ବୌଦ୍ଧ: ଅସହାୟ ଅବସ୍ଥାରେ ରାତିର ଅନ୍ଧକାରରେ ନିଜ ଶିଶୁପୁତ୍ରକୁ ଛାଡିଦେଇ ମା’ ଚାଲିଗଲା । ଅତ୍ୟନ୍ତ ବିକଳ ଅବସ୍ଥାରେ ଶିଶୁଟି ରାତି ତମାମ ନିଃସଙ୍ଗ ହୋଇ ଏକ ପଡିଆରେ ମା’ର ଫେରିବା ବାଟକୁ ଚାହିଁ ବସିଥିଲା । ହେଲେ ମା’ ଆଉ ଆସିଲା ନାହିଁ । ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ବୌଦ୍ଧ ଜିଲ୍ଲା ଜହ୍ନାପଙ୍ଗ ଫାଣ୍ଡି ଅନ୍ତର୍ଗତ ଖୁଣ୍ଟବନ୍ଧ ପଞ୍ଚାୟତରେ ।
57 ନମ୍ବର ଜାତୀୟ ରାଜପଥ ନିକଟରେ ଥିବା ବ୍ରହ୍ମଚାରୀ ଗ୍ରାମ ନିକଟସ୍ଥ ପଡିଆରେ ଗତ ରାତିରୁ ଏକ ବର୍ଷର ଶିଶୁ ପୁତ୍ରକୁ ରାତିର ଅନ୍ଧକାରରେ ଛାଡିଦେଇ ମା’ କୁଆଡେ ଚାଲିଯାଇଛି । ଆଜି(ଶୁକ୍ରବାର)ସକାଳୁ ଜଣେ ଗ୍ରାମବାସୀ ହଠାତ ପଡିଆରେ ଛୁଆଟିକୁ ଏକାକୀ ଦେଖି ପ୍ରଥମେ ଡରିଯାଇଥିଲେ । ପରେ ସେ ଗ୍ରାମବାସୀଙ୍କ ସହାୟତାରେ ବୌଦ୍ଧ ପୋଲିସ ଓ ଚାଇଲ୍ଡ ଲାଇନକୁ ଖବର ଦେଇଥିଲେ । ଶିଶୁଟିକୁ ଉଦ୍ଧାର କରାଯାଇ ଶିଶୁ ମଙ୍ଗଳ ସମିତିକୁ ହସ୍ତାନ୍ତର କରାଯାଇଥିବା ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ