ଜଗତସିଂହପୁର: ଜିଲ୍ଲା ଏରସମା ବ୍ଲକ ଅନ୍ତର୍ଗତ JSW ପ୍ରସ୍ତାବିତ ଅଞ୍ଚଳ ଢ଼ିଙ୍କିଆରେ ଗତକାଲି(ଶୁକ୍ରବାର) ହୋଇଥିବା ପୋଲିସର କାର୍ଯ୍ୟାନୁଷ୍ଠାନରେ ଏକାଧିକ ଲୋକ ଆହତ ହୋଇଛନ୍ତି । ପୋଲିସର ଭୟରେ ଗୁରୁତର ଭାବେ ଆହତ ହୋଇଥିବା ଲୋକେ ଗିରଫଦାରୀ ଭୟରେ ଜଙ୍ଗଲ ମଧ୍ୟରେ ଛପି ରହିଥିବା କୁହାଯାଇଛି । ପୋଲିସକୁ ଭୟକରି ଗ୍ରାମର କେତେକ ମହିଳା ଆହତ ହୋଇ ଘରେ ପଡି ରହିଛନ୍ତି । ପୋସ୍କୋ-ଜିନ୍ଦଲ ସଂଗ୍ରାମ ସମିତିର ମୁଖ୍ୟ ଦେବେନ୍ଦ୍ର ସ୍ୱାଇଁଙ୍କ ସମେତ ୬ ଜଣଙ୍କୁ ସଙ୍ଗୀନ ଦଫା ଲଗାଇ ପୋଲିସ ଆଜି(ଶନିବାର) କୋର୍ଟ ଚାଲାଣ କରିଛି ।
ଆଜି ଢ଼ିଙ୍କିଆରେ ପୋଲିସ ଫ୍ଲାଗମାର୍ଚ୍ଚ କରିବା ସହ ଆନ୍ଦୋଳନର ନେତୃତ୍ୱ ନେଉଥିବା ଲୋକଙ୍କୁ ଖୋଜିବା ଆରମ୍ଭ କରିଛି । ଛୋଟପିଲାଙ୍କ ଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ଢ଼ିଙ୍କିଆରେ ପୋଲିସ ଭୟରେ ଆତଙ୍କିତ ହୋଇପଡିଛନ୍ତି । ଅପର ପକ୍ଷରେ ଗ୍ରାମର କେତେକ ଲୋକଙ୍କ ଗତକାଲି ଠାରୁ ପତ୍ତା ମିଳିପାରୁ ନାହିଁ । ପରିବାର ଲୋକେ ବହୁତ ଖୋଜାଖୋଜି କରିଥିଲେ ମଧ୍ୟ ସେମାନଙ୍କର କୌଣସି ଖୋଜ ଖବର ମିଳୁନଥିବା ପରିବାର ଲୋକେ କହିଛନ୍ତି । ଢ଼ିଙ୍କିଆରେ ବର୍ତ୍ତମାନ ସୁଦ୍ଧା ପରିସ୍ଥିତି ଶାନ୍ତ ଥିବାବେଳେ ପୋଲିସ ଗାଁକୁ ଜଗି ରହିଛି ।
ଜଗତସିଂହପୁରରୁ ସୁଶାନ୍ତ କୁମାର ପାତ୍ର, ଇଟିଭି ଭାରତ
