ୍ପ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେଉନଥିବାବେଳେ ଠିକାଦାରଙ୍କ ଲାଭଖୋର ମନୋଭାବ ଯୋଗୁଁ ଚାଷୀ ସମସ୍ୟାର ସମ୍ମୁଖିନ ହେଉଥିବା ଅଭିଯୋଗ ହୋଇଛି ।

ଇଟିଭି ଭାରତ, କଳାହାଣ୍ଡି