ଭବାନୀପାଟଣା: ବାଉଁଶ ବଣର ଦେବୀ ମା' ଡୋକରୀ । ଶହ ଶହ ବର୍ଷ ଧରି ଗଙ୍ଗ ବଂଶ ଓ ନାଗ ବଂଶର ଉତ୍ତରାଧିକାରୀଙ୍କ ଦ୍ଵାରା ପୂଜା ପାଇ ଆସୁଛନ୍ତି ଦେବୀ ମା' । ଏହି ଅଞ୍ଚଳର ଅଧିଷ୍ଠାତ୍ରୀ ଦେବୀ ଭାବରେ ପୂଜା ପାଉଛନ୍ତି ବାଉଁଶ ବଣର ଦେବୀ ମାଁ ଡୋକରୀ । ମା'ଙ୍କ ନିକଟରେ ଆଜି ବିଜୟା ଦଶମୀ ପୂଜାର୍ଚ୍ଚନା ଶେଷ ହୋଇଛି ।
ଅଷ୍ଟମୀ ମଧ୍ୟରାତ୍ରିରେ ମା'ଙ୍କୁ ମାନସିକଧାରୀମାନେ ଛାଗଲ ବଳି ଅର୍ପଣ କରନ୍ତି । ମହାଷ୍ଟମୀ ଯାତ୍ରା ପାଇଁ ବାନେର ସ୍ଥିତ ମା' ବୁଢ଼ୀ ପଦରେନଙ୍କ ସମେତ ଜୟପାଟଣା, ପିପଲଗୁଡା, ଖାଲିଆଭଟା, ପ୍ରତାପପୁର, କରଞ୍ଜିଗୁଡା, ଗହିପାଣି ଆଦି ସ୍ଥାନ ଦେଇ ଦେବୀ ମା'ଙ୍କର ପ୍ରତୀକ ଲାଠି ଆସିଥାଏ । ପ୍ରାୟ ୧୮ କିଲୋମିଟର ରାସ୍ତା ଅତିକ୍ରମ କରି ମା' ଡୋକରୀଙ୍କ ଅଷ୍ଟମୀ ପୂଜାରେ ଏହି ଲାଠି ମା'ଙ୍କ ପୂଜାରେ ବ୍ୟବହାର ହୁଏ ।
ଲାଠିଯାତ୍ରା ସମୟରେ ହଜାର ହଜାର ଶ୍ରଦ୍ଧାଳୁ ରାସ୍ତାର ଉଭୟ ପାର୍ଶ୍ଵରେ ରହି ମା'ଙ୍କୁ ଭକ୍ତି ଅର୍ଘ୍ୟ ଦେଇଥାନ୍ତି । ମହନବମୀ ପୂଜା ପରେ ମାଁଙ୍କ ଦଶମୀ ତିଥିରେ ଅନ୍ତିମ ପୂଜା ହୁଏ । ଏହାପରେ ଦହି ଅନ୍ନ ଲାଗି ହୁଏ । ଦେବୀ ମା'ଙ୍କ ରୋପିତ ମସ୍ତକକୁ ବିସର୍ଜନ କଲାପରେ ମନ୍ଦିର ୯ ଦିନ ପାଇଁ କଣ୍ଟାବାଡ଼ ଦିଆଯାଇଥାଏ । ୯ ଦିନର ଅଣସର ପରେ ମାଁ ପୁନର୍ବାର ପୂଜା ପାଇଥାନ୍ତି ।
କଳାହାଣ୍ଡିରୁ ଅଜିତ କୁମାର ସିଂହ, ଇଟିଭି ଭାରତ
