ଦେବଗଡ: ଜଳବାୟୁ ପରିବର୍ତ୍ତନ ସାଙ୍ଗକୁ ରୋଗପୋକର ଆକ୍ରମଣ ଜିଲ୍ଲାର କମଳା ଚାଷକୁ ବେଶ ପ୍ରଭାବିତ କରିଛି । କମଳା ଚାଷକୁ ଜୀବିକା ଭାବରେ ଆଦରି ନେଇଥିବା ଦେବଗଡ ଶତାଧିକ କମଳା ଚାଷୀ ଏବେ ଚିନ୍ତାରେ ।
ବନପାହାଡ ପରିବେଷ୍ଟିତ ଦେବଗଡ ଜିଲ୍ଲାର ମୃତ୍ତିକା ଓ ଜଳବାୟୁ କମଳା ଚାଷ ପାଇଁ ବେଶ ଉପଯୋଗୀ । ତେଣୁ ଦେବଗଡ ଜିଲ୍ଲା ରିଆମାଳ ବ୍ଲକର କୁଣ୍ଢେଇଗୋଳା , ବୁଢାପାଳ , ଝରାବେର୍ଣ୍ଣି , ଖିଲବେର୍ଣ୍ଣି , ଚଢେଇମରା ଓ ତୁଙ୍ଗାମାଲ ଆଦି ଦଶଖଣ୍ଡ ଗ୍ରାମର ଶତାଧିକ ଚାଷୀ କମଳା ଚାଷ ଉପରେ ନିର୍ଭର କରି ଚଳି ଆସୁଛନ୍ତି । ଏହି ଅଂଚଳରେ ପ୍ରାୟ 500 ଏକର ରୁ ଅଧିକ ବଗିଚାରେ କମଳା ଚାଷ ହୋଇଥାଏ ।
ତେବେ ଏଠିକାର କମଳା ଅଧିକ ସୁସ୍ବାଦୁ ହୋଇଥିବାରୁ ବଜାରରେ ମଧ୍ୟ ଏହାର ବେଶ ଚାହିଦା ରହିଛି । ଦେବଗଡ ଜିଲ୍ଲାରୁ ଉତ୍ପାଦିତ କମଳା କଟକ , ଭୁବନେଶ୍ବର , ସମ୍ବଲପୁର , ଅନୁଗୁଳ , ରାଉରକେଲା ଆଦି ଅଞ୍ଚଳକୁ ରପ୍ତାନି ହୋଇଥାଏ । କମଳା କିଲୋପ୍ରତି 40 ଟଙ୍କାରୁ 60 ଟଙ୍କା ଦରରେ ବିକ୍ରୟ କରି ଚାଷୀମାନେ ପ୍ରତିବର୍ଷ ବେଶ ଭଲ ଦୁଇ ପଇସା ରୋଜଗାର କରି ପରିବାର ପ୍ରତିପୋଷଣ କରିଥାନ୍ତି ।
ମାତ୍ର ବିଗତ କିଛିବର୍ଷ ହେଲା ଜଳବାୟୁ ପରିବର୍ତ୍ତନ ସାଙ୍ଗକୁ ରୋଗପୋକ ଆକ୍ରମଣ ଜିଲ୍ଲାର କମଳା ଚାଷୀଙ୍କୁ ଚିନ୍ତାରେ ପକାଇ ଦେଇଛି । ଚାଷ ସମୟରେ ଅଧିକାଂଶ ସମୟ କୋହଳା ପାଗ ଲାଗି ରହୁଥିବାରୁ କମଳା ର ଆକାର ବୃଦ୍ଧି ପାଇନାହିଁ । ଏଥିସହିତ ଏକ ଅଜଣା ପ୍ରଜାତିର କୀଟ ଦଂଶନ ଯୋଗୁଁ କମଳା ଗୁଡିକ ଅମଳ ପୂର୍ବରୁ ଗଛରୁ ଝଡି ପଡୁଛି ।
କୀଟ ଦଂଶନ ଯୋଗୁଁ ପ୍ରତି ବଗିଚାରେ କ୍ବିଣ୍ଟାଲ କ୍ବିଣ୍ଟାଲ କମଳା ଝଡି ନଷ୍ଟ ହୋଇଯାଉଥିବା ଦେଖାଯାଇଛି । କୀଟ ଦଂଶନ ଦାଉରୁ କମଳା ଗୁଡିକୁ ସୁରକ୍ଷିତ ରଖିବା ପାଇଁ ଜିଲ୍ଲା କୃଷି ଉଦ୍ୟାନ ବିଭାଗର ପରାମର୍ଶ ଅନୁଯାୟୀ ଯେତେ ଔଷଧ ସିଞ୍ଚନ କଲେ ସୁଦ୍ଧା କୌଣସି ସୁଫଳ ମିଳିପାରୁ ନାହିଁ । ଫଳରେ ଏହି ଚାଷ ଉପରେ ସମ୍ପୂର୍ଣ୍ଣ ନିର୍ଭରଶୀଳ ଜିଲ୍ଲାର ଶହ ଶହ ଚାଷୀ ନିରାଶ ହୋଇ ପଡିଛନ୍ତି ।
ଅପରପକ୍ଷରେ , ଜିଲ୍ଲାର କମଳା ଚାଷୀ ଉକ୍ତ କାରଣରୁ ପ୍ରତିବର୍ଷ ଲକ୍ଷାଧିକ ଟଙ୍କାର କ୍ଷତି ସହି ଆସୁଥିଲେ ସୁଦ୍ଧା ସେମାନଙ୍କୁ କୌଣସି ସରକାରୀ ତାଲିମ କିମ୍ବା ପ୍ରୋତ୍ସାହନ ମିଳିପାରୁନାହିଁ । ଏଥିଯୋଗୁଁ କମଳା ଚାଷ ପ୍ରତି ଚାଷୀଙ୍କ ଉତ୍ସାହ କମି ଆସୁଥିବା ପରିଲକ୍ଷିତ ହୋଇଛି ।
ଇଟିଭି ଭାରତ, ଦେବଗଡ
