ଭବାନୀପାଟଣା: ସିପିଆଇ (ଏମଏଲ) ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ । ଶୁକ୍ରବାର ମଧ୍ୟ ଆଦିବାସୀ ଅଧ୍ୟୁଷିତ କଳାହାଣ୍ଡି ଜିଲ୍ଲାର ଅନେକ ଅଞ୍ଚଳରେ ଶିକ୍ଷା, ସ୍ବାସ୍ଥ୍ୟ, ଗମନାଗମନ ଭଳି ମୌଳିକ ସୁବିଧାରୁ ଲୋକେ ବଞ୍ଚିତ ହେଉଥିବା ଅଭିଯୋଗ କରିଛି ସିପିଆଇ (ଏମଏଲ) । ଏଭଳି ଅନେକ ଅଭିଯୋଗ ନେଇ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ପ୍ରଧାନମନ୍ତ୍ରୀ ଓ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛି ସିପିଆଇ (ଏମଏଲ) ।
ସିପିଆଇ (ଏମଏଲ)ର ଅଭିଯୋଗ ଅନୁଯାୟୀ ଜିଲ୍ଲାର ଅନେକ ଆଦିବାସୀ ଲୋକଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ କରାଯାଇ ନଥିବା ବେଳେ ଯେଉଁ କିଛି ଅଞ୍ଚଳରେ ଲୋକେ ଯୋଜନା ପାଇଛନ୍ତି ସେଠି ଲୋକଙ୍କୁ ଗୃହ ନିର୍ମାଣ ପାଇଁ ଟଙ୍କା ମିଳିପାରିନାହିଁ । ଏହା ସହିତ ଆଜି ମଧ୍ୟ ଅପହଞ୍ଚ ଇଲାକାର ଛାତ୍ରଛାତ୍ରୀ ଗୁଣାତ୍ମକ ଶିକ୍ଷା ପାଇବାରୁ ବଞ୍ଚିତ ହେଉଛନ୍ତି । ଗମନାଗମନର ବ୍ୟବସ୍ଥା ନଥିବା କାରଣରୁ ଅନେକ ସମୟରେ ଆଦିବାସୀ ଅଧ୍ୟୁଷିତ ଅଞ୍ଚଳର ଲୋକେ ଖଟିଆରେ ରୋଗୀକୁ ବୋହି ନେଉଛନ୍ତି । ହେଲେ ସରକାର ଏଥିପ୍ରତି ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି ସିପିଆଇ (ଏମଏଲ)ର କଳାହାଣ୍ଡି ସମ୍ପାଦକ କେଶବ ପ୍ରଧାନ ।
ଦୀର୍ଘ ଦିନରୁ କଳାହାଣ୍ଡି ଜିଲ୍ଲାବାସୀଙ୍କ ଦାବି ହୋଇ ଆସୁଥିବା ନର୍ଲା ରେଳ ମରାମତି କାରଖାନା ମଧ୍ୟ ଆରମ୍ଭ ହୋଇ ପାରିନାହିଁ । ରେଳ ମରାମତି କାରଖାନା ହେଲେ ଜିଲ୍ଲାର ଅନେକ ଲୋକ ରୋଜଗାର ମଧ୍ୟ ପାଇ ପାରିବେ । ହେଲେ କେନ୍ଦ୍ର ଓ ରାଜ୍ୟ ସରକାରଙ୍କ ଆନ୍ତରିକତା ଅଭାବ ଯୋଗୁଁ ତାହା ମଧ୍ୟ ଏବେ ଅନିଶ୍ଚିତତା ମଧ୍ୟକୁ ଠେଲି ହୋଇ ଯାଇଛି ବୋଲି କହିଛି ସିପିଆଇ (ଏମଏଲ) । ତେବେ ଏନେଇ ଶୁକ୍ରବାର ଜିଲ୍ଲା ସିପିଆଇ (ଏମଏଲ) ପକ୍ଷରୁ ଭବାନୀପାଟଣା କଲେଜ ଛକ ଠାରୁ ଏକ ବିଶାଳ ବିକ୍ଷୋଭ ଶୋଭାଯାତ୍ରା ବାହାରିଥିଲା । ସହର ପରିକ୍ରମା ପରେ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରାଯାଇଥିଲା । ତେବେ ଏହି ଅବସରରେ ପ୍ରଧାନମନ୍ତ୍ରୀ ଓ ରାଜ୍ୟ ସରକାରଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କ ଜରିଆରେ ଦାବିପତ୍ର ମଧ୍ୟ ପ୍ରଦାନ କରାଯାଇଛି ।
ଇଟିଭି ଭାରତ, କଳାହାଣ୍ଡି
