ବୌଦ୍ଧ: ଲଗାତାର ତିନି ଦିନ ଧରି ବୌଦ୍ଧରେ ଅବିଶ୍ରାନ୍ତ ତଥା ପ୍ରବଳ ବର୍ଷା ପରେ ଗତକାଲି(ମଙ୍ଗଳବାର) ଅପରାହ୍ନରୁ ଏଥିରେ ବ୍ରେକ ଲାଗିଛି । ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ ରେକର୍ଡ ମାତ୍ରାରେ ବର୍ଷା ଯୋଗୁଁ ବିଭିନ୍ନ ସ୍ଥାନରେ ରାସ୍ତା ଉପରେ ବନ୍ୟା ପାଣି ପ୍ରବାହିତ ହେବା ସହ ଅନେକ ସ୍ଥାନରେ ଘାଇ ସୃଷ୍ଟି ହୋଇଛି । ବିଶେଷ ଭାବରେ ହରଭଙ୍ଗା ବ୍ଲକର ଅନେକ ସ୍ଥାନରେ ଏଭଳି ପରିସ୍ଥିତି ସୃଷ୍ଟି ହୋଇଥିବାରୁ ଜିଲ୍ଲା ପ୍ରଶାସନ ପକ୍ଷରୁ ତଳିଆ ଅଞ୍ଚଳର ଲୋକଙ୍କୁ ସତର୍କ କରିଦିଆଯାଇଥିଲା ।
ଜିଲ୍ଲା ସଦର ମହକୁମା ଠାରେ ମଧ୍ୟ ଅନେକ ତଳିଆ ଅଞ୍ଚଳରେ ବନ୍ୟା ପାଣି ପଶିଯିବା ସହିତ ବିଭିନ୍ନ ସରକାରୀ କାର୍ଯ୍ୟାଳୟ, ଯେପରିକି ଜିଲ୍ଲା ମୁଖ୍ୟ ଡାକ୍ତରଖାନା, ମନମୁଣ୍ଡା ଡାକ୍ତରଖାନା, ଜିଲ୍ଲା ରେଜିଷ୍ଟ୍ରି ଅଫିସ, ଡିଆରଡିଏ ପରିସରରେ ବର୍ଷା ପାଣି ପଶି ଯାଇଥିଲା । ରେଜିଷ୍ଟ୍ରି କାର୍ଯ୍ୟାଳୟରେ ବର୍ଷା ପାଣି ପଶିଯାଇ ସଟସର୍କିଟ ଯୋଗୁଁ କର୍ମଚାରୀମାନେ ଅଫିସ ଭିତରକୁ ପ୍ରବେଶ କରିପାରିନଥିଲେ । ଫଳରେ ଦୂରଦୂରାନ୍ତରୁ ଆସିଥିବା ଲୋକେ ଜମିବାଡ଼ି ରେଜିଷ୍ଟ୍ରି କରିନପାରି ଫେରି ଯାଇଥିଲେ ।
ସେପଟେ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟ ସମ୍ମୁଖରେ ଉପୁଡି ପଡିଥିବା ବିରାଟକାୟ ଆମ୍ବଗଛକୁ ଓଡ୍ରାଫ ଟିମ ପହଞ୍ଚି ସଫା କରିଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
